ନୂଆଦିଲ୍ଲୀ: ରାଜଧାନୀ ଦିଲ୍ଲୀରେ ଆସନ୍ତା ସେପ୍ଟେମ୍ବର ୫ ତାରିଖରେ ‘କୋକ୍ରୋଚ୍ ଜନତା ପାର୍ଟି’ (CJP) ପକ୍ଷରୁ ହେବାକୁଥିବା ପ୍ରସ୍ତାବିତ ପଦଯାତ୍ରା ବା ମାର୍ଚ୍ଚକୁ ରୋକିବାକୁ ସୁପ୍ରିମକୋର୍ଟ ସ୍ପଷ୍ଟ ଭାବେ ମନା କରିଦେଇଛନ୍ତି। ଆଗାମୀ ସେପ୍ଟେମ୍ବର ୧୨-୧୩ରେ ହେବାକୁଥିବା ବ୍ରିକ୍ସ (BRICS) ଶିଖର ସମ୍ମିଳନୀ ପର୍ଯ୍ୟନ୍ତ ଏହି ମାର୍ଚ୍ଚକୁ ସ୍ଥଗିତ ରଖିବାକୁ ଆବେଦନରେ ଅନୁରୋଧ କରାଯାଇଥିଲା। କିନ୍ତୁ ସର୍ବୋଚ୍ଚ ଅଦାଲତ କହିଛନ୍ତି ଯେ, ଏଭଳି କୌଣସି ଠୋସ୍ କାରଣ ନାହିଁ ଯାହାଦ୍ୱାରା କୌଣସି ଅପ୍ରୀତିକର ପରିସ୍ଥିତି ସୃଷ୍ଟି ହେବ ବୋଲି ଆଶ୍ଚର୍ଯ୍ୟ କରାଯାଇପାରିବ।

CJI ସୂର୍ଯ୍ୟକାନ୍ତଙ୍କ ଗୁରୁତ୍ୱପୂର୍ଣ୍ଣ ମନ୍ତବ୍ୟ

ଏହି ମାମଲାର ଶୁଣାଣି କରି ଭାରତର ପ୍ରଧାନ ବିଚାରପତି ସୂର୍ଯ୍ୟକାନ୍ତ କହିଛନ୍ତି ଯେ, ସମ୍ପୃକ୍ତ କର୍ତ୍ତୃପକ୍ଷମାନେ ଦେଶର ଆଇନଶୃଙ୍ଖଳା ପରିସ୍ଥିତିକୁ ସୁଚାରୁରୂପେ ବଜାୟ ରଖିବେ ବୋଲି ଆଶା କରାଯାଏ। ଏଥିସହ ସମସ୍ତ ପକ୍ଷ ଶାନ୍ତପୂର୍ଣ୍ଣ, ଏବଂ ଆଇନଗତ ପରିସର ମଧ୍ୟରେ ରହି ଆଚରଣ କରିବେ ବୋଲି କୋର୍ଟ ଆଶା ପ୍ରକଟ କରିଛନ୍ତି।

ଆବେଦନକାରୀ ପୁନର୍ବାର କିଛି ଅପ୍ରୀତିକର ପରିସ୍ଥିତି ସୃଷ୍ଟି ହୋଇପାରେ ବୋଲି ଆଶଙ୍କା ପ୍ରକାଶ କରି କୋର୍ଟଙ୍କ ହସ୍ତକ୍ଷେପ ଲୋଡ଼ିଥିଲେ। ମାତ୍ର ସୁପ୍ରିମକୋର୍ଟ ତୁରନ୍ତ ହସ୍ତକ୍ଷେପ କରିବାକୁ ମନା କରିଦେବା ସହ ଆବେଦନକାରୀଙ୍କୁ ଏହି ପ୍ରସଙ୍ଗରେ କେନ୍ଦ୍ର ସରକାରଙ୍କ ସମ୍ମୁଖରେ ନିଜର ପକ୍ଷ ରଖିବାକୁ ପରାମର୍ଶ ଦେଇଛନ୍ତି। ଏହାସହ ଆବେଦନର ଏକ କପି ସଲିସିଟର ଜେନେରାଲଙ୍କୁ ପ୍ରଦାନ କରିବାକୁ କୁହାଯାଇଛି। ଆସନ୍ତା ସେପ୍ଟେମ୍ବର ୧୦ ତାରିଖରେ ମୁଖ୍ୟ ମାମଲା ସହିତ ଏହି ଆବେଦନର ମଧ୍ୟ ପରବର୍ତ୍ତୀ ଶୁଣାଣି କରାଯିବ। 

CJP କାହିଁକି କରୁଛି ଏହି ପଦଯାତ୍ରା ?

ଅଭିଜିତ୍ ଦୀପକେଙ୍କ ନେତୃତ୍ୱାଧୀନ ଦଳ ‘CJP’ କେନ୍ଦ୍ର ସରକାରଙ୍କ ବିରୁଦ୍ଧରେ ପ୍ରତିଶ୍ରୁତି ଭଙ୍ଗ କରିଥିବା ଅଭିଯୋଗ ଆଣିଛି। ଗତ ଅଗଷ୍ଟ ୨୪ ତାରିଖରେ ଦଳ ପକ୍ଷରୁ କୁହାଯାଇଥିଲା ଯେ, ଗତ ଜୁଲାଇ ୨୫ ତାରିଖରେ ଦେଶର ଯୁବବର୍ଗଙ୍କୁ ଦିଆଯାଇଥିବା ପ୍ରତିଶ୍ରୁତିଗୁଡ଼ିକୁ ସରକାର ପୂରଣ କରିନାହାନ୍ତି। ବିଶେଷ କରି ଛାତ୍ରଛାତ୍ରୀ ଏବଂ ଆନ୍ଦୋଳନକାରୀଙ୍କ ବିରୁଦ୍ଧରେ ରୁଜୁ ହୋଇଥିବା ମାମଲା ବା ଏଫ୍.ଆଇ.ଆର୍. ପ୍ରତ୍ୟାହାର କରାଯିବା ନେଇ ଦିଆଯାଇଥିବା ପ୍ରତିଶ୍ରୁତିକୁ ନେଇ ସରକାର ଚୁପ୍ ରହିଛନ୍ତି।