ଭୁବନେଶ୍ୱର: ସାରା ବିଶ୍ୱ ସହିତ ଓଡ଼ିଶାରେ ମଧ୍ୟ ଆଜି ଅନ୍ତର୍ଜାତୀୟ ଯୋଗ ଦିବସ ବେଶ୍ ଉତ୍ସାହ ଓ ଉଦ୍ଦୀପନା ସହକାରେ ପାଳିତ ହୋଇଛି। ଏହି ପରିପ୍ରେକ୍ଷୀରେ ରାଜଧାନୀ ଭୁବନେଶ୍ୱର ସ୍ଥିତ ପ୍ରସିଦ୍ଧ କଳିଙ୍ଗ ଷ୍ଟାଡିୟମଠାରେ ଏକ ଭବ୍ୟ ରାଜ୍ୟସ୍ତରୀୟ ଯୋଗ ଶିବିରର ଆୟୋଜନ କରାଯାଇଥିଲା। ଏହି ବିଶେଷ କାର୍ଯ୍ୟକ୍ରମରେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ ମୁଖ୍ୟ ଅତିଥି ଭାବେ ସାମିଲ ହୋଇ ସାଧାରଣ ଜନତା ଓ ଯୋଗପ୍ରେମୀଙ୍କ ସହ ମିଶି ଯୋଗାଭ୍ୟାସ କରିଛନ୍ତି।

ଆଜି ପ୍ରତ୍ୟୁଷରୁ କଳିଙ୍ଗ ଷ୍ଟାଡିୟମ ପରିସର ଏକ ଆଧ୍ୟାତ୍ମିକ ମାହୋଲ ଦେଖିବାକୁ ମିଳିଥିଲା ।  ଏହି ଶିବିରରେ ହଜାର ହଜାର ଲୋକ ଏକାଠି ହୋଇଥିଲେ। ମୁଖ୍ୟମନ୍ତ୍ରୀ ମୋହନ ମାଝୀ ନିର୍ଦ୍ଧାରିତ ସମୟରେ ପହଞ୍ଚି ଉପସ୍ଥିତ ସମସ୍ତ ବ୍ୟକ୍ତିଙ୍କୁ ଉତ୍ସାହିତ କରିବା ସହ ନିଜେ ସାଧାରଣ ଲୋକଙ୍କ ଗହଣରେ ବସି ବିଭିନ୍ନ ଆସନ ଓ ପ୍ରାଣାୟାମ କରିଥିଲେ। ତାଙ୍କ ସହିତ ରାଜ୍ୟ ମନ୍ତ୍ରିମଣ୍ଡଳର ସଦସ୍ୟ, ବରିଷ୍ଠ ପ୍ରଶାସନିକ ଅଧିକାରୀ, କ୍ରୀଡ଼ାବିତ୍ ଏବଂ ବହୁ ସଂଖ୍ୟାରେ ଛାତ୍ରଛାତ୍ରୀ ମଧ୍ୟ ଏହି ସାମୂହିକ ଯୋଗାଭ୍ୟାସରେ ଭାଗ ନେଇଥିଲେ।

ନିରୋଗ ଓଡ଼ିଶା ଗଠନ ପାଇଁ ମୁଖ୍ୟମନ୍ତ୍ରୀଙ୍କ ଆହ୍ୱାନ

କାର୍ଯ୍ୟକ୍ରମ ଅବସରରେ ଗଣମାଧ୍ୟମକୁ ପ୍ରତିକ୍ରିୟା ଦେଇ ମୁଖ୍ୟମନ୍ତ୍ରୀ ମୋହନ ମାଝୀ କହିଛନ୍ତି ଯେ, ଯୋଗ କେବଳ ଏକ ଶାରୀରିକ ବ୍ୟାୟାମ ନୁହେଁ, ବରଂ ଏହା ଶରୀର, ମନ ଓ ଆତ୍ମାକୁ ଯୋଡ଼ିବାର ଏକ ପବିତ୍ର ମାଧ୍ୟମ। ଆମ ପ୍ରାଚୀନ ଭାରତୀୟ ସଂସ୍କୃତିର ଏହି ଅମୂଲ୍ୟ ଉପହାରକୁ ଆଜି ସମଗ୍ର ବିଶ୍ୱ ଆଦରି ନେଇଛି। ପ୍ରତିଦିନ ନିଜ ଜୀବନଶୈଳୀରେ ଯୋଗକୁ ସାମିଲ କଲେ ଆମେ ଚାପମୁକ୍ତ ଏବଂ ସୁସ୍ଥ ରହିପାରିବା। ଏକ ନିରୋଗ ଏବଂ ପ୍ରଗତିଶୀଳ ଓଡ଼ିଶା ଗଠନ ଦିଗରେ ପ୍ରତିଟି ଓଡ଼ିଆ ଯୋଗକୁ ଆପଣେଇବା ଜରୁରୀ।

କାର୍ଯ୍ୟକ୍ରମର ମୁଖ୍ୟ ଆକର୍ଷଣ

ସାମୂହିକ ଯୋଗାଭ୍ୟାସ: ଅଭିଜ୍ଞ ଯୋଗ ଗୁରୁଙ୍କ ତତ୍ତ୍ୱାବଧାନରେ ସୂର୍ଯ୍ୟ ନମସ୍କାର, କପାଳଭାତି, ଅନୁଲୋମ-ବିଲୋମ ଏବଂ ଧ୍ୟାନ ଭଳି ଅନେକ ଜଟିଳ ଓ ସହଜ ଆସନ କରାଯାଇଥିଲା।କେବଳ ଭୁବନେଶ୍ୱର ନୁହେଁ, ଆଖପାଖ ଅଞ୍ଚଳରୁ ମଧ୍ୟ ଶତାଧିକ ମହିଳା, ଶିଶୁ ଏବଂ ବୃଦ୍ଧବୃଦ୍ଧା ଏହି ମହତ କାର୍ଯ୍ୟକ୍ରମରେ ଅଂଶଗ୍ରହଣ କରିଥିଲେ।କ୍ରୀଡ଼ା ଓ ଯୁବସେବା ବିଭାଗ ଏବଂ ଆୟୁଷ ନିର୍ଦ୍ଦେଶାଳୟ ପକ୍ଷରୁ କାର୍ଯ୍ୟକ୍ରମର ସଫଳ ଆୟୋଜନ ପାଇଁ ଷ୍ଟାଡିୟମରେ ସମସ୍ତ ପ୍ରକାର ଆନୁଷଙ୍ଗିକ ବ୍ୟବସ୍ଥା କରାଯାଇଥିଲା।

ସୂଚନାଯୋଗ୍ୟ ଯେ, କେବଳ କଳିଙ୍ଗ ଷ୍ଟାଡିୟମ ନୁହେଁ, ବରଂ ମୁଖ୍ୟମନ୍ତ୍ରୀଙ୍କ ନିର୍ଦ୍ଦେଶକ୍ରମେ ରାଜ୍ୟର ପ୍ରତିଟି ଜିଲ୍ଲା, ସବ୍‌-ଡିଭିଜନ ଏବଂ ବ୍ଲକ ସ୍ତରରେ ମଧ୍ୟ ପ୍ରଶାସନ ପକ୍ଷରୁ ସ୍ୱତନ୍ତ୍ର ଯୋଗ ଶିବିରମାନ ଆୟୋଜନ କରାଯାଇ ଆନ୍ତର୍ଜାତୀୟ ଯୋଗ ଦିବସକୁ ବେଶ୍ ଧୂମଧାମରେ ପାଳନ କରାଯାଇଛି।