କଟକ: ରାଜ୍ୟସଭା ନିର୍ବାଚନ ବେଳେ ଯେଉଁ ନିଷ୍ପତ୍ତି ନିଆଯାଇଛି, ତାହା ସମ୍ପୂର୍ଣ୍ଣ ଠିକ୍ ଅଛି । କଟକକୁ କିଏ କଳଙ୍କିତ କରୁଛନ୍ତି, ତାହା ସମସ୍ତେ ଜାଣନ୍ତି । ସେଥିରେ ଆଉ ଆଲୋଚନା କରିବାର କିଛି ଆବଶ୍ୟକତା ନାହିଁ କହିଛନ୍ତି କଟକ-ବାରବାଟୀ ବିଧାୟିକା ସୋଫିଆ ଫିର୍ଦ୍ଦୋସ । 

ରାଜ୍ୟସଭା ନିର୍ବାଚନ ନିଷ୍ପତ୍ତି ଏବଂ କଟକକୁ କଳଙ୍କିତ କରିବାର ଯେଉଁ ଅଭିଯୋଗ ଆସିଛି ତାହା ଉପରେ କଡ଼ା ପ୍ରତିକ୍ରିୟା ରଖିଛନ୍ତି ବିଧାୟିକା ସୋଫିଆ । ସେ ନାଁ ନଧରି ପରୋକ୍ଷରେ କଟକ ମେୟର ସୁବାସ ସିଂଙ୍କୁ ଟାର୍ଗେଟ୍ କରିଛନ୍ତି । ରାଜ୍ୟସଭା ନିର୍ବାଚନକୁ ଶେଷ ହେବାର  ୧୦ ଦିନ ଗଲାଣି କିନ୍ତୁ ରାଜ୍ୟସଭାରେ ଅଟକି ରହିଛନ୍ତି । କଟକବାସୀ ଜାଣିଛନ୍ତି ସେହି ସମୟର ନିଷ୍ପତ୍ତି ଠିକ୍ ଥିଲା । ସେଥିପାଇଁ ଦୁଇ ଦିନ ପୂର୍ବରୁ ଖୋଲାଖୋଲି କଟକବାସୀଙ୍କୁ ତାଙ୍କ ନିଷ୍ପତ୍ତି ସମ୍ପର୍କରେ ଜଣାଇଥିଲେ । ତେଣୁ ଏଥିରେ ଆଲୋଚନା କରିବାର ଆଉ ଆବଶ୍ୟକତା ନାହିଁ । କଟକକୁ କିଏ କଳଙ୍କିତ କରିଛନ୍ତି ସିଏ (ସୁବାସ ସିଂ) ଠିକ୍ ଜାଣିଛନ୍ତି । ସିଏମସି ଏବେ ଦୁର୍ନୀତିଗ୍ରସ୍ତ । କଟକ ଅନେକ ଅସୁବିଧା ରହିଛି । ଅଳିଆ ଆବର୍ଜନା ଠାରୁ ଆରମ୍ଭ କରି ନାଳ ନର୍ଦ୍ଦମା ଏବଂ ବକ୍ସ ଡ୍ରେନ୍ ସମସ୍ୟା ରହିଛି । କଟକକୁ ସଫା ସୁତୁରା ରଖିବା ତାଙ୍କର ପ୍ରଥମ କାମ । ସେ ଦିଗରେ ସିଏ କାମ କରିବା ଉଚିତ । ତେଣୁ ତାଙ୍କ କଥାକୁ ସୋଫିଆ କୌଣସି ଗୁରୁତ୍ୱ ଦେଉ ନ ଥିବା କହିଛନ୍ତି ସୋଫିଆ ଫିର୍ଦ୍ଦୋସ । 

ଉଲ୍ଲେଖ ଯୋଗ୍ୟ, ରାଜ୍ୟସଭା ନିର୍ବାଚନରେ କ୍ରସ ଭୋଟିଂ କରିଥିବା କଟକର ତିନି ବିଧାୟକ ସୌଭିକ ବିଶ୍ୱାଳ, ସୋଫିଆ ଫିର୍ଦ୍ଦୋସ ଏବଂ ଦେବୀ ରଞ୍ଜନ ତ୍ରିପାଠୀଙ୍କ କୁଶପୁତ୍ତଳିକା ଦାହ କରାଯାଇଥିଲା । ଏମାନେ କଟକକୁ କଳଙ୍କିତ କରିଥିବା ଅଭିଯୋଗ ହୋଇଥିଲା ।