ମୟୂରଭଞ୍ଜ : ଶିମିଳିପାଳ ଅଭୟାରଣ୍ୟ ଭିତରେ ପୁଣି ଅଫିମ ମାଫିଆ ସକ୍ରିୟ ହୋଇଛନ୍ତି। ଯାହା ଫଳରେ ଲକ୍ଷାଧିକ ଟଙ୍କାର ଅଫିମ ଚାଷକୁ ନଷ୍ଟ କରିଛି ଯଶିପୁର ପୋଲିସ । କିଛି ଦିନ ପୂର୍ବରୁ ଠାକୁରମୁଣ୍ଡା ପୋଲିସ୍ ଓ ଅବକାରୀ ବିଭାଗ ଦ୍ଵାରା ଶିମିଳିପାଳ ଅଭୟାରଣ୍ୟ ଭିତରେ ଚାଲିଥିବା କୋଟି କୋଟି ଟଙ୍କାର ଅଫିମ ଚାଷ ନଷ୍ଟ କରାଯାଇଥିବା ବେଳେ ଶନିବାର ପୁଣି ଅଫିମ ଚାଷ ନଷ୍ଟ କରିଛି ଯଶିପୁର ପୋଲିସ । 

କୌଣସି ସୂତ୍ରରୁ ଖବର ପାଇ ଶିମିଳିପାଳ ଅଭୟାରଣ୍ୟ ଭିତରେ ଥିବା ବରେହିପାଣି ଗ୍ରାମ ପଞ୍ଚାୟତର ଅସନବଣୀ ଗାଁରେ ଚଢ଼ାଉ କରି ଲକ୍ଷାଧିକ ଟଙ୍କାର ଅଫିମ ଚାଷ ନଷ୍ଟ କରିଛି ଯଶିପୁର ପୋଲିସ, ଏ ନେଇ ଯଶିପୁର ଥାନାରେ ଏକ ମାମଲା ରୁଜ୍ଜୁ କରି ଅଧିକ ତଦନ୍ତ କରିବା ସହ ଅଫିମ ମାଫିଆ ମାନଙ୍କୁ ଧରିବା ପାଇଁ ପ୍ରୟାସ ଜାରି ରଖିଛି ପୋଲିସ୍ । ତେବେ ବନବିଭାଗର ନାକତଳେ ଏହି ଅଫିମ ଚାଷ ଚାଲିଥିବା ବେଳେ ବନବିଭାଗର ଅଧିକାରୀମାନେ ଏହାର ଟେର୍ ପାଉ ନାହାଁନ୍ତି ଯାହା ଏବେ ଚର୍ଚ୍ଚାର ବିଷୟ ପାଲଟିଛି ।