ଭୁବନେଶ୍ୱର: ରାଜ୍ୟ କଂଗ୍ରେସ ଭବନ ସମ୍ମୁଖରେ ହାଇଡ୍ରାମା ଦେଖିବାକୁ ମିଳିଛି । ଦଳରେ ଲୋକେ ମିଶିବାକୁ ଚାହୁଁଥିବାବେଳେ ଗ୍ରହଣ କରୁନି କଂଗ୍ରେସ । ତୁଳସୀ ଗଣନାଟ୍ୟର ମାଲିକ ଅନନ୍ତ ନାରାୟଣ ଧଳ ଓରଫ୍ ନାଣ୍ଡୁ ବୁଧବାର ନିଜ ସମର୍ଥକଙ୍କ ସହିତ କଂଗ୍ରେସରେ ମିଶିବାକୁ ଆସିଛନ୍ତି । କିନ୍ତୁ କଂଗ୍ରେସ ଭବନ ଗେଟ୍ ନ ଖୋଲିବାକୁ ନେଇ ଅସନ୍ତୋଷ ବ୍ୟକ୍ତ କରିଛନ୍ତି । ସେପଟେ ନାଣ୍ଡୁ ଜଣେ ଅପରାଧ ଶ୍ରେଣୀର ବ୍ୟକ୍ତି ବୋଲି କହିଛନ୍ତି ପିସିସି ସଭାପତି ଭକ୍ତ ଚରଣ ଦାସ । 

କଂଗ୍ରେସ ଭବନରେ ମିଶ୍ରଣ ପର୍ବକୁ ନେଇ ରୋଚକ ସ୍ଥିତି ଦେଖିବାକୁ ମିଳିଛି । ପୂର୍ବ ସୂଚନା ମୁତାବକ ନାଣ୍ଡୁ ଧଳ ନିଜ ସମର୍ଥକଙ୍କ ସହିତ ଆସି ପହଁଚି ଥିଲେ । କିନ୍ତୁ ନାଣ୍ଡୁଙ୍କ ପାଇଁ ଗେଟ୍ ଖୋଲି ନ ଥିଲା । ଏପରିକି ପୋଲିସ ମୁତୟନ ହୋଇଥିଲେ । ଫାଟକରେ ତାଲା ପକାଇଯାଇଥିଲା । କାହାରିକୁ ଭିତରକୁ ଯିବାକୁ ଅନୁମତି ମିଳି ନ ଥିଲା । ଏପରିକି ପିସିସି ସଭାପତି ଭକ୍ତ ଚରଣ ଦାସ ମଧ୍ୟ କାର୍ଯ୍ୟାଳୟକୁ ଆସିନଥିଲେ । ଏହା ପରେ ପ୍ରତିକ୍ରିୟା ରଖି ନାଣ୍ଡୁ କହିଛନ୍ତି, ତାଙ୍କର ଭକ୍ତ ଦାସଙ୍କ ସହିତ ଆଲୋଚନା ହୋଇଥିଲା । ସେ କୌଣସି ଦଳୀୟ ଟିକେଟ୍ ଆଶାରେ ମିଶିବାକୁ ଆସିନାହାଁନ୍ତି । କଂଗ୍ରେସ ସହିତ ପୂର୍ବରୁ ଅଛନ୍ତି, କେବଳ ଦଳକୁ ଆଗକୁ ନେବାକୁ ସେ ମିଶିବାକୁ ଇଚ୍ଛା କରୁଛନ୍ତି । ଯଦି ଭୁବନେଶ୍ୱରରେ ସାମିଲ ନ କରାଯାଏ ସିଏ ଦିଲ୍ଲୀ ଯାଏ ଯିବେ । ରାହୁଲ ଗାନ୍ଧୀଙ୍କୁ ଦେଖା କରିବେ ଏବଂ ସେ ସେମାନଙ୍କ କଥା ବୁଝିବେ ବୋଲି ଚେତାବନୀ ଦେଇଛନ୍ତି । କେବଳ ଗାନ୍ଧୀଙ୍କ ପ୍ରତିମୂର୍ତ୍ତିରେ ମାଲ୍ୟାର୍ପଣ କରି ଚାଲିଯିବେ ବୋଲି କହିଛନ୍ତି । କିନ୍ତୁ  ତାଙ୍କ ସମର୍ଥକମାନେ ମଧ୍ୟ ହୋହାଲ୍ଲା କରିଛନ୍ତି ।  

ସେପଟେ ପିସିସି ସଭାପତି ପ୍ରତିକ୍ରିୟା ରଖି କହିଛନ୍ତି ନାଣ୍ଡୁ ଧଳ ଜଣେ ଅପରାଧିକ ଚରିତ୍ରର ବ୍ୟକ୍ତି । ସେ କଂଗ୍ରେସର ସଦସ୍ୟ ହୋଇପାରିବେ ନାହିଁ । ସଦସ୍ୟତା ମଗା ଯାଏ, ଛଡ଼ାଇକି ନିଆଯାଏ ନାହିଁ । ରାହୁଲ ଗାନ୍ଧିଙ୍କ ପାଖକୁ ଯଦି ଯାଇପାରିବେ ଯାଆନ୍ତୁ । ମୁଁ କଂଗ୍ରେସ ଅଧ୍ୟକ୍ଷ ଭାବେ କହୁଛି, ତାଙ୍କୁ ଗ୍ରହଣ କରାଯିବନି ବୋଲି ସ୍ପଷ୍ଟ କରିଛନ୍ତି ଭକ୍ତ ଦାସ ।