ନୂଆଦିଲ୍ଲୀ: ରୋହିତ ଶର୍ମା ଓ ବିରାଟ କୋହଲି ୨୦୦୭ ବିଶ୍ୱକପ୍ ଖେଳିବେ କି ନାହିଁ ସମସ୍ତ କ୍ରିକେଟ୍ ପ୍ରେମୀଙ୍କ ମନରେ ଏହି ପ୍ରଶ୍ନ ଚାଲିଛି । ପ୍ରଥମେ କୁହାଯାଉଥିଲା ଅଷ୍ଟ୍ରେଲିଆ ବିପକ୍ଷ ସିରିଜ୍ ଦୁଇ ଖେଳାଳିଙ୍କ ପାଇଁ ଶେଷ ସିରିଜ୍ ହୋଇପାରେ । ମାତ୍ର ଶେଷ ଦିନିକିଆରେ ରୋହିତଙ୍କ ଶତକ ଓ କୋହଲିଙ୍କ ଅର୍ଦ୍ଧଶତକ ହାସଲ କରି ସେମାନଙ୍କର ସମାଲୋଚକଙ୍କ ମୁହଁ ବନ୍ଦ କରି ଦେଇଛନ୍ତି । ଏବେ ନଭେମ୍ବର ୩୦ରୁ ଆରମ୍ଭ ହେଉଥିବା ଦକ୍ଷିଣ ଆଫ୍ରିକା ବିପକ୍ଷ ଦିନିକିଆ ସିରିଜ୍ ପାଇଁ ରୋହିତ ଓ ବିରାଟ ପ୍ରସ୍ତୁତ । ସଦ୍ୟତମ ରିପୋର୍ଟ ଅନୁଯାୟୀ ଦକ୍ଷିଣ ଆଫ୍ରିକା ବିପକ୍ଷ ସିରିଜ୍ ପରେ ବିସିସିଆଇ କୋଚ୍ ଗମ୍ଭୀର ଓ ମୁଖ୍ୟ ଚୟନକର୍ତ୍ତା ଅଜିତ ଅଗରକରଙ୍କ ସହ ରୋହିତ ଶର୍ମା ଓ ବିରାଟ କୋହଲିଙ୍କ ଭବିଷ୍ୟତ ଉପରେ ବୈଠକ କରିବ ।
ଟାଇମ୍ସ ଅଫ ଇଣ୍ଡିଆ ରିପୋର୍ଟ ଅନୁଯାୟୀ, ବିସିସିଆଇର ଶୀର୍ଷ ଅଧିକାରୀ, କୋଚ୍ ଗମ୍ଭୀର ଓ ମୁଖ୍ୟ ଚୟନକର୍ତ୍ତା ଅଜିତ ଅଗରକର ଆସନ୍ତା ସପ୍ତାହରେ ତୃତୀୟ ଦିନିକିଆ ପାଇଁ ଟିମ୍ ଅହମ୍ମଦାବାଦ ପହଞ୍ଚିବା ପରେ ଏକା ସଙ୍ଗେ ବୈଠକ କରିପାରନ୍ତି । କାରଣ ରୋହିତ ଓ କୋହଲି ଏ ପର୍ଯ୍ୟନ୍ତ ପରବର୍ତ୍ତୀ ଦିନିକିଆ ବିଶ୍ୱକପ ପାଇଁ ଟିମର ପ୍ରସ୍ତୁତି ବିଷୟରେ ଆଲୋଚନା କରି ନାହାନ୍ତି । ତେଣୁ ବୋର୍ଡ ପକ୍ଷରୁ ପ୍ରସ୍ତାବ ଆସିଛି ଯେ, ଟିମ୍ ମ୍ୟାନେଜମେଣ୍ଟ ଏହି ଦୁଇ ଖେଳାଳିଙ୍କ ବ୍ୟାକଅପ ଖେଳାଳିଙ୍କ ଚିହ୍ନଟ କରିବା ଉପରେ କାମ କରାଯାଉ ।
ବିସିସିଆଇର ଜନୈକ ଅଧିକାରୀ କହିଛନ୍ତି, ଏହା ବହୁତ ଜରୁରୀ ଯେ, ରୋହିତ ଓ କୋହଲିଙ୍କ ପରି ଖେଳାଳିଙ୍କୁ ଏହା ସ୍ପଷ୍ଟ ଭାବେ ଜଣାଯାଉ ଯେ, ତାଙ୍କଠୁ କଣ ଆଶା କରାଯାଇ ପାରିବ । ବର୍ତ୍ତମାନର ମ୍ୟାନେଜମେଣ୍ଟ ତାଙ୍କର ଭୂମିକାକୁ କେଉଁ ନଜରରେ ଦେଖୁଛନ୍ତି । ଦୁଇ ଖେଳାଳି କେବଳ ଏକ ଅନିଶ୍ଚିତତା ସହିତ ଖେଳି ପାରିବେ ନାହିଁ । ଉଭୟଙ୍କୁ ନେଇ ଏକ ଯୋଜନା ରହିବା ଦରକାର ବୋଲି ବିସିସିଆଇ ପକ୍ଷରୁ ପ୍ରକାଶ । ବିସିିସିଆଇ ଏହା ମଧ୍ୟ କହିଛି ଦୁଇ ଖେଳାଳି କେବଳ ନିଜର ଫିଟନେସ୍ ଏବଂ ପ୍ରଦର୍ଶନ ଉପରେ ଧ୍ୟାନ ଦିଅନ୍ତୁ ।
Also read: ଟି-୨୦ ପାଇଁ ପ୍ରସ୍ତୁତି ଜୋରଦାର, ବାରବାଟୀରେ କମିବ ପାଖାପାଖି ୩ ହଜାର ସିଟ୍