କୋଲକାତା: ପଶ୍ଚିମବଙ୍ଗରେ ଭୋଟର ତାଲିକାର 'ବିଶେଷ ଗହନ ପୁନରୀକ୍ଷଣ' (SIR) କୁ ନେଇ ରାଜନୈତିକ ସରଗରମ ବୃଦ୍ଧି ପାଇବାରେ ଲାଗିଛି। ଏହି ପରିପ୍ରେକ୍ଷୀରେ ପଶ୍ଚିମବଙ୍ଗ ବିଜେପି ରାଜ୍ୟ ସଭାପତି ତଥା ରାଜ୍ୟସଭା ସାଂସଦ ସମୀକ ଭଟ୍ଟାଚାର୍ଯ୍ୟ ରାଜ୍ୟରେ ଆଉ ଏକ ପର୍ଯ୍ୟାୟ SIR କରାଇବା ପାଇଁ  ଦାବି ଉଠାଇଛନ୍ତି। ପୂର୍ବରୁ ହୋଇଥିବା ପୁନରୀକ୍ଷଣ ପ୍ରକ୍ରିୟାରେ ବ୍ୟାପକ ହିଂସା ଏବଂ ଅରାଜକତା ସୃଷ୍ଟି କରାଯାଇଥିଲା ବୋଲି ସେ ଗୁରୁତର ଅଭିଯୋଗ ଆଣିଛନ୍ତି।

ସମୀକ ଭଟ୍ଟାଚାର୍ଯ୍ୟ ଏକ ସାମ୍ବାଦିକ ସମ୍ମିଳନୀରେ ଅଭିଯୋଗ କରିଛନ୍ତି ଯେ, ପୂର୍ବରୁ ଶାସକ ଦଳର ଛତ୍ରଛାୟା ତଳେ ଭୋଟର ତାଲିକା ସଂଶୋଧନ ସମୟରେ ଅତ୍ୟନ୍ତ ନିନ୍ଦନୀୟ ପରିସ୍ଥିତି ସୃଷ୍ଟି ହୋଇଥିଲା। ସେତେବେଳେ ସାଧାରଣ ଲୋକଙ୍କ ନିକଟରୁ କାଗଜପତ୍ର ଛଡ଼ାଇ ନେଇ ଜଳାଇ ଦିଆଯାଇଥିଲା, ନିର୍ବାଚନ କର୍ମଚାରୀଙ୍କ ଉପରେ ଆକ୍ରମଣ କରାଯାଇଥିଲା ଏବଂ କାର୍ଯ୍ୟାଳୟଗୁଡ଼ିକରେ ନିଆଁ ଲଗାଇ ଦିଆଯାଇଥିଲା।

ଏପରିକି ବ୍ଲକ ଉନ୍ନୟନ ଅଧିକାରୀ, ଆଙ୍ଗନୱାଡ଼ି କର୍ମୀ ଏବଂ ବିଜେପିର ବୁଥ୍ ଲେଭଲ୍ ଏଜେଣ୍ଟ (BLA) ମାନଙ୍କୁ ମଧ୍ୟ ହିଂସାର ଶିକାର ହେବାକୁ ପଡ଼ିଥିଲା। ଏହିସବୁ କାରଣରୁ ରାଜ୍ୟରେ ଏକ ସ୍ୱଚ୍ଛ ଓ ନିରପେକ୍ଷ ଭୋଟର ତାଲିକା ପ୍ରସ୍ତୁତ କରିବା ପାଇଁ ପୁଣିଥରେ SIR କରାଯିବା ନିହାତି ଆବଶ୍ୟକ ବୋଲି ସେ ଦାବି କରିଛନ୍ତି।

ମୁଖ୍ୟ ନିର୍ବାଚନ ଆୟୋଗଙ୍କୁ ପ୍ରଶଂସା, ବିରୋଧୀଙ୍କୁ ସମାଲୋଚନା

ଗଣତନ୍ତ୍ରରେ 'ଭିଡ଼ତନ୍ତ୍ର' କେବେହେଲେ ବାସ୍ତବ ଗଣତନ୍ତ୍ରର ବିକଳ୍ପ ହୋଇପାରିବ ନାହିଁ ବୋଲି ସମୀକ ଚେତାବନୀ ଦେଇଛନ୍ତି। ଯେଉଁ ରାଜନୈତିକ ଦଳଗୁଡ଼ିକୁ ଜନସାଧାରଣ ପ୍ରତ୍ୟାଖ୍ୟାନ କରିସାରିଛନ୍ତି, ସେମାନେ ହିଁ ବିଚାରବିଭାଗ ଓ ପ୍ରଶାସନକୁ ଚ୍ୟାଲେଞ୍ଜ କରିବା ପାଇଁ ଏଭଳି ବିଶୃଙ୍ଖଳା ସୃଷ୍ଟି କରୁଛନ୍ତି।

ଏହା ସହିତ, ନିର୍ବାଚନ ଆୟୋଗଙ୍କ ଉପରେ 'ଭୋଟ ଚୋରି' ଅଭିଯୋଗ ଆଣୁଥିବା ବିରୋଧୀଙ୍କୁ କଡ଼ା ସମାଲୋଚନା କରି ସେ କହିଛନ୍ତି ଯେ, ମୁଖ୍ୟ ନିର୍ବାଚନ ଆୟୋଗର ଜ୍ଞାନେଶ କୁମାର ସ୍ୱଚ୍ଛ ଓ ସ୍ୱାଧୀନ ନିର୍ବାଚନ ପ୍ରକ୍ରିୟା ପରିଚାଳନା କରୁଥିବାରୁ ସେ ପୁରସ୍କାର ଓ ସମ୍ମାନର ହକ୍‌ଦାର।