ପୁରୀ ଜିଲ୍ଲା କୋଣାର୍କ ନିମାପଡା ରାସ୍ତାର ଜୁଣେଇ ଶଙ୍ଖ ଛକ ନିକଟରେ ଏକ ଅଘଟଣ ଘଟିଯାଇଛି । ପରୀକ୍ଷା ଦେବାକୁ ଚାରି ଜଣ ଛାତ୍ର ଯାଉଥିବା ବେଳେ କାର୍ ଦୁର୍ଘଟଣାରେ ୨ଜଣଙ୍କ ଜୀବନ ଚାଲିଯାଇଛି । ବାକି ଦୁଇ ଜଣ ଗୁରୁତର ଆହତ ହୋଇଥିବା ଜଣାପଡିଛି । 

ସୂଚନା ଅନୁସାରେ, ଆଇନ ପରୀକ୍ଷା ଦେବା ପାଇଁ ଗତକାଲି ବିଳମ୍ବିତ ରାତିରେ ୪ ଜଣ ସାଙ୍ଗ ଏକ କାରରେ କୋଣାର୍କରୁ ନିମାପଡା ଅଭିମୁଖେ ଯାଉଥିଲେ । ଏହି ସମୟରେ ଗାଡିଟି ଭାରସାମ୍ୟ ହରାଇ ପୋଖରୀ ଭିତରକୁ ଖସିପଡିଥିଲା । ଖବର ପାଇ ଅଗ୍ନିଶମ ବାହିନୀ ତୁରନ୍ତ ଘଟଣାସ୍ଥଳରେ ପହଞ୍ଚି କାର୍ ଭିତରକୁ ମୃତାହତଙ୍କୁ ଉଦ୍ଧାର କରି ଗୋପ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ଭର୍ତ୍ତି କରିଥିଲେ । ହେଲେ ସେଠାରେ ଡାକ୍ତର ଦୁଇ ଜଣଙ୍କୁ ମୃତ୍ୟୁ ଘୋଷଣା କରିଥିବା ବେଳେ ଦୁଇ ଜଣ ଗୁରୁତର ହୋଇଛନ୍ତି । 

ମୃତ ଯୁବକ ଦୁଇ ଜଣ ନିମାପଡ଼ା ଗୁହାଳପଡ଼ା ଅଞ୍ଚଳର ସନ୍ଦୀପ ମହାପାତ୍ର ଓ ଅନ୍ୟ ଜଣକ ପଶ୍ଚିମବଙ୍ଗ ଦାନ୍ତୁନି ଅଞ୍ଚଳର ସନାତନ ସେନାପତି ହୋଇଥିବା ବେଳେ ଗୁରୁତର ଥିବା ଦୁଇ ଜଣ ହେଲେ ମନୀଷ ସେନାପତି ଓ ବାଲିପାଟଣା ଅଞ୍ଚଳର ପୁପୁଲ ପରିଡା ବୋଲି ଜଣାପଡିଛି । ଏହାସହ ଘଟଣା ସ୍ଥଳରେ କୋଣାର୍କ ପୋଲିସ ପହଂଚି ଗାଡିକୁ ଉଦ୍ଧାର କରିଥିବା ବେଳେ ଘଟଣାକୁ ନେଇ ଅଧିକ ତଦନ୍ତ ଜାରି ରଖିଛି ।