ଫସଲ ଉଜାଡି ଦେଲା ସୁନାର ସଂସାର । ଦାଉ ସାଧିଲା ଅଦିନିଆ ବର୍ଷା । ଅଦିନିଆ ବର୍ଷାରେ ଫସଲ ହାନି ଯୋଗୁଁ ଜୀବନ ହାରିଲେ ଆଉ ଜଣେ ଚାଷୀ । ଏଭଳି ଏକ ଅଘଟଣ ଘଟିଯାଇଛି କେନ୍ଦ୍ରାପଡା ଜିଲ୍ଲା ଆଳି ଥାନା ଅନ୍ତର୍ଗତ କୋଳଢିଆ ଗାଁରେ । ମୃତ ଚାଷୀ ଜଣଙ୍କ ହେଉଛନ୍ତି କୈଳାସ ଚନ୍ଦ୍ର ଧଳ । 

ସୂଚନା ଅନୁସାରେ କୈଳାସ ଅଢେଇ ଲକ୍ଷ ଟଙ୍କା କରଜ କରି ୮ ଏକର ଚାଷ ଜମିରେ ଚାଷ କରିଥିଲେ । କିଛି ଦିନ ତଳେ ଅଦିନିଆ ବର୍ଷା ହେବା ଯୋଗୁଁ ଜମିରେ ପାଣି ରହି ଧାନ ସବୁ ଗଜା ହୋଇଯାଇଥିଲା । ଯାହାକୁ ଦେଖି କୈଳାସଙ୍କ ପାଦ ତଳୁ ମାଟି ଖସି ଯାଇଥିଲା । ଧାର କରଜ କରି ଆଣିଥିବା ଟଙ୍କାକୁ କିପରି ସୁଝିବ ସେ ନେଇ ଚିନ୍ତାରେ ପଡିଯାଇଥିଲେ କୈଳାସ । ତେଣୁ ଗତକାଲି ରାତିରେ ସେ ବିଷ ପିଇ ଦେଇଥିବା ନେଇ ପରିବାର ଲୋକେ ଅଭିଯୋଗ କରିଛନ୍ତି ।