ନୂଆଦିଲ୍ଲୀ: ଆଜି ପୁଣି ଥରେ କକ୍ରୋଚ ଜନତା ପାର୍ଟୀ ଶାନ୍ତିପୂର୍ଣ୍ଣ ଆନ୍ଦୋଳନର ଡାକରା ଦେଇଛି । ଜାତୀୟ ରାଜଧାନୀରେ ଦିଲ୍ଲୀରେ ସିଜେପି “ଲହରା ଦୋ ତ୍ରିରଙ୍ଗା” ବା ତ୍ରିରଙ୍ଗା ଶୋଭାଯାତ୍ରା କରିବ । ଏଥିପାଇଁ ଦିଲ୍ଲୀ ହାଇକୋର୍ଟ ଅନୁମତି ପ୍ରଦାନ କରିଥିବାବେଳେ ପୋଲିସ ପ୍ରଶାସନ କିନ୍ତୁ ଆବଶ୍ୟକୀୟ ପଦକ୍ଷେପ ନେବ ବୋଲି କହିଛି । 

ସିଜେପି ସୋସିଆଲ ମିଡିଆ ଏବଂ ସାମ୍ବାଦିକ ସମ୍ମିଳନୀ ମାଧ୍ୟମରେ ଆଜି ଅପରାହ୍ନ ୫ଟା ସମୟରେ ହାତରେ ତ୍ରିରଙ୍ଗା ଧରି ସେଣ୍ଟ୍ରାଲ ପାର୍କରେ ଏକତ୍ରିତ ହେବାକୁ ଜନତାଙ୍କୁ ଆହ୍ୱାନ ଦେଇଛି । 'ଆମ୍ ଆଦମୀ ପାର୍ଟି' ମଧ୍ୟ ଏହି ପ୍ରତିବାଦକୁ ସମର୍ଥନ ଜଣାଇଛି ଏବଂ ନିଜର କର୍ମୀ ଓ ସମର୍ଥକମାନଙ୍କୁ ବହୁ ସଂଖ୍ୟାରେ ଏଥିରେ ଯୋଗ ଦେବାକୁ ଆହ୍ୱାନ ଦେଇଛି।

ସିଜେପିର ତ୍ରିରଙ୍ଗା ଯାତ୍ରା ପାଇଁ ଦିଲ୍ଲୀ ପୋଲିସ ସଜାଗ ହୋଇ ରହିଛି । ସୁରକ୍ଷା ବ୍ୟବସ୍ଥାକୁ କଡ଼ାକଡ଼ି କରାଯିବା ସହିତ ପ୍ରବଳ ପୋଲିସ ଫୋର୍ସ ମୁତୟନ କରାଯାଇଛି । କନୋଟ୍ ପ୍ଲେସ୍ ଠାରେ ଥିବା ସେଣ୍ଟ୍ରାଲ୍ ପାର୍କକୁ ଦୁଇ ଦିନ ବନ୍ଦ ରଖିବାକୁ ଏନଡିଏମସି ନୋଟିସ ଜାରି କରିଛି । ଏହା ସହିତ ସମସ୍ତଙ୍କୁ ଏହି ଅଞ୍ଚଳରୁ ଦୂରତା ବଜାୟ ରଖିବାକୁ ନିର୍ଦ୍ଦେଶ ଦିଆଯାଇଛି । 

ଦିଲ୍ଲୀ ପୋଲିସ ସ୍ପଷ୍ଟ ଭାବେ କହିଛି ଯେ ସର୍ବସାଧାରଣ ସ୍ଥାନରେ ଶାନ୍ତି ବଜାୟ ରଖିବାକୁ ଏଭଳି ପଦକ୍ଷେପ ଗ୍ରହଣ କରାଯାଇଛି ।