ଭୁବନେଶ୍ୱର : ସମ୍ବିଧାନ ପ୍ରତି ଭାରତୀୟଙ୍କୁ ସମାନତାର ଅଧିକାର ଦେଇଛି । ନ୍ୟାୟ ପାଇବା ସମସ୍ତଙ୍କ ଅଧିକାର । ଗରିବ କିମ୍ବା ଆର୍ଥିକ ଦୁର୍ବଳବର୍ଗର ସାଧାରଣ ଲୋକଟିଏ ଅର୍ଥାଭାବରୁ ନ୍ୟାୟ ପାଇବାରୁ ବଂଚିତ ନ ହେଉ । ଏହାକୁ ଧ୍ୟାନ ଦେଇ ଦୁର୍ବଳ ଶ୍ରେଣୀ ନିକଟରେ ଆଇନ ସହାୟତା ପହଂଚିବାକୁ ସୁନିଶ୍ଚିତ କରିବା ଜରୁରୀ । ଏହା ହେଲେ ଜେଲରେ ବିଚାରଧୀନ ବନ୍ଦୀଙ୍କ ସଂଖ୍ୟା ହ୍ରାସ ପାଇବ । ଏହା କହିଛନ୍ତି ଜାତୀୟ ମାନବାଧିକାର ଆୟୋଗ (ଏନ୍‌ଏଚ୍‌ଆର୍‌ସି)ର ସଦସ୍ୟା ଶ୍ରୀମତି ବିଜୟା ଭାରତୀ ସାୟାନୀ ।

ଶୁକ୍ରବାର ସୋଆ ବିଶ୍ୱବିଦ୍ୟାଳୟର ଛାତ୍ରଛାତ୍ରୀ ଓ ଅଧ୍ୟାପକ ଅଧ୍ୟାପିକାଙ୍କୁ ସମ୍ବୋଧିତ କରି ଶ୍ରୀମତି ସାୟାନୀ କହିଛନ୍ତି ଯେ, ଭାରତ ବିଶ୍ୱର ପ୍ରମୁଖ  ଅର୍ଥନୈତିକ ଶକ୍ତି ଭାବେ ଉଭା ହୋଇଛି । ଏହି ସଫଳତା ସତ୍ୱେ ଗଣତନ୍ତ୍ରକୁ ସୁଦୃଢ କରିବାକୁ ଦାରିଦ୍ର‌୍ୟ, ଜାତିଗତ ବୈଷମ୍ୟ ଏବଂ ଲିଙ୍ଗ ଅସମାନତା ଭଳି ଆହ୍ୱାନର ମୁକାବିଲା କରିବାକୁ ହେବ । ଅକ୍ଟୋବର ୨୦୨୫ରେ ପ୍ରକାଶିତ ବିଶ୍ୱ ବ୍ୟାଙ୍କ ରିପୋର୍ଟକୁ ଉଦ୍ଧୃତ କରି ସେ କହିଲେ ଏବେ ବି ଦେଶର ୩୪ କୋଟି (୨୩.୮%) ଲୋକ ଦୈନିକ ମାତ୍ର ୩୬୦ ଟଙ୍କାରେ ଚଳୁଛନ୍ତି । ଉତର ପ୍ରଦେଶ, ମହାରାଷ୍ଟ୍ର ଓ ବିହାର ଭଳି ବଡ ରାଜ୍ୟରେ ଦାରିଦ୍ର‌୍ୟ ସୀମାରେଖା ତଳେ ଥିବା ଲୋକଙ୍କ ସଂଖ୍ୟା ବେଶୀ । ଏ ତିନି ରାଜ୍ୟରେ ଦେଶର ୪୬ ପ୍ରତିଶତ ଗରିବ ରହୁଛନ୍ତି । ସରକାର ଗରିବୀ ହଟାଇବାକୁ ଗତ ୧୫ ବର୍ଷରେ ବହୁ ଯୋଜନା ଓ କାର୍ଯ୍ୟକ୍ରମ ହାତକୁ ନେଇଛନ୍ତି । ତଥାପି ଦାରିଦ୍ର‌୍ୟ ଏବେ ମଧ୍ୟ ଏକ ବଡ଼ ସମସ୍ୟା ହୋଇ ରହିଛି । 

