ନୂଆଦିଲ୍ଲୀ: ଆଫଗାନିସ୍ତାନରେ ପାକିସ୍ତାନର ଏୟାରଷ୍ଟ୍ରାଇକରେ ୪୦୦ ଲୋକଙ୍କ ମୃତ୍ୟୁ ଘଟିଛି। ପାକିସ୍ତାନର ଏହି ହମଲା କ୍ଷେତ୍ରୀୟ ଅଞ୍ଚଳରେ ଉତ୍ତେଜନା ସୃଷ୍ଟି କରିଛି। ଆଉ ଏହାର ପ୍ରଭାବ ଏବେ ପାକିସ୍ତାନ ସୁପର ଲିଗ ପାଇଁ ବଡ଼ ବିପଦ ସୃଷ୍ଟି କରିଛି। ଯଦି  PSL ଆରମ୍ଭ ହୁଏ, ତଥାପି ଖେଳାଳିଙ୍କ ସୁରକ୍ଷା ନେଇ ବଡ଼ ପ୍ରଶ୍ନ ଉଠିଛି। ଅଷ୍ଟ୍ରେଲିଆ କ୍ରିକେଟ ବୋର୍ଡ ପୂର୍ବରୁ ନିଜର ଖେଳାଳିମାନଙ୍କୁ ସତର୍କ ରହିବାକୁ ଚେତାବନୀ ଦେଇସାରିଛି। ଉଲ୍ଲେଖନୀୟ ଷ୍ଟିଭ୍ ସ୍ମିଥ୍, ଡେଭିଡ୍ ୱାର୍ଣ୍ଣର, ମାର୍ନସ୍ ଲାବୁସେନ ଏବଂ ଗ୍ଲେନ୍ ମ୍ୟାକ୍ସୱେଲ୍ ଭଳି ପ୍ରମୁଖ ଅଷ୍ଟ୍ରେଲିୟ ଖେଳାଳିମାନେ ଚଳିତ ବର୍ଷ ପାକିସ୍ତାନ ସୁପର ଲିଗର ପରବର୍ତ୍ତୀ ସିଜିନରେ ଖେଳିବାକୁ ଯାଉଛନ୍ତି।

PSLର ୧୧ତମ ସଂସ୍କରନ ମାର୍ଚ୍ଚ 26 ରେ ଆରମ୍ଭ ହେବାକୁ ଯାଉଛି। ଅଷ୍ଟ୍ରେଲିୟ ପ୍ରଶିକ୍ଷକ ଟିମ୍ ପେନ ଏବଂ ଜାସନ୍ ଗିଲେସ୍ପିଙ୍କୁ ଏହି ଲିଗରେ ଦେଖିବାକୁ ମିଳିବ। ଆଫଗାନିସ୍ତାନ ଏବଂ ପାକିସ୍ତାନ ମଧ୍ୟରେ ଉତ୍ତେଜନାପୂର୍ଣ୍ଣ ପରିସ୍ଥିତି ସତ୍ତ୍ଵେ ଅଷ୍ଟ୍ରେଲିଆ କ୍ରିକେଟ ବୋର୍ଡ ଏହାର ଖେଳାଳି ଏବଂ ପ୍ରଶିକ୍ଷକମାନଙ୍କୁ ପାକିସ୍ତାନ ଯାତ୍ରା କରିବାକୁ ଅନୁମତି ଦେଇଛି। କିନ୍ତୁ ଖେଳାଳିଙ୍କୁ ପେଶାୱାର ଯାତ୍ରାରୁ ନିବୃତ୍ତ ରହିବାକୁ  ପରାମର୍ଶ ଦେଇଛି ବୋର୍ଡ।

ଅଷ୍ଟ୍ରେଲିୟ ମିଡିଆ ଚ୍ୟାନେଲ 'କୋଡ୍ ସ୍ପୋର୍ଟସ୍' ଅନୁଯାୟୀ, ଅଷ୍ଟ୍ରେଲିୟ ଖେଳାଳିମାନେ PSL ଖେଳିବା ପାଇଁ ପାକିସ୍ତାନ ଯାତ୍ରା କରିପାରିବେ, କିନ୍ତୁ ସେମାନଙ୍କୁ ପେଶାୱାରରୁ ଦୂରେଇ ରହିବାକୁ ପରାମର୍ଶ ଦିଆଯାଇଛି। PSL ମ୍ୟାଚ୍ ପେଶାୱାରରେ ଖେଳାଯିବାର କାର୍ଯ୍ୟକ୍ରମ ଅଛି, କିନ୍ତୁ ଅଷ୍ଟ୍ରେଲିଆ କ୍ରିକେଟ ବୋର୍ଡ ପେଶାୱାରକୁ 'ନୋ ଟ୍ରାଭେଲ୍ ଜୋନ୍' ଘୋଷଣା କରିଛି।

ଏହା ମାର୍ଚ୍ଚ ୨୮ରେ ପେଶାୱାର ଜାଲମି ଏବଂ ରାୱଲପିଣ୍ଡି ମଧ୍ୟରେ ହେବାକୁ ଥିବା ମ୍ୟାଚ୍ ଉପରେ ବିପଦ ସୃଷ୍ଟି କରିଛି। ଉଭୟ ଦଳରେ ଅଷ୍ଟ୍ରେଲିୟ ଖେଳାଳି ଅଛନ୍ତି। ଅଷ୍ଟ୍ରେଲିୟ କ୍ରିକେଟ୍ ବୋର୍ଡ ଦ୍ଵାରା ଜାରି କରାଯାଇଥିବା ପରାମର୍ଶ ଆଧାରରେ, ଜେକ୍ ଫ୍ରେଜର ମ୍ୟାକଗର୍କ ଏବଂ ଆରୋନ୍ ହାର୍ଡି ମ୍ୟାଚ୍ ଖେଳି ନ ପାରନ୍ତି। 

ଅଷ୍ଟ୍ରେଲିୟ ଖେଳାଳିମାନଙ୍କୁ ମଧ୍ୟ ଆଶ୍ୱାସନା ଦିଆଯାଇଥିଲା ଯେ ଆବଶ୍ୟକ ପଡ଼ିଲେ ସେମାନଙ୍କ ପାଇଁ ବ୍ୟକ୍ତିଗତ ବିମାନ ବ୍ୟବସ୍ଥା କରାଯିବ। ଅନ୍ୟପଟେ ସମସ୍ତ ଆଫଗାନିସ୍ତାନ ଖେଳାଳି ପୂର୍ବରୁ ପାକିସ୍ତାନ ସୁପର ଲିଗରୁ ଓହରି ସାରିଛନ୍ତି। ମୁଜୀବ ଉର ରେହମାନ, ସେଦିକୁଲ୍ଲାହ ଅଟଲ ଏବଂ ମହମ୍ମଦ ନବିଙ୍କ ସମେତ ଅନେକ ଖେଳାଳି ନିଲାମ ପାଇଁ ପଞ୍ଜିକରଣ କରିଥିଲେ କିନ୍ତୁ ନିଲାମ ପୂର୍ବରୁ ଓହରି ଯାଇଛନ୍ତି।