ନୂଆଦିଲ୍ଲୀ: IPL 2027 ପୂର୍ବରୁ ଭାରତୀୟ ପ୍ରିମିୟର ଲିଗ୍‌ରେ ଏକ ବଡ଼ ଖେଳାଳି ଅଦଳବଦଳକୁ ନେଇ କ୍ରିକେଟ୍ ମହଲରେ ଜୋରଦାର ଚର୍ଚ୍ଚା ଆରମ୍ଭ ହୋଇଛି। ମୁମ୍ବାଇ ଇଣ୍ଡିଆନ୍ସର ଅଧିନାୟକ ହାର୍ଦ୍ଦିକ ପାଣ୍ଡ୍ୟାଙ୍କ ବଦଳରେ ପଞ୍ଜାବ କିଙ୍ଗ୍ସର ଷ୍ଟାର୍ ବୋଲର ଅର୍ଶଦୀପ ସିଂହ ମୁମ୍ବାଇ ଦଳରେ ସାମିଲ ହୋଇପାରନ୍ତି। ଏହି ଟ୍ରେଡ୍ ଡିଲ୍‌କୁ ନେଇ ଉଭୟ ଫ୍ରାଞ୍ଚାଇଜ୍ ମଧ୍ୟରେ ସହମତି ହୋଇଥିବା ନେଇ ରିପୋର୍ଟ ପ୍ରକାଶ ପାଇଛି। ତେବେ ଏହା ଉପରେ ବିସିସିଆଇର ଆଧିକାରିକ ମଞ୍ଜୁରୀ ମିଳିବା ବାକି ରହିଛି।

ସ୍ପୋର୍ଟ୍ସ ତକ୍‌ର ରିପୋର୍ଟ ଅନୁସାରେ, ମୁମ୍ବାଇ ଇଣ୍ଡିଆନ୍ସ ଏବଂ ପଞ୍ଜାବ କିଙ୍ଗ୍ସ ଏହି ଟ୍ରେଡ୍‌ ସମ୍ପର୍କିତ କାଗଜପତ୍ର ପ୍ରସ୍ତୁତ କରି ବିସିସିଆଇ ନିକଟକୁ ପଠାଇଛନ୍ତି। ହାର୍ଦ୍ଦିକଙ୍କ ବଦଳରେ କେବଳ ଅର୍ଶଦୀପ ମୁମ୍ବାଇ ଆସିବେ ନା ଏହି ଡିଲ୍‌ରେ ଆଉ ଜଣେ ଖେଳାଳି ସାମିଲ ହେବେ, ତାହା ଏଯାଏଁ ସ୍ପଷ୍ଟ ହୋଇନାହିଁ। ଚର୍ଚ୍ଚା ଅନୁସାରେ, ପଞ୍ଜାବର ୱିକେଟ୍‌କିପର ବ୍ୟାଟର୍ ବିଷ୍ଣୁ ବିନୋଦ ମଧ୍ୟ ମୁମ୍ବାଇ ଦଳକୁ ଆସିପାରନ୍ତି। ଏହି ଟ୍ରେଡ୍‌ ପାଇଁ ହାର୍ଦ୍ଦିକ ଓ ଅର୍ଶଦୀପ ଉଭୟ ନିଜର ସହମତି ଦେଇଥିବା ମଧ୍ୟ ରିପୋର୍ଟରେ ଦାବି କରାଯାଇଛି।

ପଞ୍ଜାବରେ ହାର୍ଦ୍ଦିକଙ୍କୁ ନେଇ ବଢ଼ିବ ଚ୍ୟାଲେଞ୍ଜ

ହାର୍ଦ୍ଦିକ ପାଣ୍ଡ୍ୟାଙ୍କୁ ନେଇ ଗତ କିଛି ସପ୍ତାହ ଧରି ବିଭିନ୍ନ ଆଇପିଏଲ୍ ଫ୍ରାଞ୍ଚାଇଜ୍‌ର ଆଗ୍ରହ ଥିବା ଚର୍ଚ୍ଚା ହେଉଥିଲା। ଚେନ୍ନାଇ ସୁପର କିଙ୍ଗ୍ସ, କୋଲକାତା ନାଇଟ୍ ରାଇଡର୍ସ ଏବଂ ଦିଲ୍ଲୀ କ୍ୟାପିଟାଲ୍ସ ଭଳି ଦଳ ତାଙ୍କୁ ନେବାକୁ ଆଗ୍ରହୀ ଥିବା କୁହାଯାଉଥିଲା। ଏବେ ପଞ୍ଜାବ କିଙ୍ଗ୍ସ ସହ ତାଙ୍କ ନାମ ଯୋଡ଼ା ହେବା ପରେ ଏହି ଚର୍ଚ୍ଚା ଆହୁରି ଜୋର୍ ଧରିଛି।

