ଭୁବନେଶ୍ୱର : ସୋମବାର ଓଡ଼ିଶାର ପ୍ରତିଷ୍ଠିତ ଏବଂ ଐତିହାସିକ ଚଳଚ୍ଚିତ୍ର ନିର୍ମାଣ କେନ୍ଦ୍ର ‘କଳିଙ୍ଗ ଷ୍ଟୁଡିଓ’ ଏକ ସମ୍ପୂର୍ଣ୍ଣ ଆଧୁନିକ ତଥା ନୂଆ ରୂପ ନେଇଛି। ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ଏହି ପୁନର୍ବିକଶିତ ଓ ନବୀକୃତ କଳିଙ୍ଗ ଷ୍ଟୁଡିଓ କଂପଲେକ୍ସର ଭବ୍ୟ ଲୋକାର୍ପଣ କରିଛନ୍ତି। ଓଡ଼ିଆ ସିନେମା ଜଗତର ବିକାଶ ଏବଂ ଉନ୍ନତି ଦିଗରେ ରାଜ୍ୟ ସରକାରଙ୍କ ପକ୍ଷରୁ ଏହା ଏକ ବଡ଼ ଓ ଐତିହାସିକ ପଦକ୍ଷେପ। ଏହି ଲୋକାର୍ପଣ ଉତ୍ସବରେ ଶିଳ୍ପ ଓ ଦକ୍ଷତା ବିକାଶ ମନ୍ତ୍ରୀ ସମ୍ପଦ ସ୍ବାଇଁ, ଏକାମ୍ର-ଭୁବନେଶ୍ୱର ବିଧାୟକ ବାବୁ ସିଂ ଏବଂ ବିଶିଷ୍ଟ ଅଭିନେତା ତଥା ରାଜନେତା ସିଦ୍ଧାନ୍ତ ମହାପାତ୍ର ପ୍ରମୁଖ ଉପସ୍ଥିତ ଥିଲେ।

 ପ୍ରାୟ ₹୧୬୪ କୋଟି ଟଙ୍କା ବ୍ୟୟରେ ଏହି ଷ୍ଟୁଡିଓର ସମ୍ପୂର୍ଣ୍ଣ କାୟାକଳ୍ପ କରାଯାଇଛି। ଚଳଚ୍ଚିତ୍ର ନିର୍ମାତାମାନଙ୍କୁ ଆକୃଷ୍ଟ କରିବା ପାଇଁ ଏଠାରେ ସ୍ନୋ ୱାର୍ଲ୍ଡ , ଆମାଜନ ଜଙ୍ଗଲ, ହଣ୍ଟେଡ୍ ହାଉସ, ବିମାନ ବନ୍ଦର, ରେଳ ଷ୍ଟେସନ ଏବଂ ପାରମ୍ପରିକ ଗ୍ରାମୀଣ ପରିବେଶର ସେଟ୍ ନିର୍ମାଣ କରାଯାଇଛି। ଇନଡୋର ସୁଟିଂ ଫ୍ଲୋର ସହିତ ଅତ୍ୟାଧୁନିକ ସାଉଣ୍ଡ ରେକର୍ଡିଂ, ଡବିଂ, ମିକ୍ସିଂ, କଲର ଗ୍ରେଡିଂ, ଏଡିଟିଂ ଏବଂ ରିହର୍ସାଲ ଜୋନ୍ ଉପଲବ୍ଧ କରାଯାଇଛି।

 କେବଳ ଫିଲ୍ମ ସୁଟିଂ ନୁହେଁ, ବରଫର ଅନୁଭୂତି ଦେଉଥିବା ‘ସ୍ନୋ ୱାର୍ଲ୍ଡ’ ଏବଂ ଏକ ଚିତ୍ତାକର୍ଷକ ଆମ୍ୟୁଜମେଣ୍ଟ ପାର୍କ ସାଧାରଣ ପର୍ଯ୍ୟଟକ ଓ ପରିବାରଙ୍କ ମନୋରଞ୍ଜନ ପାଇଁ ଏକ ପ୍ରମୁଖ ଆକର୍ଷଣ ପାଲଟିବ।

୧୯୯୯ ମହାବାତ୍ୟାରେ ବ୍ୟାପକ କ୍ଷତିଗ୍ରସ୍ତ ହୋଇ କଳିଙ୍ଗ ଷ୍ଟୁଡିଓ ଦୀର୍ଘ ବର୍ଷ ଧରି ଅବହେଳିତ ଅବସ୍ଥାରେ ଥିବା ଏବେ ବିଶ୍ୱସ୍ତରୀୟ ସୁବିଧା ସହ ଓଡ଼ିଶାର କଳା, ସଂସ୍କୃତି ଓ ଚଳଚ୍ଚିତ୍ର ଶିଳ୍ପକୁ ଏକ ନୂଆ ଉଚ୍ଚତାକୁ ନେବ ବୋଲି ଆଶା କରାଯାଉଛି।