ବଲାଙ୍ଗିର : ନୂଆଁଖାଇ ପାଇଁ ସବୁଠି ଆନନ୍ଦ ଉତ୍ସାହ । ନୂଆ ଲୁଗା ପିନ୍ଧିବା ସହ ନୂଆ ଖାଇ ସମସ୍ତେ ପାଳୁଛନ୍ତି ପର୍ବ । ଏହି ଅବସରରେ ଏକାଠି ହୋଇଛନ୍ତି ବଲାଙ୍ଗିର ରାଜ ପରିବାର । ରାଜ ପରିବାର ଭାବେ ଜଣା ଓଡ଼ିଶାର ଉପ ମୁଖ୍ୟମନ୍ତ୍ରୀଙ୍କ ପରିବାର । ଓଡ଼ିଶାର ଉପ ମୁଖ୍ୟମନ୍ତ୍ରୀ ତଥା ପାଟଣାଗଡ଼ ବିଧାୟକ କନକ ବର୍ଦ୍ଧନ ସିଂ ଦେଓ,ବଲାଙ୍ଗିର ସାଂସଦ ସଙ୍ଗୀତା ସିଂ ଦେଓ, ବଲାଙ୍ଗିର ବିଧାୟକ କଳିକେଶ ନାରାୟଣ ସିଂ ଦେଓ, ପୂର୍ବତନ ମନ୍ତ୍ରୀ ତଥା ପୂର୍ବତନ ସାଂସଦ ଅନଙ୍ଗ ଉଦୟ ସିଂ ଦେଓ ।ଆଜି ଏମାନେ ସମସ୍ତେ ମିଶି ଏକାଠି ନୂଆ ଖାଇଛନ୍ତି । ରାଜନୈତିକ କ୍ଷେତ୍ରରେ ରାଜ ପରିବାର ଅଲଗା ଅଲଗା ଦଳକୁ ପ୍ରତିନିଧିତ୍ଵ କରୁଥିଲେ ହେଁ ନୂଆଖାଇ ପର୍ବରେ ଗୋଟିଏ ସ୍ଥାନରେ ନବାନ୍ନ ଗ୍ରହଣ କରି ଏକତାର ପରିଚୟ ଦେଇଛନ୍ତି।  ବଲାଙ୍ଗିର ଶୈଳେଶ୍ରୀ ପ୍ୟାଲେସରେ ଆଜି ଏହି ନୂଆଖାଇ ପର୍ବ ପାଳନ କରିଛନ୍ତି । 

ଉପମୁଖ୍ୟମନ୍ତ୍ରୀ କନକ ବର୍ଦ୍ଧନ ସିଂ ଦେଓ ଙ୍କ ପରିବାର ଓ ଅନଙ୍ଗ ଉଦୟ ସିଂ ଦେଓଙ୍କ ପରିବାର ଏକାଠି ହୋଇ ନୂଆ ଅନ୍ନ ଗ୍ରହଣ କରିଥିଲେ । ସାଥିରେ କଳିକେଶ ଙ୍କ ଧର୍ମପତ୍ନୀ, ଝିଅ ଓ ବଡଭାଇ ମନ୍ମଥ ସିଂ ଦେଓ ମଧ୍ୟ ଉପସ୍ଥିତ ଥିଲେ । ପେଲେସ ରେ ଥିବା ମଣ୍ଡପରେ ଦୁଇ ପରିବାର  ଏକାଠି ବସିବା ହେବା ପରେ ରାଜପୁରୋହିତ ପୂଜାର୍ଚ୍ଚନା କରି ନୂଆ ଖାଇବାକୁ କହିଥିଲେ । ଏହି ଅବସରରେ ଉପମୁଖ୍ୟମନ୍ତ୍ରୀ  ସମସ୍ତଙ୍କୁ ନୂଆଁଖାଇ ଶୁଭେଚ୍ଛା ଜଣାଇବା ସହିତ ସମସ୍ତଙ୍କର ମଙ୍ଗଳ କାମନା କରିଥିଲେ ।