ଯାଜପୁର: ଯାଜପୁର ଜିଲ୍ଲା ପାଣିକୋଇଲି ଥାନା ପୁରୁଣା ଟୋଲଗେଟ ନିକଟରେ ଶନିବାର ସକାଳୁ ଏକ ମର୍ମନ୍ତୁଦ ସଡ଼କ ଦୁର୍ଘଟଣା ହୋଇଛି । ବାପା ମା’ ଛେଉଁଣ୍ଡ ହୋଇଯାଇଛି କଅଁଳ ଶିଶୁ ପୁତ୍ର । ପିଲା ଆଖି ଆଗରେ ଚାଲିଗଲେ ବାପା ମା’ ।  

ମିଳିଥିବା ପ୍ରାଥମିକ ସୂଚନା ମୁତାବକ, ଗୋଟିଏ ବାଇକରେ ବାପା ମା’ ଓ ତାଙ୍କର ୪ ବର୍ଷର ଶିଶୁପୁତ୍ର ଏକ ବାଇକ ଯୋଗେ କୁଆଖିଆ ଆଡୁ ପାଣିକୋଇଲି ଅଭିମୁଖେ ଯାଉଥିଲେ । ପୁରୁଣା ଟୋଲଗେଟ ନିକଟରେ ବାଇକଟିକୁ ଏକ ଅଜଣା ଗାଡ଼ି ଧକ୍କା ଦେଇଥିଲା । ଫଳରେ ଦୁର୍ଘଟଣା ସ୍ଥଳରେ ମା’ଙ୍କର ମୃତ୍ୟୁ ହୋଇଯାଇଛି । ସ୍ଥାନୀୟ ଲୋକ ମହିଳାଙ୍କ ସ୍ୱାମୀକୁ ଗୁରୁତର ଅବସ୍ଥାରେ ଉଦ୍ଧାର କରି ଯାଜପୁର ମୁଖ୍ୟ ଚିକିତ୍ସାଳୟରେ ଭର୍ତ୍ତି କରିଥିଲେ । ମାତ୍ର ଡାକ୍ତର ତାଙ୍କୁ ମୃତ ଘୋଷଣା କରିଛନ୍ତି । ମୃତକମାନଙ୍କ ପରିଚୟ ମିଳିପାରି ନାହିଁ । 

ଏହି ଦୁର୍ଘଟଣାରୁ ଶିଶୁ ପୁତ୍ରଟି ଅଳ୍ପକେ ମୃତ୍ୟୁ ମୁଖରୁ ରକ୍ଷା ପାଇ ଯାଇଛି । ପାଣିକୋଇଲି ଥାନା ପୋଲିସ ଘଟଣା ସ୍ଥଳରେ ପହଁଚି ଶିଶୁକୁ ନିଜ ହେପାଜତକୁ ନେଇଛି । ସେପଟେ ମୃତକଙ୍କ ପରିବାର ଲୋକଙ୍କୁ ସମ୍ପର୍କ କରିବାକୁ ପୋଲିସ ଉଦ୍ୟମ ଆରମ୍ଭ କରିଛି ।

ଅଳ୍ପକେ ବର୍ତ୍ତିଯାଇଥିବା ୪ ବର୍ଷର ଶିଶୁପୁତ୍ରକୁ ପାଣିକୋଇଲି ପୁଲିସ ହେପାଜତକୁ ନେଇ ଥାନାରେ ରଖିଛି। ଏଯାଏ ପରିଚୟ ଅସ୍ପଷ୍ଟ ରହିଛି। ପାଣିକୋଇଲି ପୁଲିସ ଶବକୁ ଜବତ କରି ବ୍ୟବଚ୍ଛେଦ ନିମନ୍ତେ ପଠାଇ ଘଟଣା ସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛନ୍ତି ।