ବାରିପଦା: ନେପାଳର ପ୍ରଳୟଙ୍କରୀ ବନ୍ୟାର ଛାତିଥରା ଅନୁଭୂତି ପରେ ଶେଷରେ ସୁରକ୍ଷିତ ଭାବେ ଓଡ଼ିଶା ଫେରିଛନ୍ତି ମୟୂରଭଞ୍ଜ ଜିଲ୍ଲା ବାରିପଦାର କୁଲସୁମ୍ ନିଗାର। ମୃତ୍ୟୁର ମୁହଁରୁ ଫେରି ନିଜ ଘରେ ପହଞ୍ଚିବା ପରେ ସେ ସେହି ବିଭୀଷିକାମୟ ମୁହୂର୍ତ୍ତର କାହାଣୀ ବଖାଣିଛନ୍ତି।

ବାରିପଦାର ୨୩ ନମ୍ବର ୱାର୍ଡ ନାଥସାହିସ୍ଥିତ ବାସଭବନକୁ ଫେରିବା ସହ ପରିବାରରେ ଖୁସିର ଲହରୀ ଖେଳିଯାଇଛି। ଦୀର୍ଘ ଆତଙ୍କ ଓ ଅନିଶ୍ଚିତତା ପରେ ଝିଅକୁ ସୁରକ୍ଷିତ ଦେଖି ପରିବାର ଲୋକଙ୍କ ଆଖିରେ ଖୁସିର ଲୁହ ଝରିପଡ଼ିଛି।

କୁଲସୁମ୍ କହିଛନ୍ତି, ହଠାତ୍ ଆସିଥିବା ବନ୍ୟା ଯୋଗୁଁ ସେମାନେ ଅନେକ ସମୟ ଧରି ଫସି ରହିଥିଲେ। ଚାରିଆଡ଼େ ପାଣିର ସୁଅ ଓ ଜୀବନ ବଞ୍ଚାଇବାର ସଂଘର୍ଷ ଆଜି ମଧ୍ୟ ତାଙ୍କୁ ଶିହରି ଉଠିବାକୁ ବାଧ୍ୟ କରୁଛି। ତେବେ ସମସ୍ତ ପ୍ରତିକୂଳ ପରିସ୍ଥିତିକୁ ଟପି ସେ ଓ ତାଙ୍କ ସହ ଯାଇଥିବା ଅନ୍ୟ ସାଥିମାନେ ସୁରକ୍ଷିତ ଭାବେ ଭାରତ ଫେରିଛନ୍ତି।

ଉଲ୍ଲେଖଯୋଗ୍ୟ, ନେପାଳରେ ଘଟିଥିବା ଭୟାବହ ବନ୍ୟାରେ ଅନେକ ଅଞ୍ଚଳ ଜଳମଗ୍ନ ହୋଇଥିବା ବେଳେ ସେଠାରେ ଫସି ରହିଥିବା ଓଡ଼ିଆଙ୍କୁ ଫେରାଇବା ପାଇଁ ଉଦ୍ୟମ ଜାରି ରହିଥିଲା। କୁଲସୁମଙ୍କ ସୁରକ୍ଷିତ ପ୍ରତ୍ୟାବର୍ତ୍ତନ ତାଙ୍କ ପରିବାର ସହ ସାରା ବାରିପଦା ପାଇଁ ଏକ ବଡ଼ ଆସ୍ୱସ୍ତିର ଖବର ହୋଇଛି।