ନୂଆଦିଲ୍ଲୀ: ଏସିଆ କପ୍ ୨୦୨୫ ଆରମ୍ଭ ହେବାକୁ ମାତ୍ର ଆଉ କିଛି ଦିନ ବାକି ରହିଛି । ହେଲେ ଏବେ ମଧ୍ୟ ଦଳରେ କାହିଁକି ଶ୍ରେୟସ ଆୟରଙ୍କୁ ସାମିଲ କରାଗଲା ନାହିଁ ତାକୁ ନେଇ ଚର୍ଚ୍ଚା ଜାରି ରହିଛି । ଟି-୨୦ ଫର୍ମାଟରେ ଦମଦାର ପ୍ରଦର୍ଶନ ସତ୍ତ୍ୱେ ତାଙ୍କୁ ମୁଖ୍ୟ ଦଳ ତ ଦୂରର କଥା ରିଜର୍ଭ ଖେଳାଳି ଭାବେ ମଧ୍ୟ ଚୟନ କରାଯାଇ ନାହିଁ । ଏହାକୁ ନେଇ କ୍ରିକେଟ୍ ବିଶେଷଜ୍ଞ ନିଜର ମତ ରଖୁଛନ୍ତି । ଏହି କ୍ରମରେ ଇଂଲଣ୍ଡର ଫୂର୍ବତନ ସ୍ପିନର ମଣ୍ଟି ପାନେସର ଏମିତି ବୟାନ ଦେଇଛନ୍ତି ଯେଉଁଥିରେ ଭାରତୀୟ କ୍ରିକେଟରେ ନୂଆ ବିତର୍କକୁ ଜନ୍ମ ଦେଇଛି ।
ସେ କହିଛନ୍ତି ଶ୍ରେୟସ ଆୟରଙ୍କ ଅଧିନାୟକତ୍ୱ ଦକ୍ଷତା ଏବେ ତାଙ୍କ ପାଇଁ କାଳ ପାଲଟିଛି । ଏହି କାରଣରୁ ତାଙ୍କୁ ଦଳରେ ସ୍ଥାନ ମିଳୁନି । ଶ୍ରେୟସ ଆୟରଙ୍କ ନେତୃତ୍ୱରେ କୋଲକାତା ନାଇଟ ରାଇଡର୍ସ ୨୦୨୪ ଆଇପିଏଲ ଟ୍ରଫି ଜିତିଲା । ତାଙ୍କ ଅଧିନାୟକତ୍ୱରେ ପଞ୍ଜାବ କିଙ୍ଗ୍ସ ଆଇପିଏଲ୍ ୨୦୨୫ର ଫାଇନାଲ୍ ପର୍ଯ୍ୟନ୍ତ ପହଞ୍ଚିଥିଲା । ଏପରିକି ଘରୋଇ କ୍ରିକେଟରେ ମଧ୍ୟ ଶ୍ରେୟସଙ୍କ ଅଧିନାୟକତ୍ୱର ବିଶେଷ ଅନୁଭବ ରହିଛି ।
ମଣ୍ଟି ପାନେସର ଇଣ୍ଡିଆ ଟୁଡେ ସହ ଆଲୋଚନା ବେଳେ କହିଛନ୍ତି ଯେ, ଶ୍ରେୟସ ଆୟରଙ୍କୁ ଭାରତୀୟ ଦଳରେ ସ୍ଥାନ ମିଳିବାରେ ଏଥିପାଇଁ ସମସ୍ୟା ହେଉଛି କାରଣ ତାଙ୍କ ନିକଟରେ ନେତୃତ୍ୱର ଦକ୍ଷତା ରହିଛି । ବୋଧହୁଏ ଦଳ ଏହା ଉପରେ କାମ କରୁଛି । ଚୟନକର୍ତ୍ତା ବୋଧହୁଏ ଯୁବ ଖେଳାଳିଙ୍କୁ ଦଳରେ ଆଣିବାକୁ ଚେଷ୍ଟା କରୁଛନ୍ତି । ଯଦ୍ୱାରା ଗମ୍ଭୀର ସହଜରେ ସମ୍ଭାଳି ପାରିବେ ।
ସେ ଏହା ମଧ୍ୟ କହିଛନ୍ତି, ମୋ ମତରେ ଯଦି ଶ୍ରେୟସ ରନ କରୁଛନ୍ତି ତେବେ ତାଙ୍କୁ ଖେଳାଇବା ଉଚିତ୍ । ଯଦି ପ୍ରତିଭା କଥା କହିବା ତେବେ ତାଙ୍କ ନିକଟରେ ଏହା ଭରପୂର ରହିଛି । ମୋତେ ଲାଗୁଛି ଭାରତ ପାଖରେ ପୂର୍ବରୁ ଏତେ ଭାଗ୍ୟଶାଳୀ ନ ଥିଲା, ଯାହା ଏବେ ୨ରୁ ୩ ଟିମ୍ ଗଠନ କରି ଖେଳି ପାରିବ ।