ଭୁବନେଶ୍ୱର: ଓଡ଼ିଶାରେ ଆଉ ଏକ ଆଞ୍ଚଳିକ ଦଳ ଗଢ଼ି ଉଠିଛି । ଲୋକାର୍ପିତ ହୋଇଛି ଓଡ଼ିଶା ଜନତା କଂଗ୍ରେସ । ଦଳର ମୂଳଦୁଆ ସ୍ଥାପନ ହେଉ ହେଉ ସରକାର ବିରୁଦ୍ଧରେ ଗର୍ଜିଛନ୍ତି ଦଳର ପ୍ରତିଷ୍ଠାତା ମହମ୍ମଦ ମୋକିମ । ସୁଯୋଗ ପାଇ ନଥିବା ଲୋକଙ୍କୁ ସୁଯୋଗ ଦେଇ ପ୍ରତିଷ୍ଠିତ କରିବାକୁ ଲକ୍ଷ୍ୟ ରଖିଛି ଓଜେସି । ଆଉ ଆଗାମୀ ଦିନରେ ଓଡ଼ିଶାର ହକ୍ ପାଇଁ ସରକାରଙ୍କ ବିରୁଦ୍ଧରେ ସ୍ୱର ଉତ୍ତୋଳନ କରିବ ବୋଲି ପ୍ରଥମ ଦିନରୁ ରଣହୁଁକାର ଦେଇଛନ୍ତି ମୋକିମ । 

ଗୋଟିଏ ମଞ୍ଚରେ ସମସ୍ତ ଧର୍ମାବଲମ୍ବୀ 

ରାଜଧାନୀ ଭୁବନେଶ୍ୱର ପ୍ରଦର୍ଶନୀ ପଡ଼ିଆ ଓଡ଼ିଶା ଜନତା କଂଗ୍ରେସର ଲୋକାର୍ପଣ ଉତ୍ସବ ଅନୁଷ୍ଠିତ ହୋଇଯାଇଛି । କାର୍ଯ୍ୟକ୍ରମରେ ହଜାର ହଜାର ସଂଖ୍ୟାରେ କର୍ମୀଙ୍କୁ ଦେଖିବାକୁ ମିଳିଛି । ଯାହା ଶାସକ ଠାରୁ ଆରମ୍ଭ କରି ବିରୋଧୀ ପର୍ଯ୍ୟନ୍ତ ସମସ୍ତଙ୍କୁ ଆଶ୍ଚର୍ଯ୍ୟ କରିଛି । ସେହିପରି ମଞ୍ଚରେ ସର୍ବଧର୍ମର ସମନ୍ୱୟ ଦେଖିବାକୁ ମିଳିଛି । ମହିମା ଅଲେଖ ଠାରୁ ଆରମ୍ଭ କରି ହିନ୍ଦୁ, ମୁସଲିମ, ଖ୍ରୀଷ୍ଟିଆନ ଏବଂ ଶିଖ୍ ଧର୍ମାବଲମ୍ବୀଙ୍କୁ ଗୋଟିଏ ମଞ୍ଚରେ ଦେଖିବାକୁ ମିଳିଛି । ଯାହା ସମସ୍ତଙ୍କ ଧ୍ୟାନ ଆକର୍ଷଣ କରିଛି । ସେହିପରି ବାପା ମୋକିମଙ୍କ ନୂଆ ଦଳର ଉଦଘାଟନୀ କାର୍ଯ୍ୟରେ ଯୋଗ ଦେଇଛନ୍ତି କଟକ-ବାରବାଟୀ ବିଧାୟିକା ତଥା ଝିଅ ସୋଫିଆ ଫିର୍ଦ୍ଦୋସ୍ । 

