ନୂଆଦିଲ୍ଲୀ: କ୍ରୀଡ଼ାର ମହାକୁମ୍ଭ ପ୍ୟାରିସ୍ ଅଲିମ୍ପିକ୍ର ସମୟ ପାଖେଇ ଆସୁଛି। ଆଉ ମାତ୍ର ୮ ଦିନ ପରେ ଏହି ଅନ୍ତର୍ଜାତୀୟ କ୍ରୀଡ଼ା ପ୍ରତିଯୋଗିତା ଆରମ୍ଭ ହୋଇଯିବ। ବିଶ୍ବର ବଛାବଛା ଖେଳାଳିଙ୍କ ମଧ୍ୟରେ ପ୍ରତିଦ୍ବନ୍ଦ୍ବୀତା ହେବ। ଏଥର ପ୍ୟାରିସ୍ ଅଲିମ୍ପିକ୍ରେ ଭାରତରୁ ୧୧୭ ଜଣ ଖେଳାଳି ପ୍ରତିନିଧିତ୍ବ କରୁଛନ୍ତି। କ୍ରୀଡ଼ା ମନ୍ତ୍ରାଳୟ ପକ୍ଷରୁ ଏହି ସୂଚନା ଦିଆଯାଇଛି। ଖେଳାଳିଙ୍କ ବ୍ୟତୀତ ୬୮ ପ୍ରଶିକ୍ଷକ, ୫୦ ସପୋର୍ଟ ଷ୍ଟାଫ୍ ଓ ୧୩ କ୍ରୀଡ଼ା ବିଜ୍ଞାନ ବିଶେଷଜ୍ଞ ବି ପ୍ୟାରିସ୍ ଯିବେ।
ଲଣ୍ଡନ ଅଲିମ୍ପିକ୍ସର କାଂସ୍ୟ ପଦକ ବିଜେତା ତଥା ପୂର୍ବତନ ବନ୍ଧୁକଚାଳନାକାରୀ ଗଗନ ନାରଙ୍ଗଙ୍କୁ ଦଳର ପ୍ରମୁଖ କରାଯାଇଛି। ସପୋର୍ଟ ଷ୍ଟାଫଙ୍କ ଖର୍ଚ୍ଚ ମଧ୍ୟ ସରକାର ଦେବେ। ମୋଟ ୧୧୭ ଜଣ ଖେଳାଳିଙ୍କ ତାଲିକାରେ ସର୍ବାଧିକ ଦୌଡ଼କୁଦ ଓ ବନ୍ଧୁକଚାଳନା ବର୍ଗରୁ ଅଛନ୍ତି। ୨୯ ଜଣ ଦୌଡ଼କୁଦ ଖେଳାଳିଙ୍କ ମଧ୍ୟରେ ୧୧ ଜଣ ମହିଳା ଓ ୧୮ ଜଣ ପୁରୁଷ ଅଛନ୍ତି। ସେହିପରି ବନ୍ଧୁକଚାଳନାରେ ୨୧ ଜଣ ଖେଳାଳି ଭାରତରୁ ଅଂଶଗ୍ରହଣ କରୁଛନ୍ତି। ହକିରେ ୧୯ ଜଣିଆ ଟିମ୍ ଯୋଗେଦେବେ।
କ୍ରୀଡ଼ା ମନ୍ତ୍ରାଳୟ ପକ୍ଷରୁ କୁହାଯାଇଛି ଯେ, ଭାରତରୁ ଟେବୁଲ ଟେନିସରେ ୮, ବ୍ୟାଡମିଣ୍ଟନରେ ଦୁଇ ଥର ଅଲିମ୍ପିକ୍ସ ପଦକ ବିଜୟିନୀ ପିଭି ସିନ୍ଧୁଙ୍କ ସମେତ ୭ ଜଣ ଖେଳାଳି ଅଂଶଗ୍ରହଣ କରିବେ। ସେହିପରି ରେସଲିଙ୍ଗରେ ୬ ଜଣ, ତୀରନ୍ଦାଜୀରେ ୬, ବକ୍ସିରେ ୬, ଗୋଲ୍ଫରେ ୪, ଟେନିସରେ ୩, ସନ୍ତରଣରେ ୨, ସୋଲିଂ ପାଇଁ ୨ ଜଣ ଖେଳାଳି ଚୟନିତ ହୋଇଛନ୍ତି।
ବନ୍ଧୁକଚାଳନାରେ ୧୧ ମହିଳା ଓ ୧୦ ପୁରୁଷ ଖେଳାଳି ଅଛନ୍ତି। ଟେବୁଲ ଟେନିସରେ ପୁରୁଷ ଓ ମହିଳା ବର୍ଗରୁ ୪-୪ ଖେଳାଳି ଭାଗ ନେଉଛନ୍ତି। ଟୋକିଓ ଅଲିମ୍ପିକ୍ସରେ ରୌପ୍ୟ ପଦକ ବିଜୟିନୀ ମୀରାବାଇ ଚାନୁ ଦଳରେ ସାମିଲ ହୋଇଥିବା ଏକମାତ୍ର ୱେଟଲିଫ୍ଟର। ସେ ମହିଳାଙ୍କ ୪୯ କିଲୋ ବର୍ଗରେ ଅଂଶଗ୍ରହଣ କରିବେ। ଟୋକିଓ ଅଲିମ୍ପିକ୍ସରେ ଭାରତରୁ ୧୧୯ ଜଣ ଖେଳାଳି ଅଂଶଗ୍ରହଣ କରିଥିଲେ।