କେନ୍ଦ୍ରାପଡ଼ା: ଲାଞ୍ଚ ନେଉଥିବାବେଳେ ଜିଲ୍ଲା ଖାଦ୍ୟ ନିରାପତ୍ତା ଅଧିକାରୀଙ୍କୁ ଭିଜିଲାନ୍ସ ଧରିଛି । ସିଡିଏମଓରେ କାର୍ଯ୍ୟରତ ଖାଦ୍ୟ ନିରାପତ୍ତା ଅଧିକାରୀ ବିଭାଷ ମଜୁମଦାରଙ୍କୁ ଭିଜିଲାନ୍ସ ଲାଞ୍ଚ ଟଙ୍କା ସହିତ ଗିରଫ କରିଛି । 

ଗତ ଜୁଲାଇ ୩୦ ତାରିଖରେ ଖାଦ୍ୟ ନିରାପତ୍ତା ଅଧିକାରୀ ବିଭାଷ  ମଜୁମଦାର କେନ୍ଦ୍ରାପଡ଼ା-କଟକ ମୁଖ୍ୟ ରାସ୍ତା ପାର୍ଶ୍ଵରେ ଜଣେ ବ୍ୟବସାୟୀଙ୍କ ଦୋକାନରେ ଅଚାନକ ଚଢାଉ କରିଥିଲେ । ଦୋକାନ ପାଇଁ ଲାଇସେନ୍ସ ଆବେଦନ ନିର୍ଦ୍ଦେଶ ଦେଇଥିଲେ । ନିର୍ଦ୍ଦେଶ ପରେ ସମ୍ପୃକ୍ତ ଦୋକାନୀ ଜଣକ ଗତ ଅଗଷ୍ଟ ୮ ତାରିଖରେ ଲାଇସେନ୍ସ ପାଇଁ ଆବେଦନ କରିଥିଲେ । କିନ୍ତୁ ଏ ପର୍ଯ୍ୟନ୍ତ ତାଙ୍କୁ କୌଣସି ଲାଇସେନ୍ସ ପ୍ରଦାନ କରାଯାଇ ନ ଥିଲା । ତେଣୁ ସେ ଖାଦ୍ୟ ସୁରକ୍ଷା ଅଧିକାରୀ ମଜୁମଦାରଙ୍କୁ ଭେଟି ତାଙ୍କ ଲାଇସେନ୍ସ ପ୍ରକ୍ରିୟାକରଣ କରିବାକୁ ଅନୁରୋଧ କରିଥିଲେ । 

କିନ୍ତୁ ଲାଇସେନ୍ସ ପ୍ରଦାନ ପାଇଁ ଖାଦ୍ୟ ନିରାପତ୍ତା ଅଧିକାରୀ ୫,୦୦୦ ଟଙ୍କା ଲାଞ୍ଚ ମାଗିଥିଲେ । ଅନ୍ୟ କୌଣସି ବିକଳ୍ପ ନ ପାଇ ଅଭିଯୋଗକାରୀ ଭିଜିଲାନ୍ସ ପ୍ରାଧିକରଣକୁ ତାଙ୍କ ନିର‌୍ୟ୍ୟାତନା ସମ୍ପର୍କରେ ଜଣାଇଥିଲେ । ଯୋଜନା ମୁତାବକ ସେ ସିଡିଏମଓଙ୍କୁ ଟଙ୍କା ଦେଉଥିବାବେଳେ ଭିଜିଲାନ୍ସ ଧରିଥିଲା । ତାଙ୍କ ନିକଟରୁ ୫,୦୦୦ ଟଙ୍କା ଜବତ କରାଯାଇଛି ।