ବିଜେଡ଼ି ଓ ବିଜେପି ସରକାରକୁ ଟାର୍ଗେଟ୍ 

ପ୍ରଥମ ଦିନରେ ମୋକିମଙ୍କୁ ଆକ୍ରମଣାତ୍ମକ ଢଙ୍ଗରେ ଦେଖିବାକୁ ମିଳିଛି । ସେ ତାଙ୍କ ଅଭିଭାଷଣରେ ଖୁବ୍ ବର୍ଷିଛନ୍ତି । ଯେଉଁମାନଙ୍କୁ ଅନ୍ୟ ଦଳରେ ସୁଯୋଗ ମିଳି ନାହିଁ ସେହିମାନଙ୍କୁ ସୁଯୋଗ ଦେବ ଓଜେସି । ନୂଆପିଢ଼ୀର ଯୁବକଙ୍କୁ ନେଇ ଦଳର ସୃଷ୍ଟି ହୋଇଛି । ଓଡ଼ିଶା ରାଜନୈତିକ ପଟ୍ଟଚିତ୍ରରେ ଆଉ ଏକ ଫର୍ଦ୍ଦ ଯୋଡ଼ି ହୋଇଛି । ପ୍ରଥମେ ମୋକିମ ସମସ୍ତ ବୀର ପୁତ୍ରଙ୍କୁ ମନେ ପକାଇ ଶ୍ରଦ୍ଧାଞ୍ଜଳି ଦେଇଛନ୍ତି । ସେମାନଙ୍କ ପ୍ରେରଣାରେ ଓଡ଼ିଶା ଜନତା କଂଗ୍ରେସର ସୃଷ୍ଟି ହୋଇଛି । ମୋକିମ ପୂର୍ବ ବିଜେଡ଼ି ସରକାର ଏବଂ ଏବେକାର ବିଜେପି ସରକାର ଉପରେ ବର୍ଷିଛନ୍ତି । ସେ କହିଛନ୍ତି ଯେ ଦୁଇଟି ସରକାର ଗୋଟିଏ ମୁଦ୍ରା ଦୁଇ ପାର୍ଶ୍ୱ । ସରକାର ପରିବର୍ତ୍ତନ ହେଲା କିନ୍ତୁ ଢାଞ୍ଚାରେ ପରିବର୍ତ୍ତନ ହୋଇନାହିଁ । ଖଣି, ପାଣି, ଶିଳ୍ପକୁ ନେଇ ସରକାରଙ୍କୁ ଟାର୍ଗେଟ୍ କରିଛନ୍ତି । ଓଜେସି ଓଡ଼ିଶାବାସୀଙ୍କ ସ୍ୱର ହେବ ବୋଲି ସେ କହିଛନ୍ତି । 

ସେହିପରି ଯୁବ କୈନ୍ଦ୍ରିକ ନୂଆ ଓଡ଼ିଶା ଗଠନ କରିବାକୁ ଦଳ ସହ ଯୋଡ଼ିବାକୁ ଯୁବବର୍ଗଙ୍କୁ ଆହ୍ୱାନ କରିଛନ୍ତି ମୋକିମ । ଏହି ଯୁବ ବର୍ଗ ହିଁ ଦଳକୁ ଆଗକୁ ବାଟ କଢ଼େଇ ନେବ । ସେହିପରି ମୋକିମ କହିଥିଲେ ଯେ ତାଙ୍କ ଦଳ ସମସ୍ତ ଧର୍ମକୁ ସୁଯୋଗ ଦେବ । ଓଡ଼ିଶାରେ ସମସ୍ତ ଧର୍ମର ନେତା ନେତୃତ୍ୱ ସୃଷ୍ଟି ହେବ । ଏପରିକି ତାଙ୍କ ଦଳ ଭାରତୀୟ ଜନତା ପାର୍ଟିର ବିକଳ୍ପ ହେବ ବୋଲି ଦମ୍ଭୋକ୍ତି ପ୍ରକାଶ କରିଛନ୍ତି । 

ଏହି ଅବସରରେ ସମସ୍ତ ବରିଷ୍ଠ ସାମ୍ବାଦିକମାନଙ୍କୁ ମଧ୍ୟ ସମ୍ବର୍ଦ୍ଧିତ କରାଯାଇଥିଲା ।