ଭୁବନେଶ୍ୱର: ସ୍ୱଦେଶୀ କ୍ରୀଡ଼ା କେବଳ କ୍ରୀଡ଼ା ନୁହେଁ । ଏଗୁଡ଼ିକ ଆମ ସମ୍ପ୍ରଦାୟର ମାଟିରେ ମୂଳ ଥିବା ଦଳଗତ କାର୍ଯ୍ୟ, ସ୍ଥିରତା ଓ ପରିଚୟର ପ୍ରକାଶ ଥିଲା । ମୁମ୍ବାଇର ଜିଓ ୱାର୍ଲ୍ଡ ସେଣ୍ଟରରେ ଅନୁଷ୍ଠିତ ପ୍ରତିଷ୍ଠିତ ୱେଭ୍ସ-୨୦୨୫ - ବିଶ୍ୱ ଅଡିଓ ଭିଜୁଆଲ୍ ଏବଂ ମନୋରଞ୍ଜନ ସମ୍ମିଳନୀରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ କହିଛନ୍ତି । 

ଆଜିର ଆଲୋଚନା ଚକ୍ରରେ ଖେଳାଳି, ଗଣମାଧ୍ୟମ, ଫେଡେରେସନ ଏବଂ ସରକାରଙ୍କ ସମର୍ଥନରେ ଭାରତର ପାରମ୍ପରିକ କ୍ରୀଡାକୁ ଅଲିମ୍ପିକ୍ସ ସମେତ ଅନ୍ତର୍ଜାତୀୟ ମଞ୍ଚକୁ କିପରି ନିଆଯିବ ତାହା ଉପରେ ଗୁରୁତ୍ୱାରୋପ କରାଯାଇଛି । ମୁଖ୍ୟମନ୍ତ୍ରୀ ମୋହନ ମାଝୀ ଅଭିଭାଷଣରେ ଭାରତର ପାରମ୍ପରିକ ଖେଳର ସାଂସ୍କୃତିକ, ସାମାଜିକ ଏବଂ ବିଶ୍ୱସ୍ତରୀୟ ଗୁରୁତ୍ୱ ଉପରେ ଆଲୋକପାତ କରିଛନ୍ତି । ସେ କବାଡି ଏବଂ ଖୋ-ଖୋ ସହିତ ତାଙ୍କର ପ୍ରାରମ୍ଭିକ କ୍ରୀଡ଼ା ଅଭିଜ୍ଞତା ଉପରେ କହିଛନ୍ତି । କ୍ରୀଡା ବିକାଶରେ, ବିଶେଷକରି ପାରମ୍ପାରିକ ଖେଳ କ୍ଷେତ୍ରରେ ଓଡ଼ିଶାର ଅଗ୍ରଣୀ ଭୂମିକାକୁ ଗୁରୁତ୍ୱାରୋପ କରିଛନ୍ତି ମୁଖ୍ୟମନ୍ତ୍ରୀ । ଏଏମ୍/ଏନଏସ୍ ଇଣ୍ଡିଆ ସହଯୋଗରେ ପାରମ୍ପାରିକ ଖେଳ ଅର୍ଥାତ୍ ଖୋ-ଖୋ ପାଇଁ ଏକ ଉତ୍ସର୍ଗୀକୃତ ଉଚ୍ଚ ପ୍ରଦର୍ଶନ କେନ୍ଦ୍ର ପ୍ରତିଷ୍ଠା କରିବାରେ ଓଡ଼ିଶା ଭାରତର ପ୍ରଥମ ରାଜ୍ୟ।

ଆମେ ଭାରତ ସରକାର ଏବଂ ବିଶ୍ୱସ୍ତରୀୟ ଫେଡେରେସନଗୁଡ଼ିକ ସହିତ ନିବିଡ଼ ଭାବରେ କାର୍ଯ୍ୟ କରିବୁ ଯାହା ଦ୍ୱାରା ସ୍ୱଦେଶୀ କ୍ରୀଡା ବିଶ୍ୱ ସ୍ତରରେ ସେମାନଙ୍କର ଉପଯୁକ୍ତ ସ୍ଥାନ ପାଇପାରିବ ବୋଲି ମୁଖ୍ୟମନ୍ତ୍ରୀ କହିଛନ୍ତି । ଆମେ ଓଡ଼ିଶାରେ କହିଥାଉ ଖେଳ ରେ ସଂସ୍କୃତି ଅଛି, ସଂସ୍କୃତି ରେ ଅସ୍ମିତା ଅଛି । ଓଡ଼ିଶା ସରକାର ଯୁବ ସଶକ୍ତିକରଣ, ସାମାଜିକ ବିକାଶ ଏବଂ ସାଂସ୍କୃତିକ ସଂରକ୍ଷଣ ସହିତ କ୍ରୀଡାକୁ ସମନ୍ୱିତ କରିବାରେ ଉଦାହରଣ ଦେଇ ନେତୃତ୍ୱ ନେଇ ଚାଲିଛି। WAVES ୨୦୨୫ ସେହି ଯାତ୍ରାରେ ଆଉ ଏକ ଗୁରୁତ୍ୱପୂର୍ଣ୍ଣ ମାଇଲଖୁଣ୍ଟ ବୋଲି ମୁଖ୍ୟମନ୍ତ୍ରୀ କହିଛନ୍ତି ।