ଆଜି ଝାଡ଼ଖଣ୍ଡରେ ପ୍ରଚାର କରିବେ ମୁଖ୍ୟମନ୍ତ୍ରୀ ମୋହନ ମାଝୀ। ଘାଟସିଲା ଉପନିର୍ବାଚନ ପାଇଁ ପ୍ରଚାର ମୈଦାନକୁ ଓହ୍ଲାଇବେ ମୋହନ। ବିଜେପି ପ୍ରାର୍ଥୀ ବାବୁଲାଲ ସୋରେନଙ୍କ ପାଇଁ ସେ ପ୍ରଚାର କରିବା ସହ ଆୟୋଜିତ ୨ଟି ଜନସଭାକୁ ସମ୍ବୋଧିତ କରିବେ ମୁଖ୍ୟମନ୍ତ୍ରୀ।

ମାଝୀ ଘାଟସିଲା ବ୍ଲକର ଗନ୍ଧନିଆହାଟ ଗ୍ରାଉଣ୍ଡ ଏବଂ ଗୁରାବନ୍ଧ ବ୍ଲକର ବାଲିଆପୋଷ ଫୁଟବଲ୍ ଗ୍ରାଉଣ୍ଡରେ ରାଲିକୁ ସମ୍ବୋଧିତ କରିବାର କାର୍ଯ୍ୟକ୍ରମ ରହିଛି, ଯାହା ଦଳୀୟ କର୍ମୀଙ୍କ ମଧ୍ୟରେ ନୂତନ ଶକ୍ତି ସଞ୍ଚାର କରିବ। ତାଙ୍କର ଏହି ଗସ୍ତ ବରିଷ୍ଠ ନେତା ଏବଂ ତୃଣମୂଳ ସ୍ତରର ସମର୍ଥକମାନଙ୍କ ମଧ୍ୟରେ ଉତ୍ସାହ ଆଣିଦେଇଛି, ଯେଉଁମାନେ ଏନଡିଏ ପ୍ରାର୍ଥୀଙ୍କୁ ସମର୍ଥନ କରିବା ପାଇଁ ଜନସାଧାରଣଙ୍କ ସହିତ ସକ୍ରିୟ ଭାବରେ ଜଡିତ ଅଛନ୍ତି।

ଅଗଷ୍ଟ ମାସରେ ଝାଡ଼ଖଣ୍ଡ ପୂର୍ବତନ ବିଧାୟକ ରାମଦାସ ସୋରେନଙ୍କ ମୃତ୍ୟୁ ପରେ ଏହି ଉପନିର୍ବାଚନ ଅନୁଷ୍ଠିତ ହୋଇଛି। ବିଜେପି ଝାଡ଼ଖଣ୍ଡର ପୂର୍ବତନ ମୁଖ୍ୟମନ୍ତ୍ରୀ ଚମ୍ପାଇ ସୋରେନଙ୍କ ପୁଅ ବାବୁଲାଲ ସୋରେନଙ୍କୁ ପ୍ରାର୍ଥୀ କରିଛି। ଏଠାରେ ଉପନିର୍ବାଚନ ନଭେମ୍ବର ୧୧ ​​ତାରିଖରେ ହେବାକୁ ଥିବା ବେଳେ  ଭୋଟ ଗଣତି ନଭେମ୍ବର ୧୪ରେ ହେବ।

ଓଡ଼ିଶାର ପଡୋଶୀ ରାଜ୍ୟ ଝାଡ଼ଖଣ୍ଡ ହୋଇଥିବାରୁ ଏଠାରେ ମୋହନଙ୍କ କ୍ରେଜ୍ ରହିଛି । ସେଥିପାଇଁ ହାଇକମାଣ୍ଡ ମୋହନଙ୍କ କାନ୍ଧରେ ପ୍ରଚାର ଦାୟିତ୍ଵ ରଖିଛି। ସେପଟେ ନୂଆପଡାରେ ଅନୁଷ୍ଠିତ ଉପ ନିର୍ବାଚନ ପାଇଁ ମୁଖମନ୍ତ୍ରୀ ଆସନ୍ତା ୭ତାରିଖରୁ ମଇଦାନକୁ ଓହ୍ଲାଇବାର କାର୍ଯ୍ୟକ୍ରମ ରହିଛି। ପୂର୍ବରୁ ମଧ୍ୟ ଯାଇ ମୋହନ ପ୍ରାର୍ଥୀ ଜୟ ଢୋଲକିଆଙ୍କ ପାଇଁ ଜନମତ ସଂଗ୍ରହ କରିଥିବା ବେଳେ ପ୍ରଚାର ଶେଷ ଆଡ଼କୁ ନିଜର ଜଲୱା ଦେଖିବେ ମୋହନ।

ଅଧିକ ପଢନ୍ତୁ: ବିହାର ନିର୍ବାଚନ ମଝିରେ କର୍ଣ୍ଣାଟକରେ ଚାଲିଛି କଣ, ସିଏମ ସିଦ୍ଧରମୈୟାଙ୍କ ବୟାନରେ ବଢିଲା ସସପେନ୍ସ