ଭାରତର ସର୍ବବୃହତ ଅଗ୍ରଣୀ ଆଇଟି ସେବା କମ୍ପାନୀ ଟିସିଏସକୁ ନେଇ ଆସିଛି ବଡ଼ ଖବର। ପ୍ରଥମେ ୧୨ ହଜାର କର୍ମଚାରୀଙ୍କୁ ଛଟେଇ ପରେ ଏବେ ବରିଷ୍ଠ କର୍ମଚାରୀଙ୍କ ନିଯୁକ୍ତି ଏବଂ ଦରମା ବୃଦ୍ଧି ଉପରେ ରୋକ ଲଗାଇଛି ଟିସିଏସ।

TCS ଚଳିତ ବର୍ଷ ୧୨,୨୬୧ କର୍ମଚାରୀଙ୍କ ଛଟେଇ ଘୋଷଣା କରିଛି, ଯାହା ଏହାର ମୋଟ ବିଶ୍ୱ କର୍ମଚାରୀଙ୍କ ଦୁଇ ପ୍ରତିଶତ। ଏହି ପଦକ୍ଷେପ ମଧ୍ୟମ ଏବଂ ବରିଷ୍ଠ ସ୍ତରର କର୍ମଚାରୀଙ୍କ ଉପରେ ସର୍ବାଧିକ ପ୍ରଭାବ ପକାଇବ। ଜୁନ୍ ୩୦, ୨୦୨୫ ସୁଦ୍ଧା TCS କର୍ମଚାରୀଙ୍କ ମୋଟ ସଂଖ୍ୟା ୬,୧୩,୦୬୯ ଥିଲା। ସଦ୍ୟ ସମାପ୍ତ ଜୁନ୍ ତ୍ରୈମାସିକରେ, ଏହାର କର୍ମଚାରୀ ସଂଖ୍ୟା ୫,୦୦୦ ବୃଦ୍ଧି କରିଥିଲା। 

TCS ରବିବାର ଏକ ବିବୃତ୍ତିରେ କହିଛି ଯେ ଛଟେଇ ନିଷ୍ପତ୍ତି ଏକ 'ଭବିଷ୍ୟତ ପାଇଁ ପ୍ରସ୍ତୁତ ସଂଗଠନ' ହେବା ପାଇଁ ଏକ ବ୍ୟାପକ ରଣନୀତିର ଅଂଶ। ଏହାର କେନ୍ଦ୍ରରେ ପ୍ରଯୁକ୍ତିବିଦ୍ୟାରେ ନିବେଶ, କୃତ୍ରିମ ବୁଦ୍ଧିମତ୍ତା (AI) ଗ୍ରହଣ, ବଜାର ବିସ୍ତାର ଏବଂ କର୍ମଚାରୀ ପୁନର୍ଗଠନ ରହିଛି। ଟାଟା ଗ୍ରୁପ୍ କମ୍ପାନୀ କହିଛି ଯେ TCS ଏକ ଭବିଷ୍ୟତ ପାଇଁ ପ୍ରସ୍ତୁତ ସଂଗଠନ ହେବା ଆଡ଼କୁ ଅଗ୍ରସର ହେଉଛି। ଏଥିରେ ନବସୃଜନଶୀଳ ପ୍ରଯୁକ୍ତିବିଦ୍ୟା କ୍ଷେତ୍ରରେ ନିବେଶ, ନୂତନ ବଜାରରେ ପ୍ରବେଶ, ଗ୍ରାହକ ଏବଂ ନିଜ ପାଇଁ AIର ବୃହତ ପରିମାଣର ବ୍ୟବହାର, ଏହାର ସହଭାଗୀତାକୁ ଗଭୀର କରିବା, ପରବର୍ତ୍ତୀ ପିଢ଼ିର ଭିତ୍ତିଭୂମି ନିର୍ମାଣ ଏବଂ ଏହାର କର୍ମଚାରୀ ମଡେଲକୁ ପୁନର୍ଗଠନ ସମେତ ଅନେକ ମୋର୍ଚ୍ଚାରେ ରଣନୈତିକ ପଦକ୍ଷେପ ଅନ୍ତର୍ଭୁକ୍ତ। 

କମ୍ପାନୀ ଏକ କଡ଼ା ନୀତି ଜାରି କରିଛି, ଯେଉଁଥିରେ ବର୍ତ୍ତମାନ କୌଣସି ପ୍ରୋଜେକ୍ଟରେ ନିୟୋଜିତ ନଥିବା (ବେଞ୍ଚରେ ଥିବା) କର୍ମଚାରୀଙ୍କୁ ୩୫ ଦିନ ମଧ୍ୟରେ ଲାଭଜନକ ପ୍ରୋଜେକ୍ଟ ପାଇଁ ନିଯୁକ୍ତି ଖୋଜିବାକୁ କୁହାଯାଇଛି, ନଚେତ୍ ସେମାନଙ୍କୁ କମ୍ପାନୀ ଛାଡ଼ିବାକୁ ପଡ଼ିବ। ହାଇଦ୍ରାବାଦ, ପୁଣେ, ଚେନ୍ନାଇ ଓ କୋଲକାତା ଆଦି ସହରରେ ଏଭଳି କର୍ମଚାରୀଙ୍କୁ ବାହାର କରିବା ପ୍ରକ୍ରିୟା ଆରମ୍ଭ ହୋଇଛି। ଏହା ସହିତ, ଲାଟେରାଲ ହାୟାର ପାଇଁ ଅନବୋର୍ଡିଂ ବିଳମ୍ବ ୬୫ ଦିନରୁ ଅଧିକ ହୋଇଛି।

ରିପୋର୍ଟ ଅନୁଯାୟୀ, ଏହି ପଦକ୍ଷେପ ପରିଚାଳନା ଖର୍ଚ୍ଚ ହ୍ରାସ କରିବାର ଏକ ଅଂଶ। ଜଣେ ବରିଷ୍ଠ ଆଇଟି ବିଶ୍ଲେଷକଙ୍କ ମତରେ, ମଧ୍ୟମ ଓ ବରିଷ୍ଠ ସ୍ତରର ଛଟେଇ ମାଧ୍ୟମରେ ଟିସିଏସ ବାର୍ଷିକ ୩୦୦-୪୦୦ ମିଲିୟନ ଡଲାର (ପ୍ରାୟ ୨,୪୦୦-୩,୬୦୦ କୋଟି ଟଙ୍କା) ସଞ୍ଚୟ କରିପାରିବ, ଯାହା ମାର୍ଜିନରେ ୧୦୦-୧୫୦ ବେସିସ ପଏଣ୍ଟ ବୃଦ୍ଧି କମାଇବ। ତଥାପି, ଟିସିଏସର ସିଇଓ କହିଛନ୍ତି ଯେ ଛଟେଇ ପ୍ରକ୍ରିୟା ଧୀରେ ଧୀରେ କାର୍ଯ୍ୟକାରୀ ହେବ।