ଉତ୍ତରାଖଣ୍ଡ ନିବାସୀ ଟିଭି ଶୋ ଇଣ୍ଡିଆନ୍ ଆଇଡଲ ସିଜିନ୍ ୧୨ର ବିଜେତା ପବନଦୀପ ଭୟଙ୍କର ସଡ଼କ ଦୁର୍ଘଟଣାରେ ଗୁରୁତର ଆହତ ହୋଇଛନ୍ତି। କୁହାଯାଉଛି ଯେ, ଉତ୍ତରାଖଣ୍ଡରୁ ନୋଏଡ଼ା ଯାଉଥିବା ସମୟରେ ଦିଲ୍ଲୀ-ଲକ୍ଷ୍ନୌ ଜାତୀୟ ରାଜପଥରେ ତାଙ୍କ କାର ଭୟଙ୍କର ଦୁର୍ଘଟଣାର ସମ୍ମୁଖୀନ ହୋଇଛି। ତାଙ୍କର ଦୁଇ ଜଣ ସାଥୀ ମଧ୍ୟ ଏହି ଦୁର୍ଘଟଣାରେ ଆହତ ହୋଇଛନ୍ତି। ଏକ ଘରୋଇ ହସ୍ପିଟାଲରେ ପ୍ରାଥମିକ ଚିକିତ୍ସା ପରେ ତିନି ଜଣଙ୍କୁ ନୋଏଡାକୁ ସ୍ଥାନାନ୍ତର କରାଯାଇଛି। ପବନଦୀପ ରାଜନଙ୍କ ଅବସ୍ଥା ସଙ୍କଟାପନ୍ନ ବୋଲି କୁହାଯାଉଛି। ତାଙ୍କର ଉଭୟ ଗୋଡ ଏବଂ ହାତରେ ଫ୍ରାକ୍ଚର ହୋଇଛି।

ଗଜରୌଲାରେ, ରାଜପଥର ସିଓ ଅଫିସ ସାମ୍ନାରେ ଥିବା କଟରେ ଠିଆ ହୋଇଥିବା ଏକ କ୍ୟାଣ୍ଟରକୁ ପଛରୁ ଏକ କାର ଧକ୍କା ଦେଇଥିଲା। ଡ୍ରାଇଭର ନିଦ ଲାଗିଯିବାରୁ ଏହି ଦୁର୍ଘଟଣା ଘଟିଥିଲା। କାରଟି ବହୁ ପରିମାଣରେ କ୍ଷତିଗ୍ରସ୍ତ ହୋଇଥିଲା ଏବଂ ଗାୟକ ପବନଦୀପ ରାଜନଙ୍କ ଉଭୟ ଗୋଡ ଏବଂ ହାତରେ ଫ୍ରାକ୍ଚର ହୋଇଥିଲା। ଡ୍ରାଇଭର ଏବଂ ତାଙ୍କ ସାଥୀ ମଧ୍ୟ ଆହତ ହୋଇଛନ୍ତି। 

ଦୁର୍ଘଟଣା ସମ୍ପର୍କରେ ସୂଚନା ପାଇବା ପରେ ପୋଲିସ ଘଟଣାସ୍ଥଳରେ ପହଞ୍ଚି କ୍ଷତିଗ୍ରସ୍ତ ଗାଡ଼ିଗୁଡ଼ିକୁ ରାସ୍ତାରୁ ହଟାଇବା ସହିତ ଆହତମାନଙ୍କୁ ତୁରନ୍ତ ଏକ ଘରୋଇ ହସ୍ପିଟାଲରେ ଭର୍ତ୍ତି କରିଥିଲା। ସେଠାରେ ପ୍ରାଥମିକ ଚିକିତ୍ସା ପରେ, ପବନଦୀପ ରାଜନ ଏବଂ ତାଙ୍କ ସାଥୀଙ୍କୁ ନୋଏଡାକୁ ରେଫର କରାଯାଇଥିଲା। ପବନଦୀପଙ୍କ ଅବସ୍ଥା ଏବେ ସଙ୍କଟାପନ୍ନ ରହିଛି। ଏପରି ପରିସ୍ଥିତିରେ ଉତ୍ତରାଖଣ୍ଡବାସୀ ତାଙ୍କ ସୁସ୍ଥତା କାମନା କରି ପ୍ରାର୍ଥନା କରିଛନ୍ତି। ମୁଖ୍ୟମନ୍ତ୍ରୀ ପୁଷ୍କର ସିଂ ଧାମିଙ୍କ ଠାରୁ ଆରମ୍ଭ କରି ପବନଦୀପଙ୍କ ପ୍ରଂଶସକ ସମସ୍ତେ ଆଶୁ ଆରୋଗ୍ୟ କାମନା କରିଛନ୍ତି।