ହାର୍ଦ୍ଦିକ ପଞ୍ଜାବ ଦଳରେ ସାମିଲ ହେଲେ ଦଳର ବୋଲିଂ ଅଲରାଉଣ୍ଡର ବିଭାଗରେ ବଡ଼ ପରିବର୍ତ୍ତନ ଆସିପାରେ। କାରଣ ପଞ୍ଜାବ ଦଳରେ ପୂର୍ବରୁ ମାର୍କସ ଷ୍ଟୋଇନିସ୍ ଓ ମାର୍କୋ ଜାନସେନ୍‌ଙ୍କ ଭଳି ଦକ୍ଷ ଅଲରାଉଣ୍ଡର ରହିଛନ୍ତି। ତିନି ଜଣ ଦ୍ରୁତ ବୋଲିଂ ଅଲରାଉଣ୍ଡରଙ୍କୁ ଏକାଠି ଚୂଡ଼ାନ୍ତ ଏକାଦଶରେ ସ୍ଥାନ ଦେବା ଦଳ ପାଇଁ ସହଜ ହେବ ନାହିଁ। ତେଣୁ ଏହି ଟ୍ରେଡ୍ ଚୂଡ଼ାନ୍ତ ହେଲେ ଷ୍ଟୋଇନିସ୍ କିମ୍ବା ଜାନସେନ୍‌ଙ୍କ ମଧ୍ୟରୁ କାହାକୁ ଦଳ ଛାଡ଼ିପାରେ ବୋଲି ମଧ୍ୟ ଆକଳନ କରାଯାଉଛି।

ଏହି ଅଦଳବଦଳ ମଧ୍ୟରେ ରିଷଭ ପନ୍ତଙ୍କ ଦିଲ୍ଲୀ କ୍ୟାପିଟାଲ୍ସକୁ ଫେରିବା ଏବଂ କୁଲଦୀପ ଯାଦବଙ୍କ ଲକ୍ଷ୍ନୌ ସୁପର ଜାଏଣ୍ଟସ୍‌ରେ ସାମିଲ ହେବା ଚର୍ଚ୍ଚାରେ ରହିଛି। ସେହିପରି ଜିଶାନ ଅନସାରୀ ଦିଲ୍ଲୀ ପାଇଁ ଖେଳିବାକୁ ଥିବା ବେଳେ ଲିଆମ୍ ଲିଭିଙ୍ଗଷ୍ଟୋନ୍ ଓ ଜ୍ୟାକ୍ ଏଡୱାର୍ଡସ୍ ଚେନ୍ନାଇ ସୁପର କିଙ୍ଗ୍ସରେ ସାମିଲ ହେବାର ଖବର ରହିଛି। ଅନ୍ୟପଟେ ଖଲିଲ ଅହମ୍ମଦ, ନାଥନ ଏଲିସ୍ ଓ ଟି. ନଟରାଜନଙ୍କ ନାମ ସନରାଇଜର୍ସ ହାଇଦ୍ରାବାଦ ସହ ଯୋଡ଼ା ହୋଇଛି।

ଏବେ ସମସ୍ତଙ୍କ ନଜର ହାର୍ଦ୍ଦିକ-ଅର୍ଶଦୀପ ଟ୍ରେଡ୍ ଉପରେ। ବିସିସିଆଇର ଅନୁମୋଦନ ମିଳିଲେ IPL 2027ରେ ଉଭୟ ଖେଳାଳିଙ୍କ ନୂଆ ଦଳ ଓ ନୂଆ ଭୂମିକା ଦେଖିବାକୁ ମିଳିପାରେ। ତେବେ ଆଧିକାରିକ ଘୋଷଣା ନହେବା ପର୍ଯ୍ୟନ୍ତ ଏହି ଟ୍ରେଡ୍‌କୁ ନିଶ୍ଚିତ ଖବର ଭାବେ ଗ୍ରହଣ କରିବା ଠିକ୍ ହେବ ନାହିଁ।