ଭୁବନେଶ୍ୱର: ସ୍ୱାସ୍ଥ୍ୟ ହିଁ ସମ୍ପଦ, ଜଣେ ସୁସ୍ଥ ରହିଲେ ଭଲ କାମ କରିବେ । ସରକାରୀ ହେଉ ବା ବେସରକାରୀ ସଂସ୍ଥାରେ କାର୍ଯ୍ୟ କରୁଥିବା କର୍ମଚାରୀ ଓ ଅଧିକାରୀଙ୍କ ଶାରୀରିକ ସୁସ୍ଥତା ନିହାତି ଆବଶ୍ୟକ । ଏନେଇ ଏବେ ସରକାରୀ ସ୍ତରରେ ଉଦ୍ୟମ ଆରମ୍ଭ ହୋଇଛି ।  ସୁସ୍ଥ ଜୀବନଶୈଳୀ ପାଇଁ ଗ୍ରାମ୍ୟ ଉନ୍ନୟନ ବିଭାଗ ତରଫରୁ ଗ୍ରାମୀଣ ବିକାଶ ଏବଂ ମହିଳା ଓ ଶିଶୁ ବିକାଶ ବିଭାଗ ସଚିବଙ୍କୁ ଚିଠି କରିଛନ୍ତି ସ୍ବତନ୍ତ୍ର ସଚିବ । 

ଏଣିକି ଅଧିକ ତେଲଯୁକ୍ତ ଓ ମିଠା ଖାଦ୍ୟ ସେବନର ଅପକାରିତା ସମ୍ପର୍କରେ ସରକାରୀ କର୍ମଚାରୀଙ୍କୁ ସେମାନଙ୍କ କାର୍ଯ୍ୟାଳୟରେ ଚେତାବନୀ ଦିଆଯିବ। କର୍ମଚାରୀଙ୍କୁ ସ୍ବାସ୍ଥ୍ୟ ସଚେତନ କରାଇବା ପାଇଁ ପ୍ରତ୍ୟେକ କାର୍ଯ୍ୟାଳୟରେ ତୈଳ ଓ ଚିନି ବୋର୍ଡ ଲାଗିବ। ମୋଟାପଣ ଓ ବିଭିନ୍ନ ପ୍ରକାର ରୋଗକୁ କିପରି ଏହି ଖାଦ୍ୟ ପ୍ରୋତ୍ସାହିତ କରିଥାଏ ତା'ର ପୂରା ବିବରଣୀ ଏହି ବୋର୍ଡରେ ପ୍ରଦର୍ଶିତ ହେବ। ଏହି ବୋର୍ଡ ସ୍ଥାପନ ଲାଗି ମହିଳା ଓ ଶିଶୁ ବିକାଶ ବିଭାଗ ପକ୍ଷରୁ ସମସ୍ତ ବିଭାଗକୁ କୁହାଯାଇଛି। ଏଥିରେ କୁହାଯାଇଛି ଯେ ସରକାରୀ କାର୍ଯ୍ୟାଳୟର ସର୍ବସାଧାରଣ ସ୍ଥାନରେ ତୈଳ ଓ ଚିନି ଅବା ଅଏଲ ଆଣ୍ଡ ସୁଗାର ବୋର୍ଡ ଲଗାଯିବ। ଯଦ୍ୱାରା କର୍ମଚାରୀଙ୍କ ସହିତ ସେଠାକୁ ଯା’ଆସ କରୁଥିବା ଜନସାଧାରଣଙ୍କ ନଜର ସେହି ବୋର୍ଡ ଉପରେ ପଡ଼ିବ । 

ମୁଖ ସୁଆଦ ଖାଦ୍ୟର ଭୟାବହତା ସମ୍ପର୍କରେ ସୂଚନା ଦିଆଯିବା ସହିତ ସୁସ୍ଥ ଜୀବନଯାପନ ପାଇଁ ଆବଶ୍ୟକ ସୂଚନା ଏଥିରେ ରହିବ। ଏଥିସହ ଅଫିସ କାଗଜପତ୍ର, ସାମଗ୍ରୀ, ଇ-ମେଲ, ୱେବ୍‌ସାଇଟ୍ ଆଦିରେ ସୁସ୍ଥ ଜୀବନଶୈଳୀକୁ ପ୍ରୋତ୍ସାହିତ କରିବା ଭଳି ବାର୍ତ୍ତା ପ୍ରଦର୍ଶନ ଲାଗି କୁହାଯାଇଛି । କର୍ମଚାରୀମାନେ ଯେପରି ନିୟମିତ ଭାବେ ଶାରୀରିକ ପରିଶ୍ରମ କରିବେ ଏବଂ ଅସ୍ବାସ୍ଥ୍ୟକର ଖାଦ୍ୟରୁ ଦୂରେଇ ରହିବେ, ସେ ନେଇ ବ୍ୟାପକ ସଚେତନତା ସୃଷ୍ଟି ଲାଗି ସମସ୍ତ ବିଭାଗକୁ ପରାମର୍ଶ ଦିଆଯାଇଛି।