ଗତ କିଛି ଦିନ ତଳେ ନ୍ୟୁରାଲିଙ୍କ କମ୍ପାନୀକୁ ଐତିହାସିକ ସଫଳତା ମିଳିଥିବା ବେଳେ ଏହା ଇତିହାସରେ ପ୍ରଥମ ଥର ପାଇଁ ମାନବ ମସ୍ତିଷ୍କରେ ସଫଳ ଭାବେ ଲିଙ୍କ କରିଥିଲା ବ୍ରେନ ଚିପ୍। ଏଲନ୍ ମସ୍କଙ୍କ କମ୍ପାନୀ ନ୍ୟୁରାଲିଙ୍କ ମାଧ୍ୟମରେ ଉନ୍ନତ ଜ୍ଞାନକୌଶଳ ପ୍ରୟୋଗ ଏହି ବ୍ରେନ ଚିପ୍ ତିଆରି କରାଯାଇଥିବା ବେଳେ ଆଉ ଏକ ସଫଳତା ହାସଲ କରିଛନ୍ତି ନ୍ୟୁରାଲିଙ୍କର ବୈଜ୍ଞାନିକ ମାନେ। ଏହି ବ୍ରେନ ଚିପ୍ ଦ୍ୱାରା ଜଣେ ପକ୍ଷାଘାତ ରୋଗୀ କମ୍ପ୍ୟୁଟର ନିୟନ୍ତ୍ରଣ କରିବା ସମୟରେ ତାଙ୍କ ଚିନ୍ତାଧାରା ବ୍ୟବହାର କରି ଚେସ୍ ଖେଳିଛନ୍ତି। 

ସୂଚନାଯୋଗ୍ୟ ଯେ, ୮ ବର୍ଷ ପୂର୍ବେ ସେ ଏକ ଭୟଙ୍କର ଦୁର୍ଘଟଣାରେ ୨୯ ବର୍ଷୀୟ ନୋଲାଣ୍ଡ ଆର୍ବାଗ ନାମକ ଜଣେ ବ୍ୟକ୍ତି କାନ୍ଧରୁ ତଳକୁ ପକ୍ଷାଘାତରେ ଆକ୍ରାନ୍ତ ହୋଇଯାଇଥିଲେ। ସେଥିପାଇଁ ଚଳିତ ବର୍ଷ ଜାନୁଆରୀରେ ତାଙ୍କ ମସ୍ତିଷ୍କରେ ଏକ ନ୍ୟୁରାଲିଙ୍କ ବ୍ରେନ ଚିପ୍ ଲଗାଯାଇଥିଲା। ତେବେ ନିକଟରେ ସେ ଏହି ଚିପ୍ ସହାୟତାରେ କମ୍ପ୍ୟୁଟର କର୍ସର୍‌ ନିୟନ୍ତ୍ରଣ କରି ବେଶ୍ କିଛି ସମୟ ଚେସ୍ ଖେଳିଛନ୍ତି। ଦଶମ ଶ୍ରେଣୀରୁ ସେ ଚେସ୍ ଖେଳିବା ଆରମ୍ଭ କରିଥିବା ବେଳେ ଏହି ଭୟଙ୍କର ଦୁର୍ଘଟଣା ପରେ ସେ ଚେସ୍‌ ଖେଳିବା ବନ୍ଦ କରିଥିଲେ କିନ୍ତୁ ବର୍ତ୍ତମାନ ସେ ପୁଣି ଖେଳିଛନ୍ତି। ଏହି ଘଟଣା ସହ ଜଡିତ ଏକ ଭିଡିଓ ଦ୍ୱାରା ସାମାଜିକ ଗଣମାଧ୍ୟମ ‘X’ ରେ ସେୟାର କରାଯାଇଛି।  

ସୂଚନାଯୋଗ୍ୟ ଯେ, ୨୦୧୬ ରେ ମେଡିକାଲ୍ ରିସର୍ଚ୍ଚ ୟୁନିଟ୍ ଭାବରେ ଏଲନ୍‌ ମସ୍କଙ୍କ ଦ୍ୱାରା ନ୍ୟୁରାଲିଙ୍କ ପ୍ରତିଷ୍ଠା କରାଯାଇଥିଲା। ଏହାର ଉଦ୍ଦେଶ୍ୟ ଥିଲା ଭିନ୍ନକ୍ଷମମାନେ ଜ୍ଞାନକୌଶଳ ସହାୟତାରେ ବିଶ୍ବବାସୀଙ୍କ ସହ ଯୋଗାଯୋଗ ସ୍ଥାପନ କରିବା। ଏହି ଟେକ୍ନୋଲୋଜିରେ ଏକ ଅତ୍ୟାଧୁନିକ ପ୍ରତିରୋପଣ ପ୍ରଣାଳୀ ଅନ୍ତର୍ଭୁକ୍ତ ଏବଂ ଏଥିରେ ଏକ ରୋବଟ୍ ମନୁଷ୍ୟ ମସ୍ତିଷ୍କରେ ସୂତା ପରି ଇଲେକ୍ଟ୍ରୋଡ୍ ଭର୍ତ୍ତି କରି ସ୍ନାୟୁର କାର୍ଯ୍ୟକଳାପ ମଧ୍ୟରେ ଯୋଗାଯୋଗକୁ ସକ୍ଷମ କରିଥାଏ। ସେପ୍ଟେମ୍ବର ୨୦୨୩ ରେ ମସ୍କଙ୍କ ଏହି କମ୍ପାନୀ ପରୀକ୍ଷା ପାଇଁ ଅନୁମତି ପାଇଥିଲା। ଗବେଷକ ଦଳ କହିଛନ୍ତି, ଏହି ବ୍ରେନ ଚିପ୍ କୁ ମାନବ ମସ୍ତିଷ୍କରେ ଲିଙ୍କ କରିବା ଦ୍ୱାରା ବିଭିନ୍ନ ସ୍ନାୟୁଜନିତ ତଥା ମନୋବିଜ୍ଞାନ ସମ୍ବନ୍ଧିତ ରୋଗର ଚିକିତ୍ସା ସମ୍ଭବ ହୋଇ ପାରିବ ବୋଲି ଆଶା କରା ଯାଉଛି।

ଅଧିକ ପଢନ୍ତୁ: ବୌଦ୍ଧ ଜିଲ୍ଲାପାଳଙ୍କ ମାରଡା ଗାଁ ପରିଦର୍ଶନ