ଭୁବନେଶ୍ୱର: ଏଫ୍ ଏମ୍ ସ୍ୱୟଂଶାସିତ ମହାବିଦ୍ୟାଳୟର ମୃତ ଛାତ୍ରୀ ସୌମ୍ୟାଶ୍ରୀ ବିଶିଙ୍କୁ ନ୍ୟାୟ ପ୍ରଦାନ ଦାବିରେ ବୁଧବାର ବିଜୁ ଜନତା ଦଳ ବାଲେଶ୍ୱରରୁ ଭୁବନେଶ୍ୱର ଯାଏ ଆନ୍ଦୋଳନର ଡାକରା ଦେଇଛି । ଭୁବନେଶ୍ୱରରେ ଲୋକସେବା ଭବନ ଘେରାଉ କରିବାକୁ ଉଦ୍ୟମ କରିବାବେଳେ ବିଜେଡ଼ି ଆନ୍ଦୋଳନକାରୀ ଏବଂ ପୋଲିସ ମଧ୍ୟରେ ଧସ୍ତାଧସ୍ତି ହୋଇଛି । କିଛି ସମୟ ପାଇଁ ଲୋଏର୍ ପିଏମଜି ଛକ ରଣକ୍ଷେତ୍ର ପାଲଟିଛି । ପୋଲିସ ଶତାଧିକ ଆନ୍ଦୋଳନକାରୀଙ୍କୁ ଅଟକ ରଖିଛି । 

ଆଜି ବିଜେଡ଼ି ହଜାର ହଜାର ସଂଖ୍ୟାରେ କର୍ମୀ, ନେତା, ବିଧାୟକ, ମହିଳା କର୍ମୀମାନେ ମାଷ୍ଟରକ୍ୟାଣ୍ଟିନ ଛକରେ ଏକାଠି ହୋଇଥିଲେ । ଏହା ପରେ ଲୋକସେବା ଭବନ ଅଭିମୁଖେ ବାହାରିଥିଲା ଶୋଭାଯାତ୍ରା । ଗାନ୍ଧୀମାର୍ଗ ଦେଇ ଆନ୍ଦୋଳନକାରୀମାନେ ଲୋଏର୍ ପିଏମଜିରେ ପହଁଚିଥିଲେ । ସେଠାରେ ପ୍ରଥମ ବ୍ୟାରିକେଡ୍ ଭାଙ୍ଗିବାକୁ ଚେଷ୍ଟା କରିବାବେଳେ ବିକ୍ଷୋଭକାରୀ ଏବଂ ପୋଲିସ ମଧ୍ୟରେ ଖଣ୍ଡଯୁଦ୍ଧ ହୋଇଥିଲା । କିନ୍ତୁ ବିକ୍ଷୋଭକାରୀ ନ ଅଟକି ଆଗକୁ ବଢ଼ିବାକୁ ଉଦ୍ୟମ କଲାବେଳେ ପୋଲିସ ବାଧ୍ୟ ହୋଇ ପାଣି ମାଡ଼ କରିଥିଲା । ସେଥିରେ କିଛି ଆନ୍ଦୋଳନ କାରୀ ଛତ୍ରଭଙ୍ଗ ଦେଇଥିଲେ । ତଥାପି ଆନ୍ଦୋଳନ ଜାରି ରଖି ଆହୁରି ଆଗକୁ ବଢ଼ିବାକୁ ଉଦ୍ୟମ କରିଥିଲେ, ଯଦ୍ୱାରା ପୋଲିସ ବାଧ୍ୟ ଲୁହ ବୁହା ଗ୍ୟାସ ପ୍ରୟୋଗ କରିଛି । 

ଏହା ସହିତ ଶତାଧିକ ବିଜେଡ଼ି କର୍ମୀଙ୍କୁ ପୋଲସି ଅଟକ ରଖିଛି । ଆଇନଶୃଙ୍ଖଳା ପରିସ୍ଥିତିକୁ ଦୃଷ୍ଟିରେ ରଖି ଶାନ୍ତିପୂର୍ଣ୍ଣ ଭାବରେ ଆନ୍ଦୋଳନ ଜାରି ରଖିବାକୁ ବାରମ୍ବାର ଡାକବାଜି ଯନ୍ତ୍ର ସାହାଯ୍ୟରେ ପୋଲିସ ନିବେଦନ କରିଛି । ନିଶେଦ୍ଧାଞ୍ଚଳକୁ ପ୍ରବେଶ ନ କରିବାକୁ ଅନୁରୋଧ କରାଯାଉଛି । ତଥାପି ଆନ୍ଦୋଳନକାରୀ ବିକ୍ଷୋଭ ଜାରି ରଖିଛନ୍ତି ।

ଅନ୍ୟପକ୍ଷରେ ଲୋକସେବା ଭବନ ଏବଂ ବିଧାନସଭାକୁ କଡ଼ା ସୁରକ୍ଷା ବଳୟ ମଧ୍ୟରେ ରଖାଯାଇଛି । ଏହା ସହିତ ଚାରୋଟି ଡ୍ରୋନ ଦ୍ୱାରା ଆନ୍ଦୋଳନ ଉପରେ ନଜର ରଖାଯାଇଛି ।