କେନ୍ଦ୍ରାପଡ଼ା: ଖରା ଛୁଟିରେ ଗାଁ ପିଲା ଆଧ୍ୟାତ୍ମିକ ସହିତ ଯୋଡ଼ି ହେଉଛନ୍ତି । ଏକାଠି ପଢ଼ୁଛନ୍ତି ଗୀତା ଓ ଭାଗବତ । ଏଭଳି ନିଆରା ଦୃଶ୍ୟ ଦେଖିବାକୁ ମିଳିଛି କେନ୍ଦ୍ରାପଡା ନଳପାରି ଗାଁରେ । ଗ୍ରାମର ମହିଳା ସନ୍ଧ୍ୟାରାଣୀ ବରାଳ ପ୍ରାୟ ୫୦ରୁ ଅଧିକ ପିଲାଙ୍କୁ ଗୀତା ଓ ଭାଗବତ ପାଠର ଅଭ୍ୟାସ କରାଉଛନ୍ତି । ଏବେ ଅନର୍ଗଳ ସଂସ୍କୃତ ଶ୍ଳୋକ ଆବୃତି କରି ପାରୁଛନ୍ତି ପିଲା । 

କୁନି କୁନି ପିଲାମାନଙ୍କୁ ଆଧ୍ୟାତ୍ମିକ ମାର୍ଗରେ ପରିଚାଳିତ କରୁଥିବା ସନ୍ଧ୍ୟାରାଣୀ ନିଜେ ଜଣେ ସରକାରୀ ଚାକିରିଆ। ଅଫିସ କାମରୁ ସମୟ ବାହାର କରି ସେ ଏହି ମହତ କାମରେ ଲାଗିଛନ୍ତି । ଗାଁରେ ଥିବା ଶିବାନନ୍ଦ ସେବାଶ୍ରମର ଆମ୍ବ ବଗିଚାରେ ଗୀତା ଏବଂ ଭାଗବତ ଶିକ୍ଷା ଦିଆଯାଏ । ଗାଁର କୁନି କୁନି ପିଲାମାନଙ୍କୁ ନେଇ ଏମିତି ଏକ ନିଆରା ଅନୁଷ୍ଠାନ ଚଳାଇଛନ୍ତି ସନ୍ଧ୍ୟାରାଣୀ । ଖରାଛୁଟିରେ ସମୟ ନଷ୍ଟ କରିବା କିମ୍ବା ଟିଭି ଓ ମୋବାଇଲ ଧରି ବସିବା ବଦଳରେ ପିଲାମାନେ ଗୀତା, ଭାଗବତ ପରି ଧାର୍ମିକ ପୁସ୍ତକ ପଢିବା ସହିତ କଣ୍ଠସ୍ଥ କରିବାକୁ ଚେଷ୍ଟା କରୁଛନ୍ତି । ପ୍ରତିଦିନ ଉପରବେଳା ସମୟରେ ଚାଲୁଛି ଏହି ଆଧ୍ୟାତ୍ମିକ ଶିକ୍ଷା। ଏଠାରେ ପିଲାମାନଙ୍କୁ ବିଭିନ୍ନ ପୁରାଣ, ଧର୍ମପୁସ୍ତକ ଓ ମହାପୁରୁଷଙ୍କ ଜୀବନ ସମ୍ପର୍କରେ ଶିକ୍ଷା ଦିଆଯାଉଛି। ଗୀତା, ଭାଗବତ ପଢିବା ସହିତ ଉଚ୍ଚାରଣ କରିବାର ଶୈଳୀ ଓ କୌଶଳ ମଧ୍ୟ ସେ ପିଲାମାନଙ୍କୁ ଶିଖାଉଛନ୍ତି । ଏବେ ଏହି ଶିକ୍ଷାକେନ୍ଦ୍ରରେ ପ୍ରାୟ ୫୦ରୁ ଅଧିକ ପିଲା ଅଧ୍ୟୟନ କରୁଛନ୍ତି । ବିନା ପାରିଶ୍ରମିକରେ ସନ୍ଧ୍ୟାରାଣୀ ଜାରି ରଖିଛନ୍ତି ପିଲାଙ୍କୁ ଗଢିବାର ଏହି ସୁନ୍ଦର ଅଭିଯାନ l

ସନ୍ଧ୍ୟାରାଣୀ ନିଜେ ଜଣେ ସରକାରୀ ଚାକିରିଆ। ପଟ୍ଟାମୁଣ୍ଡାଇ ବଡମୂଳବସନ୍ତ ଆରଆଇ ସର୍କଲରେ ସେ ଆରଆଇ ଭାବେ କାର୍ଯ୍ୟରତ । ସକାଳୁଆ ଅଫିସ ହୋଇଥିବା ହେତୁ ଉପରବେଳା ସମୟତକ ସେ ପିଲାଙ୍କୁ ଆଧ୍ୟାତ୍ମିକ ଶିକ୍ଷା ଦେଉଛନ୍ତି । ଏପ୍ରିଲ ୨୦ ତାରିଖରୁ ଆରମ୍ଭ ହୋଇଥିବା ଏହି ପ୍ରଶିକ୍ଷଣ ଜୁନ୍ ୧୦ ତାରିଖ ପର୍ଯ୍ୟନ୍ତ ଚାଲିବ। ଗତ ୬ ବର୍ଷ ଧରି ପ୍ରତିବର୍ଷ ଗ୍ରୀଷ୍ମଛୁଟିରେ ସନ୍ଧ୍ୟାରାଣୀ ଏହି ଶିକ୍ଷାକେନ୍ଦ୍ର ଚଳାଇଛନ୍ତି । ନିଜେ ନାନା ପୁରାଣ ଓ ଆଧ୍ୟାତ୍ମିକ ଗ୍ରନ୍ଥ ପାଠ କରି ତାର ଉପକାରିତା ଜାଣିବା ପରେ ସେ କୁନି କୁନି ପିଲାମାନଙ୍କୁ ଏ ନେଇ ଶିକ୍ଷା ପ୍ରଦାନ କରିବା ପାଇଁ ଚିନ୍ତା କରିଥିଲେ । ତାଙ୍କ ଅନୁଷ୍ଠାନରେ ୬ ବର୍ଷରୁ ୧୭ ବର୍ଷ ପର୍ଯ୍ୟନ୍ତ ବିଦ୍ୟାର୍ଥୀ ରହିଛନ୍ତି । ତେବେ ଏଠାରେ ପିଲାମାନଙ୍କୁ କେବଳ ଆଧ୍ୟାତ୍ମିକ ଶିକ୍ଷା ଦିଆଯାଉନି ବରଂ ପରିବେଶ ସୁରକ୍ଷା ଏବଂ ଯତ୍ନ ନେବାର କୌଶଳ ମଧ୍ୟ ଶିଖାଉଛନ୍ତି ସନ୍ଧ୍ୟାରାଣୀ। ଗାଁ ପରିଷ୍କାର କରିବା ଏବଂ ପଲିଥିନ ମୁକ୍ତ ରଖିବା କାମରେ ଲାଗିଛନ୍ତି ପିଲାମାନେ ।