ତୃଣମୂଳ କଂଗ୍ରେସ (TMC) ସୁପ୍ରିମକୋର୍ଟରେ ଦାବି କରିଛି ଯେ, ପଶ୍ଚିମବଙ୍ଗରେ ଭୋଟର ତାଲିକାର 'ସ୍ପେଶାଲ ଇଣ୍ଟେନସିଭ୍ ରିଭିଜନ' (SIR) ସମୟରେ ନାମ ହଟାଯିବା ଯୋଗୁଁ କିଛି ବିଧାନସଭା କ୍ଷେତ୍ରର ନିର୍ବାଚନ ଫଳାଫଳ ଉପରେ ବଡ଼ ପ୍ରଭାବ ପଡ଼ିଛି। ସୁପ୍ରିମକୋର୍ଟ ଏହି ମାମଲାରେ ନୂତନ ଆବେଦନ କରିବାକୁ ପରାମର୍ଶ ଦେଇଥିବାବେଳେ ନିର୍ବାଚନ କମିଶନ ଏହାକୁ 'ନିର୍ବାଚନ ଆବେଦନ' (Election Petition) ର ବିଷୟ ବୋଲି କହିଛନ୍ତି।

ସୋମବାର ସୁପ୍ରିମକୋର୍ଟରେ ଶୁଣାଣି ସମୟରେ ବରିଷ୍ଠ ଆଇନଜୀବୀ କଲ୍ୟାଣ ବାନାର୍ଜୀ କହିଛନ୍ତି ଯେ, ୩୧ଟି ନିର୍ବାଚନ ମଣ୍ଡଳୀରେ ଭାରତୀୟ ଜନତା ପାର୍ଟି (BJP) ର ବିଜୟ ବ୍ୟବଧାନ SIR ପ୍ରକ୍ରିୟାରେ ହଟାଯାଇଥିବା ଭୋଟରଙ୍କ ସଂଖ୍ୟାଠାରୁ କମ୍ ରହିଛି। ଅନେକ କ୍ଷେତ୍ରରେ ହାରିବା ବ୍ୟବଧାନ ଏବଂ କଟାଯାଇଥିବା ଭୋଟ୍ ସଂଖ୍ୟା ପ୍ରାୟ ସମାନ। ଏପରିକି ଜଣେ ପ୍ରାର୍ଥୀ ମାତ୍ର ୮୬୨ ଭୋଟରେ ହାରିଥିବାବେଳେ ସେହି ଅଞ୍ଚଳରେ ୫୪୩୨ ଜଣଙ୍କ ନାମ ଭୋଟର ତାଲିକାରୁ ହଟାଯାଇଥିଲା।

SIR ଉପରେ TMCର ବଡ଼ ଦାବି

ଟିଏମସି ଦାବି କରିଛି ଯେ ଦଳ ଓ ବିଜେପି ମଧ୍ୟରେ ଭୋଟ୍ ବ୍ୟବଧାନ ପ୍ରାୟ ୩୨ ଲକ୍ଷ ଥିବାବେଳେ ପ୍ରାୟ ୩୫ ଲକ୍ଷ ଅପିଲ୍ ଏବେ ବି ଟ୍ରିବ୍ୟୁନାଲ୍ରେ ପେଣ୍ଡିଂ ରହିଛି। ସୁପ୍ରିମକୋର୍ଟଙ୍କ ଖଣ୍ଡପୀଠ ବାନାର୍ଜୀଙ୍କୁ ଏକ ସ୍ୱତନ୍ତ୍ର ଆନ୍ତରୀଣ ଆବେଦନ (Interlocutory Application) ଦାଖଲ କରିବାକୁ କହିଛନ୍ତି। ଜଷ୍ଟିସ ବାଗଚୀ କହିଛନ୍ତି ଯେ, ଯଦି ଭୋଟରଙ୍କ ନାମ ହଟାଯିବା ଯୋଗୁଁ ଫଳାଫଳ ଉପରେ ପ୍ରଭାବ ପଡ଼ିଛି, ତେବେ ସେଥିପାଇଁ ଏକ ସ୍ୱତନ୍ତ୍ର ଆବେଦନର ଆବଶ୍ୟକତା ରହିଛି।

ଶୁଭେନ୍ଦୁ ସରକାରଙ୍କ ୬ ବଡ଼ ନିଷ୍ପତ୍ତି: ସରକାରୀ ଚାକିରୀ ପାଇଁ ବୟସ ସୀମା ବୃଦ୍ଧି, ବିଏସ୍ଏଫ୍ ମିଳିବ ଜମି

ଅନ୍ୟପଟେ ବରିଷ୍ଠ ଆଇନଜୀବୀ ମେନକା ଗୁରୁସ୍ୱାମୀ କହିଛନ୍ତି ଯେ, ଯେଉଁ ହାରରେ ଅପିଲ୍ଗୁଡ଼ିକର ସମାଧାନ ହେଉଛି, ସମସ୍ତ ମାମଲା ଶେଷ ହେବାକୁ ଅତିକମରେ ୪ ବର୍ଷ ଲାଗିବ।

ନିର୍ବାଚନ କମିଶନଙ୍କ ପକ୍ଷ

ନିର୍ବାଚନ କମିଶନଙ୍କ ପକ୍ଷରୁ ବରିଷ୍ଠ ଆଇନଜୀବୀ ଦାମା ଶେଷାଦ୍ରି ନାୟୁଡୁ କହିଛନ୍ତି ଯେ ଏହାର ସଠିକ୍ ସମାଧାନ ପାଇଁ ନିର୍ବାଚନ ଆବେଦନ (Election Petition) କରିବା ଉଚିତ୍। କଲ୍ୟାଣ ବାନାର୍ଜୀ କୋର୍ଟଙ୍କୁ ଅନୁରୋଧ କରିଥିଲେ ଯେ SIR ଜରିଆରେ ନାମ କାଟିବାକୁ ନିର୍ବାଚନ ଆବେଦନର ଏକ ଆଧାର ବୋଲି ଗ୍ରହଣ କରି ଏକ ଆଦେଶ ଜାରି କରାଯାଉ। କିନ୍ତୁ ସୁପ୍ରିମକୋର୍ଟ କହିଛନ୍ତି ଯେ ଆମେ ଏପରି ଆଦେଶ କିପରି ଦେଇପାରିବୁ? ଯଦି ସଠିକ୍ ଭାବେ ଆବେଦନ କରାଯାଏ, ତେବେ କୋର୍ଟ ଏହି ମାମଲାର ଯାଞ୍ଚ କରିବେ। ବର୍ତ୍ତମାନ ପାଇଁ ଏହି ମାମଲାର ଶୁଣାଣିକୁ ସ୍ଥଗିତ ରଖାଯାଇଛି।