କଲମ୍ବୋ: ସୋନାଲ ଦିନୁଷାଙ୍କ ଐତିହାସିକ ଶତକ ବଳରେ କଲମ୍ବୋ ଟେଷ୍ଟର ଶେଷ ଦିନରେ ଶ୍ରୀଲଙ୍କା ଦଳର ଦମଦାର ପ୍ରତ୍ୟାବର୍ତ୍ତନ। ପଞ୍ଚମ ଦିନର ରୋମାଞ୍ଚକର ଖେଳ ଶେଷରେ ଶ୍ରୀଲଙ୍କା ନିଜର ଦ୍ୱିତୀୟ ଇନିଂସକୁ ୪୨୯/୯ ରନ୍‌ରେ ଘୋଷଣା କରିବା ପରେ ଉଭୟ ଦଳର ସମ୍ମତି କ୍ରମେ ଦ୍ୱିତୀୟ ଟେଷ୍ଟ ମ୍ୟାଚ୍ ଡ୍ର’ରେ ଶେଷ ହୋଇଛି। ଚତୁର୍ଥ ଦିନ ସୁଦ୍ଧା ଭାରତୀୟ ଦଳର ବିଜୟ ପ୍ରାୟ ସୁନିଶ୍ଚିତ ମନେହେଉଥିଲା, ହେଲେ ସୋନାଲ ଦିନୁଷାଙ୍କ ଅବିଶ୍ୱସନୀୟ ଅପରାଜିତ ଶତକୀୟ ଇନିଂସ ଟିମ୍ ଇଣ୍ଡିଆର ବିଜୟ ସ୍ୱପ୍ନକୁ ଧୂଳିସାତ୍ କରିଦେଇଛି। ତେବେ ପ୍ରଥମ ଟେଷ୍ଟକୁ ୧୬୫ ରନ୍‌ରେ ଜିତିଥିବା ଭାରତୀୟ ଦଳ ୧-୦ରେ ଏହି ସିରିଜ୍ ନିଜ ନାମରେ କରିଛି।

ଦିନୁଷାଙ୍କ 'ଡବଲ' ଧମାକା

ଶ୍ରୀଲଙ୍କାର ଯୁବ ବ୍ୟାଟର ସୋନାଲ ଦିନୁଷା ଏହି ମ୍ୟାଚର ଉଭୟ ଇନିଂସରେ ଶତକ ହାସଲ କରି ସଞ୍ଜିବନୀ ସାଜିଛନ୍ତି। ପ୍ରଥମ ଇନିଂସରେ ୭ମ ନମ୍ବରରେ ଆସି ୮ଟି ଚୌକା ଓ ୩ଟି ଛକା ବଳରେ ୧୦୩ ରନ୍ କରିଥିବା ଦିନୁଷା, ଦ୍ୱିତୀୟ ଇନିଂସରେ ୬ଷ୍ଠ ନମ୍ବରରେ ବ୍ୟାଟିଂ କରି ୧୩୩ ରନ୍‌ର ଏକ ଦାୟିତ୍ୱପୂର୍ଣ୍ଣ ଅପରାଜିତ ପାରି ଖେଳିଥିଲେ। ତାଙ୍କର ଏହି ସଂଘର୍ଷମୟ ଶତକ ବଳରେ ହିଁ ଶ୍ରୀଲଙ୍କା ପରାଜୟ ଏଡ଼ାଇ ପାରିଛି।

ଫଲୋଅନ୍ ଦେବା ପଡ଼ିଲା ଭାରି

ଟସ୍ ଜିତି ପ୍ରଥମେ ବ୍ୟାଟିଂ କରିଥିବା ଭାରତୀୟ ଦଳ ଦେବଦତ୍ତ ପଡିକ୍କଲ (୧୧୭), ଧ୍ରୁବ ଜୁରେଲ (୧୧୫*), ରିଷଭ ପନ୍ତ (୬୩) ଓ ଅଧିନାୟକ ଶୁଭମନ ଗିଲ୍ (୫୦)ଙ୍କ ଦମଦାର ବ୍ୟାଟିଂ ବଳରେ ୯ ୱିକେଟ୍‌ରେ ୫୦୩ ରନ୍ କରି ଇନିଂସ ଘୋଷଣା କରିଥିଲା। ଜବାବରେ ଶ୍ରୀଲଙ୍କାର ପ୍ରଥମ ଇନିଂସ ୨୯୦ ରନ୍‌ରେ ସୀମିତ ରହିଯାଇଥିଲା।