ଶ୍ରୀମତି ସାୟାନୀ ସୋଆ ବିଶ୍ୱବିଦ୍ୟାଳୟ ପ୍ରେକ୍ଷାଳୟରେ ସୋଆ ବକ୍ତୃତାମାଳା କାର୍ଯ୍ୟକ୍ରମରେ ଯୋଗ ଦେଇ ନିଜର ବକ୍ତବ୍ୟ ରଖିଥିଲେ ।  

ଶ୍ରୀମତି ସାୟାନୀ କହିଥିଲେ ଯେ ଆଇନଗତ ଅଧିକାର ଏବଂ ବାସ୍ତବତା ମଧ୍ୟରେ ଥିବା ଦୂରତ୍ୱକୁ ଆଖିରେ ରଖି ସମସ୍ତଙ୍କ ପାଇଁ ସୁଲଭ ଓ ସମାନ ନ୍ୟାୟର ବ୍ୟବସ୍ଥା ରହିବା ଆବଶ୍ୟକ । ଦେଶର ଜଣେ ହେଲେ ନାଗରିକ ନ୍ୟାୟ ପାଇବାରୁ ବଂଚିତ  ନ ହେଉ । ଏ ଦିଗରେ ଯାହା ସବୁ  ଆହ୍ୱାନ ରହିଛି ତାହା ଦୂର ହେବା ଆବଶ୍ୟକ । ୨୦୨୫ର ଇଣ୍ଡିଆ ଜଷ୍ଟିସ୍  ରିପୋର୍ଟର ତଥ୍ୟ ଉଲ୍ଲେଖ କରି ସେ କହିଲେ ଯେ ଲୋକଙ୍କ ନିକଟରେ ମାଗଣା ଆଇନ ସହାୟତା ପହଂଚିଲେ ଠିକ୍  ସମୟରେ ଜାମିନ ମିଳିପାରିବ । ଫଳରେ ଦେଶର ଜେଲ ଗୁଡିକରେ ମାତ୍ରାଧିକ ଭିଡ ଓ ଚାପ କମିବ । ମାନବାଧିକାର ସୁରକ୍ଷା ଦିଗରେ ଜାତୀୟ ମାନବାଧିକାର ଆୟୋଗ କାର୍ଯ୍ୟ କରୁଛି । ଗରିବ ଓ ଅବହେଳିତଙ୍କ ପାଇଁ ଏହା ଏବେ ପାଲଟିଛି ଏକ ଜୀବନରେଖା ।

ଶ୍ରୀମତି ସାୟାନୀ କହିଥିଲେ ଯେ, ୩୨ ବର୍ଷରେ ଏନ୍‌ଏଚ୍‌ଆର୍‌ସି ୨୩.୭୯ ଲକ୍ଷରୁ ଅଧିକ ମାମଲାରେ ହସ୍ତକ୍ଷେପ କରି ୮,୯୨୪ଟି ମାମଲାରେ ୨୬୩ କୋଟି ଟଙ୍କାର ଆର୍ଥିକ ସହାୟତା ପ୍ରଦାନ କରାଯାଇଛି । ଏଥିରୁ ୨୯୮୧ଟି ମାମଲାରେ ଆୟୋଗ ନିଜ ଆଡୁ ହସ୍ତକ୍ଷେପ କରିଛି । ପ୍ରତି ନାଗରିକଙ୍କ ଅଧିକାର ଓ ମର୍ଯ୍ୟାଦାର ସୁରକ୍ଷା ହେଉଛି ଆୟୋଗର ପ୍ରତିବଦ୍ଧତା । 

କୁଳପତି ପ୍ରଫେସର ପ୍ରଦୀପ୍ତ କୁମାର ନନ୍ଦଙ୍କ ଅଧ୍ୟକ୍ଷତାରେ ଆୟୋଜିତ ଏହି କାର୍ଯ୍ୟକ୍ରମରେ ଉପକୁଳପତି ପ୍ରଫେସର (ଡ.) ନୀତା ମହାନ୍ତି ଏବଂ  ଛାତ୍ର୍ର୍ର ମଙ୍ଗଳ ଡିନ୍ ପ୍ରଫେସର ଜ୍ୟୋତି ରଂଜନ ଦାସ ଅଭିଭାଷଣ ଦେଇଥିଲେ ।