ଧର୍ମଶାଳା: ଧର୍ମଶାଳାରେ ଖେଳା ଯାଇଥିବା ବର୍ଷା ବାଧାପ୍ରାପ୍ତ ପ୍ରଥମ ଦିନିକିଆରେ ଭାରତ ୭ ୱିକେଟରେ ଆଫଗାନିସ୍ତାନକୁ ହରାଇଛି । ରେହମନୁଲ୍ଲା ଗୁରବାଜଙ୍କ ଶତକୀୟ ଇନିଂସ ଉପରେ ଭାରି ପଡିଛି ଅଧିନାୟକ ଶୁଭମନ ଗିଲଙ୍କ ଅର୍ଦ୍ଧଶତକ । ପ୍ରଥମେ ବ୍ୟାଟିଂ କରିଥିବା ଆଫଗାନିସ୍ତାନ ଗୁରବାଜ ୧୦୨ ରନ ଇନିଂସ ବଳରେ ୨୪.୫ ଓଭରରେ ୧୯୪ ରନ କରିଥିଲା । ଜବାବରେ ଭାରତ ଶୁଭମନ ଗିଲଙ୍କ ୮୪ ରନ ବଳରେ ୨୨.୫ ଓଭରରେ ୩ ୱିକେଟ୍ ହରାଇ ବିଜୟ ଲକ୍ଷ୍ୟ  ହାସଲ କରି ନେଇଛି । ବିଜୟ ସହ ଭାରତ ତିନି ମ୍ୟାଚ୍ ବିଶିଷ୍ଟ ଦିନିକିଆ ସିରିଜରେ ୧-୦ରେ ଅଗ୍ରଣୀ ହାସଲ କରିଛି । 

ପ୍ରଥମେ ବ୍ୟାଟିଂ କରିବାକୁ ଓହ୍ଲାଇଥିବା ଆଫଗାନିସ୍ତାନର ଆରମ୍ଭ ଅତ୍ୟନ୍ତ ନିରାଶାଜନକ ରହିଥିଲା। ଦଳ ମାତ୍ର ୨୬ ରନ୍‌ରେ ୩ଟି ଗୁରୁତ୍ୱପୂର୍ଣ୍ଣ ଉଇକେଟ୍ ହରାଇ ସଙ୍କଟରେ ପଡ଼ିଥିଲା। ନିଜର ଡେବ୍ୟୁ ମ୍ୟାଚ୍ ଖେଳୁଥିବା ଗୁରନୁର ବ୍ରାର୍, ଇବ୍ରାହିମ ଜାଦ୍ରାନ (୧ রନ୍)ଙ୍କୁ ଆଉଟ୍ କରି ଭାରତକୁ ପ୍ରଥମ ସଫଳତା ଦେଇଥିଲେ। ଏହାପରେ ଅର୍ଶଦୀପ ସିଂ ଘାତକ ବୋଲିଂ କରି ସେଦିକୁଲ୍ଲା ଅଟଲ୍ (୩) ଏବଂ ରହମତ ଶାହା (୩)ଙ୍କୁ ଶସ୍ତାରେ ପେଭିଲିୟନ ପଠାଇଥିଲେ।

ତେବେ ଓପନର ରହମାନୁଲ୍ଲା ଗୁରବାଜ ଦମଦାର ଇନିଂସ ଖେଳିଥିଲେ। ସେ ଅଧିନାୟକ ହଶମତୁଲ୍ଲା ଶାହିଦିଙ୍କ ସହ ମିଶି ଚତୁର୍ଥ ଉଇକେଟ୍ ପାଇଁ ୧୧୬ ରନ୍‌ର ଗୁରୁତ୍ୱପୂର୍ଣ୍ଣ ଭାଗିଦାରୀ କରିଥିଲେ। ଗୁରବାଜ ମାତ୍ର ୫୧ ବଲ୍‌ରେ ୮ଟି ଚୌକା ଓ ୮ଟି ଛକା ସହାୟତାରେ ୧୦୨ ରନ୍‌ର ବିସ୍ଫୋରକ ଶତକ ହାସଲ କରିଥିଲେ। ସେ ମାତ୍ର ୪୮ ବଲ୍‌ରେ ନିଜର ଶତକ ପୂରଣ କରି ଆଫଗାନିସ୍ତାନ ପାଇଁ ଦିନିକିଆରେ ଦ୍ରୁତତମ ଶତକଧାରୀ ବ୍ୟାଟର ବନିଛନ୍ତି।