୨୧୩ ରନ୍‌ର ବିଶାଳ ଅଗ୍ରଣୀ ହାସଲ କରିବା ପରେ ଭାରତୀୟ ଅଧିନାୟକ ଗିଲ୍ ଶ୍ରୀଲଙ୍କାକୁ ଫଲୋଅନ୍ ଦେବାକୁ ନିଷ୍ପତ୍ତି ନେଇଥିଲେ। ହେଲେ ଦ୍ୱିତୀୟ ଇନିଂସରେ ଶ୍ରୀଲଙ୍କାର ବ୍ୟାଟରମାନେ ଭାରତୀୟ ବୋଲିଂ ଆକ୍ରମଣକୁ ଦୃଢ଼ ଭାବେ ସାମ୍ନା କରି ୪୨୯ ରନ୍‌ର ବିଶାଳ ସ୍କୋର ଛିଡ଼ା କରିଦେଇଥିଲେ। ଦିନୁଷାଙ୍କ ବ୍ୟତୀତ ପାସିନ୍ଦୁ ସୂର୍ଯ୍ୟବନ୍ଦାରା (୯୨), କାମିନ୍ଦୁ ମେଣ୍ଡିସ୍ (୫୫) ଓ କେଶରା ନୁୱାନ୍ଥା (୪୬) ଗୁରୁତ୍ୱପୂର୍ଣ୍ଣ ଯୋଗଦାନ ଦେଇଥିଲେ।

ଚତୁର୍ଥ ଦିନର ଖେଳ ଶେଷ ସୁଦ୍ଧା ଶ୍ରୀଲଙ୍କା ୬ ୱିକେଟ୍ ହରାଇ ୨୨୯ ରନ୍ କରିଥିଲା ଏବଂ କେବଳ ୧୬ ରନ୍‌ରେ ଆଗୁଆ ଥିଲା। ଲାଗୁଥିଲା ପଞ୍ଚମ ଦିନର ପ୍ରଥମ ସେସନ୍‌ରେ ହିଁ ଭାରତୀୟ ବୋଲର ବାକି ୪ଟି ୱିକେଟ୍ ନେଇ ସହଜ ଲକ୍ଷ୍ୟକୁ ହାସଲ କରିନେବେ। ହେଲେ ଶେଷ ଦିନରେ ଶ୍ରୀଲଙ୍କାର ନିମ୍ନକ୍ରମ ବ୍ୟାଟରମାନେ ଭାରତୀୟ ବୋଲରଙ୍କୁ ସମ୍ପୂର୍ଣ୍ଣ ନିରାଶ କରି ୯୦ ଓଭରରୁ ଉର୍ଦ୍ଧ୍ଵ ବ୍ୟାଟିଂ କରିଥିଲେ।

ପଞ୍ଚମ ଦିନରେ ଶ୍ରୀଲଙ୍କା ମାତ୍ର ୩ଟି ୱିକେଟ୍ ହରାଇ ୨୦୦ ରନ୍ ଯୋଡ଼ିବାକୁ ସକ୍ଷମ ହୋଇଥିଲା। ଭାରତ ପକ୍ଷରୁ ଦ୍ୱିତୀୟ ଇନିଂସରେ ମାନବ ସୁଥାର ଓ ରବୀନ୍ଦ୍ର ଜାଡେଜା ସର୍ବାଧିକ ୩-୩ଟି ଲେଖାଏଁ ୱିକେଟ୍ ଅକ୍ତିଆର କରିଥିଲେ ହେଁ ଦଳକୁ ବିଜୟ ଦେବାରେ ଅସଫଳ ହୋଇଥିଲେ।