ନୂଆଦିଲ୍ଲୀ: ଲୋକସଭା ବିରୋଧୀ ଦଳ ନେତା ରାହୁଲ ଗାନ୍ଧୀଙ୍କ ପାଇଁ ପୁଣି ଥରେ ଏକ ବଡ଼ ଅଡ଼ୁଆ ସୃଷ୍ଟି ହୋଇଛି। ତାଙ୍କ ବିରୋଧରେ ଏକ ସାଂଘାତିକ ଅଭିଯୋଗ ଆଣି ପୋଲିସର ଦ୍ୱାରସ୍ଥ ହୋଇଛନ୍ତି ଜଣେ ମହିଳା ସାମ୍ବାଦିକା।

ନୂଆଦିଲ୍ଲୀ ଡିସିପିଙ୍କ ନିକଟରେ ସାମ୍ବାଦିକା ଋଚା ପରାଶର ଏକ ଲିଖିତ ଅଭିଯୋଗ ଦାଖଲ କରିଛନ୍ତି। ଏଥିରେ ରାହୁଲ ଗାନ୍ଧୀ ଏବଂ ଅନ୍ୟ କିଛି ବ୍ୟକ୍ତିଙ୍କ ବିରୋଧରେ ତୁରନ୍ତ ଏଫଆଇଆର (FIR) ରୁଜୁ କରି କଠୋର କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଦାବି କରାଯାଇଛି।

ଗତ ଅକ୍ଟୋବର ୧୨ ତାରିଖରେ ସୁପ୍ରିମକୋର୍ଟ ପର୍ଯ୍ୟନ୍ତ ଚାଲିଥିବା ଏକ ବିକ୍ଷୋଭ ଶୋଭାଯାତ୍ରାକୁ କଭର କରୁଥିବା ସମୟରେ ଏହି ଘଟଣା ଘଟିଥିଲା। ଅଭିଯୋଗକାରୀ ସାମ୍ବାଦିକାଜଣକ ତିନି ମାସର ଗର୍ଭବତୀ ଥିବା ବେଳେ ସେହି ସମୟରେ ତାଙ୍କ ସହ ଦୁର୍ବ୍ୟବହାର, ଧମକଚମକ ଏବଂ ଅପରାଧିକ ବଳପ୍ରଯୋଗ କରାଯାଇଥିବା ସେ ଏତଲାରେ ସ୍ପଷ୍ଟ ଭାବେ ଦର୍ଶାଇଛନ୍ତି। ସାମ୍ବାଦିକାଙ୍କ ପକ୍ଷରୁ ଦାଖଲ କରାଯାଇଥିବା ଅଭିଯୋଗପତ୍ରରେ ଭାରତୀୟ ନାଗରିକ ସୁରକ୍ଷା ସଂହିତା (BNSS) ୨୦୨୩ର ଏକାଧିକ କଠୋର ଧାରା ଉଲ୍ଲେଖ କରାଯାଇଛି। 

ଘଟଣାସ୍ଥଳରେ ରିପୋର୍ଟିଂ କରୁଥିବା ସମୟରେ ରାହୁଲ ଗାନ୍ଧୀ ନିଜେ ତାଙ୍କୁ ଧକ୍କା ମାରିଥିଲେ ବୋଲି ସାମ୍ବାଦିକା ଅଭିଯୋଗ ଆଣିଛନ୍ତି। ଏହି ଧକ୍କା ଓ ଧସ୍ତିଧାସ୍ତି ପରେ ତାଙ୍କ ସ୍ୱାସ୍ଥ୍ୟାବସ୍ଥା ହଠାତ୍ ବିଗିଡ଼ିଯାଇଥିଲା, ଯାହାଫଳରେ ତାଙ୍କୁ ତତକ୍ଷଣାତ୍ ହସ୍ପିଟାଲକୁ ନିଆଯାଇଥିଲା। ଏହି ପ୍ରସଙ୍ଗରେ ସର ଗଙ୍ଗାରାମ ହସ୍ପିଟାଲର ଅଧ୍ୟକ୍ଷ ଡାକ୍ତର ଅଜୟ ସ୍ୱରୂପ ଗଣମାଧ୍ୟମକୁ ସୂଚନା ଦେଇ କହିଛନ୍ତି ଯେ, ସେହିଦିନ ରାତି ପ୍ରାୟ ୧୦ଟା ସମୟରେ ଋଚା ପରାଶର ଗୁରୁତର ଅବସ୍ଥାରେ ହସ୍ପିଟାଲକୁ ଆସିଥିଲେ। 

ରୋଗୀଙ୍କ ଗୁରୁତର ସ୍ୱାସ୍ଥ୍ୟାବସ୍ଥା ଏବଂ ଗର୍ଭବତୀ ଥିବା କାରଣକୁ ଦୃଷ୍ଟିରେ ରଖି, କୌଣସି ପ୍ରକାରର ଆନୁଷ୍ଠାନିକ ପଞ୍ଜୀକରଣ ଫର୍ମ ପୂରଣ କରାଇବା ପୂର୍ବରୁ ହିଁ ତାଙ୍କୁ ଜରୁରୀକାଳୀନ ଭିତ୍ତିରେ ଆଡମିଟ୍ କରାଯାଇ ଚିକିତ୍ସା ଆରମ୍ଭ କରାଯାଇଥିଲା। ସାମ୍ବାଦିକାଜଣକ ଗର୍ଭବତୀ ଥିବା ଏବଂ ତାଙ୍କୁ ଏଭଳି ପରିସ୍ଥିତିର ସମ୍ମୁଖୀନ ହେବାକୁ ପଡ଼ିଥିବା କାରଣରୁ ଏହି ଘଟଣାଟି ଏବେ ଦେଶବ୍ୟାପୀ ଚର୍ଚ୍ଚାର କେନ୍ଦ୍ରବିନ୍ଦୁ ପାଲଟିଛି।