ଗୁରବାଜ ଆଉଟ୍ ହେବା ପରେ ଭାରତୀୟ ବୋଲରମାନେ ଜବରଦସ୍ତ ପ୍ରତ୍ୟାବର୍ତ୍ତନ କରିଥିଲେ। ନୀତିଶ କୁମାର ରେଡ୍ଡୀ ଗୁରବାଜଙ୍କୁ ବୋଲ୍ଡ କରିଥିଲେ। ଏହାପରେ ଡେବ୍ୟୁଟାଣ୍ଟ ହର୍ଷ ଦୁବେ ଚମତ୍କାର ବୋଲିଂ କରି ୩ଟି ଉଇକେଟ୍ ଚଟକାଇଥିଲେ। ଶେଷ ଓଭରରେ ଗୁରନୁର ବ୍ରାର୍ ଆଉ ୨ଟି ଉଇକେଟ୍ ନେଇ ଆଫଗାନିସ୍ତାନକୁ ୨୪.୫ ଓଭରରେ ୧୯ ୪ ରନ୍‌ରେ ଅଲ୍‌ଆଉଟ୍ କରିଦେଇଥିଲେ। ଗୁରନୁର ମଧ୍ୟ ନିଜ ପ୍ରଥମ ଆନ୍ତର୍ଜାତୀୟ ମ୍ୟାଚ୍‌ରେ ୩ଟି ଉଇକେଟ୍ ନେବାରେ ସଫଳ ହୋଇଛନ୍ତି।

ଅଧିନାୟକ ଗିଲ୍ ଓ କେଏଲ୍ ରାହୁଲଙ୍କ ମ୍ୟାଚ୍ ବିଜୟୀ ଇନିଂସ

୧୯୫ ରନ୍‌ର ବିଜୟ ଲକ୍ଷ୍ୟକୁ ପିଛା କରି ଭାରତୀୟ ଓପନର ରୋହିତ ଶର୍ମା ଏବଂ ଶୁଭମନ ଗିଲ୍ ସତର୍କତାର ସହ ସୁନ୍ଦର ଆରମ୍ଭ କରିଥିଲେ। କିନ୍ତୁ ଭୁଲ୍ ବୁଝାମଣା ଯୋଗୁଁ ରୋହିତ ଶର୍ମା (୧୬ ରନ୍) ରନ୍ ଆଉଟ୍ ହୋଇଯାଇଥିଲେ। ୪୬ ରନ୍‌ରେ ପ୍ରଥମ ୱିକେଟ ପଡ଼ିବା ପରେ ଗିଲ୍ ଓ ଈଶାନ କିଷନ ମିଶି ଦଳୀୟ ସ୍କୋରକୁ ଆଗକୁ ବଢ଼ାଇଥିଲେ। ଦୁହିଁଙ୍କ ମଧ୍ୟରେ ୭୦ ରନ୍‌ର ପାର୍ଟନରସିପ୍ ହୋଇଥିଲା। ଈଶାନ ୩୪ ରନ୍ କରି ରଶିଦ ଖାନଙ୍କ ବଲ୍‌ରେ ବୋଲ୍ଡ ହୋଇଥିଲେ।

ଉପ-ଅଧିନାୟକ ଶ୍ରେୟସ ଆୟର (୧୨) ନିରାଶ କରି ଜିୟାଉର ରହମାନଙ୍କ ଶିକାର ହୋଇଥିଲେ। କିନ୍ତୁ ଏହାପରେ କ୍ରିଜ୍‌କୁ ଆସିଥିବା କେଏଲ୍ ରାହୁଲ ମ୍ୟାଚ୍‌ର ମୋଡ଼ ବଦଳାଇ ଦେଇଥିଲେ। ରାହୁଲ ୨୦୫ରୁ ଅଧିକ ଷ୍ଟ୍ରାଇକ୍ ରେଟ୍‌ରେ ବ୍ୟାଟିଂ କରି ମାତ୍ର ୧୯ ବଲ୍‌ରେ ୩୯ ରନ୍‌ର ଏକ ଆକ୍ରମଣାତ୍ମକ ଇନିଂସ ଖେଳିଥିଲେ, ଯେଉଁଥିରେ ୪ଟି ଚୌକା ଓ ୩ଟି ଛକା ସାମିଲ ଥିଲା।

ଅନ୍ୟପଟେ ଶୁଭମନ ଗିଲ୍ ଦାୟିତ୍ୱବାନ ବ୍ୟାଟିଂ କରି ୬୬ ବଲ୍‌ରେ ୧୧ଟି ଚୌକା ଓ ୨ଟି ଛକା ସହ ୮୪ ରନ୍ କରି ଅପରାଜିତ ରହିଥିଲେ। କେଏଲ୍ ରାହୁଲ ବିଜୟୀ ରନ୍ ମାରି ଭାରତକୁ ୧୩ ବଲ୍ ବାକି ଥାଇ ୭ ଉଇକେଟରେ ଏକ ବଡ଼ ବିଜୟ ଦେଇଛନ୍ତି।