ଭୁବନେଶ୍ୱର: ବିଜୁ ଜନତା ଦଳର ପ୍ରତିଷ୍ଠା ଦିବସ ଯେତିକି ପାଖେଇ ଆସୁଛି ଦଳୀୟ ନେତୃତ୍ୱ ପରିବର୍ତ୍ତନକୁ ନେଇ ଚର୍ଚ୍ଚା ସେତିକି ବଢ଼ୁଛି । ଆଉ  ବିଜେଡ଼ିରେ ଚାଲିଛି ଭୋଜି ରାଜନୀତି । ଭୋଜି ପରେ ଭୋଜି ନାଁରେ ଚାଲିଛି ରାଜନୀତି । ନିକଟରେ ଭୁବନେଶ୍ୱର ଉପକଣ୍ଠରେ ବିଜେଡ଼ିର ପରାଜିତ ନେତାଙ୍କ ଭୋଜି ପରେ ଆଜି ପୁରୁଣା ଭୁବନେଶ୍ୱର ଏକାଠି ଭୋଜି କରିଛନ୍ତି ଦଳର ବହୁ ବରିଷ୍ଠ ଏବଂ ପୁରୁଣା ନେତା । ଆଉ ପାଣ୍ଡିଆନଙ୍କୁ ବିରୁଦ୍ଧରେ ଖୁଲମଖୁଲା ଦେଇଛନ୍ତି ମନ୍ତବ୍ୟ । 

ବିଜେଡ଼ି ନେତା ଅଶୋକ ପଣ୍ଡା ଲିଙ୍ଗରାଜ ମନ୍ଦିରରେ ଏକ ପ୍ରସାଦ ସେବାର ଆୟୋଜନ କରିଥିଲେ । ଯେଉଁଥିରେ ଦଳର ବହୁ ବରିଷ୍ଠ ନେତୃବୃନ୍ଦଙ୍କୁ ଦେଖିବାକୁ ମିଳିଥିଲା । ପ୍ରମିଳା ମଲ୍ଲିକ, ଦେବାଶିଷ ସାମନ୍ତରାୟ, ପ୍ରଫୁଲ୍ଲ ଘଡ଼େଇ, ସମ୍ବିତ ରାଉତରାୟ ପ୍ରମୁଖ ସାମିଲ ଥିଲେ । ଆଉ ଏବେ ଖୋଲାଖୋଲି ପାଣ୍ଡିଆନଙ୍କୁ ନେଇ ମନ୍ତବ୍ୟ ଦେଉଛନ୍ତି । 

 ରାଜ୍ୟସଭା ସାଂସଦ ଦେବାଶିଷ ସାମନ୍ତରାୟ କହିଛନ୍ତି ଯେ କେଉଁ ସମୟରେ କଣ ସମୀକରଣ ହେବ କେହି କହିପାରିବେ ନାହିଁ । ରାଜନୀତିରେ ସମୀକରଣ ହେବା ସ୍ୱାଭାବିକ । ବିଜୁ ଜନତା ଦଳରେ ମଧ୍ୟ ସମୀକରଣ ଦରକାର । ଭିକେ ପାଣ୍ଡିଆନଙ୍କ ପତ୍ନୀ ସୁଜାତା କାର୍ତ୍ତିକେୟନ ପାଣ୍ଡିଆନ ବିଜେଡ଼ିରେ ପ୍ରବେଶ ନେଇ ପ୍ରତିକ୍ରିୟା ଦେଇଛନ୍ତି ଦେବାଶିଷ । ସେ କହିଛନ୍ତି ତାଙ୍କର ଆସିବା ରାଜନୈତିକ ଦୃଷ୍ଟିରୁ ଭୁଲ ହେବ । ନବୀନ ବାବୁଙ୍କ ଉତ୍ତରାଧିକାରୀ ଓଡ଼ିଶାରୁ କେହି ହୋଇପାରିବେ । ଓଡ଼ିଶାବାସୀ ଯେଉଁ ନେତୃତ୍ବକୁ ବିଶ୍ୱାସ କରିବେ, ସିଏ ନେତା ହେବେ । ନବୀନ ବାବୁ ନେତା ହେବେ ବୋଲି କଣ ବିଜୁ ବାବୁ କହିଥିଲେ କି ? ନବୀନ ବାବୁ ଏବେ ବି ନେତା ଅଛନ୍ତି, ପରାଜୟ ପରେ ଲୋକେ ତାଙ୍କୁ ଝୁରୁଛନ୍ତି । ବିଜେଡି ସଜାଡ଼ି ହୋଇଗଲେ ରାଜ୍ୟରେ ସବୁଠାରୁ ଭଲ ବିକଳ୍ପ ହେବ ବୋଲି କହିଛନ୍ତି ଦେବାଶିଷ । 

ସେପଟେ ସମ୍ବିତ ରାଉତରାୟଙ୍କ ମନ୍ତବ୍ୟ ସଠିକ୍ ବୋଲି କହିଛନ୍ତି ବିରୋଧୀ ଦଳ ମୁଖ୍ୟ ସଚେତକ ପ୍ରମିଳା ମଲ୍ଲିକ । ପାଣ୍ଡିଆନ ଆମ ନେତା ନୁହଁନ୍ତି, ଆମର କେବଳ ଜଣେ ନେତା ଅଛନ୍ତି , ସେ ହେଉଛନ୍ତି ନବୀନ ପଟ୍ଟନାୟକ । ଦଳରେ ଗୋଷ୍ଠୀ କନ୍ଦଳ ନାହିଁ, ସବୁକିଛି ଠିକ୍ ଠାକ୍ ଚାଲିଛି । ଭୋଜି ଭାତକୁ ଗୋଷ୍ଠୀ କହିବା ଠିକ୍ ନୁହେଁ ବୋଲି କହିଛନ୍ତି ପ୍ରମିଳା । 

ଗତକାଲି ସମ୍ବିତ ରାଉତରାୟ ପାଣ୍ଡିଆନ ନେତା ନୁହଁନ୍ତି ବରଂ ସେ ଜଣେ ମ୍ୟାନେଜର୍ ବୋଲି କହିଥିଲେ । ତାଙ୍କୁ ନେତା ହିସାବରେ କେବେ ମାନିନାହୁଁ। ନବୀନଙ୍କ ସେବା କରୁଥିବାରୁ ଆମର ପାଣ୍ଡିଆନଙ୍କ ପ୍ରତି ଦୁର୍ବଳତା ରହିଛି। କିନ୍ତୁ ବିଜେଡିର ନେତା ହେଉଛନ୍ତି କେବଳ ନବୀନ ପଟ୍ଟନାୟକ ବୋଲି ସମ୍ବିତ କହିଥିଲେ । 

ଗତ କିଛି ଦିନ ତଳେ ବହୁ ବିଜେଡ଼ି ନେତା ଝୁମୁକାଠାରେ ଭୋଜି କରିଥିଲେ । ସମ୍ବିତ ରାଉତରାୟ, ରାଜେନ୍ଦ୍ର ସାହୁ, ଚନ୍ଦ୍ର ସାରଥୀ ବେହେରାଙ୍କ ସହିତ ଯୋଗ ଦେଇଥିଲେ 60ରୁ ଅଧିକ ନେତା ।