ନୂଆଦିଲ୍ଲୀ: ଶିବସେନା ସାଂସଦ ପ୍ରିୟଙ୍କା ଚତୁର୍ବେଦୀଙ୍କ ରାଜନୈତିକ ଆଭିମୁଖ୍ୟ ଏବେ ବଦଳିଲା ପରି ମନେ ହେଉଛି। ଗୁରୁବାର ସେ ପୁଣିଥରେ ପିଏମ ମୋଦୀଙ୍କୁ ଭେଟିଥିଲେ। ଫଟୋ ସେୟାର କରିବା ସହ ସେ ୫ ଦିନରେ ଦୁଇଥର ପ୍ରଧାନମନ୍ତ୍ରୀଙ୍କୁ ଧନ୍ୟବାଦ ଦେଇଛନ୍ତି ଓ ତାଙ୍କର ପ୍ରଶଂସା କରିଛନ୍ତି। ତେବେ ଏହି ସାକ୍ଷାତ ପରେ ସେ ନିଜର ଭବିଷ୍ୟତ ରାଜନୀତିକୁ ନେଇ ଚାଲିଥିବା ସମସ୍ତ ଅଟକଳ ଉପରେ ବିରାମ ଲଗାଇଛନ୍ତି।

ପ୍ରିୟଙ୍କା ଚତୁର୍ବେଦୀ କହିଛନ୍ତି ଯେ, ସେ ବିରୋଧୀ ଦଳର ଏକ ଶାଣିତ ସ୍ୱର ହୋଇ ରହିବେ, କାରଣ ଦେଶ ପାଇଁ ଏକ ମଜବୁତ ବିରୋଧୀ ଦଳର ଆବଶ୍ୟକତା ରହିଛି। ସେ କହିଛନ୍ତି, "ମୁଁ ଦେଶ ପାଇଁ ଲଢ଼ିବି ଏବଂ ସ୍ୱର ଉତ୍ତୋଳନ ଜାରି ରଖିବି।"

ବିରୋଧୀ ଦଳରେ ହିଁ ରହିବେ ପ୍ରିୟଙ୍କା ଚତୁର୍ବେଦୀ!

• ସେ ସୋସିଆଲ ମିଡିଆ ପ୍ଲାଟଫର୍ମ 'ଏକ୍ସ'ରେ ପୋଷ୍ଟ କରି କହିଛନ୍ତି ଯେ, ପ୍ରଧାନମନ୍ତ୍ରୀ ରାଜ୍ୟସଭାରେ ତାଙ୍କର ଅନୁଭୂତି ଶୁଣିଥିଲେ ଏବଂ ନିଜର ବିଚାର ମଧ୍ୟ ସେୟାର କରିଥିଲେ। ଏହି ସାକ୍ଷାତକାର ତାଙ୍କ ପାଇଁ ବହୁତ ମୁଲ୍ୟବାନ ବୋଲି ସେ ଲେଖିଛନ୍ତି। ଏଥିସହ ସେ ସ୍ପଷ୍ଟ କରିଛନ୍ତି ଯେ, ସେ ଆଗକୁ ମଧ୍ୟ ବିରୋଧୀ ଦଳର ମୁଖର ସ୍ୱର ହୋଇ ରହିବେ।

• ପ୍ରିୟଙ୍କା କହିଛନ୍ତି ଯେ, ସେ ରାଷ୍ଟ୍ରହିତ ପ୍ରସଙ୍ଗରେ ଲଗାତାର କହିବେ ଏବଂ ଦେଶ ପାଇଁ କାମ କରିବେ। ପୋଷ୍ଟ ଶେଷରେ ସେ 'ଜୟ ମହାରାଷ୍ଟ୍ର, ଜୟ ହିନ୍ଦ' ଲେଖିଛନ୍ତି।

• ଏହା ପୂର୍ବରୁ ମାର୍ଚ୍ଚ ୨୯ରେ ମଧ୍ୟ ସେ ପିଏମ ମୋଦୀଙ୍କ ସହ ଫଟୋ ସେୟାର କରିଥିଲେ। ସେଥିରେ ସେ ରାଜ୍ୟସଭାରୁ ନିଜର ସମ୍ମାନଜନକ ବିଦାୟ ମୁହୂର୍ତ୍ତ ବିଷୟରେ ଉଲ୍ଲେଖ କରିଥିଲେ। ଯେତେବେଳେ ସ୍ୱୟଂ ପ୍ରଧାନମନ୍ତ୍ରୀ ସଂସଦରୁ ବିଦାୟ ଦିଅନ୍ତି, ତାହା ତାଙ୍କ ପାଇଁ ଏକ ସ୍ମରଣୀୟ ମୁହୂର୍ତ୍ତ ବୋଲି ସେ ଲେଖିଥିଲେ।

• ପାଖାପାଖି ୭ ମାସ ପୂର୍ବେ ମଧ୍ୟ ପ୍ରିୟଙ୍କା ପିଏମ ମୋଦୀଙ୍କୁ ଭେଟିଥିଲେ। ବାରମ୍ବାର ଏହି ସାକ୍ଷାତକୁ ନେଇ ସେ କୌଣସି ବଡ଼ ରାଜନୈତିକ ପରିବର୍ତ୍ତନ କରିପାରନ୍ତି ବୋଲି ଚର୍ଚ୍ଚା ହେଉଛି।

ରାଜ୍ୟସଭାରେ ପ୍ରିୟଙ୍କାଙ୍କ ଏହି କାର୍ଯ୍ୟକାଳର ଶେଷ ଦିନ ଏପ୍ରିଲ ୨ ତାରିଖରେ ଥିଲା। ସେ ୨୦୧୦ ମସିହାରେ କଂଗ୍ରେସ ପାର୍ଟି ଜରିଆରେ ରାଜନୀତିରେ ପ୍ରବେଶ କରିଥିଲେ। ୯ ବର୍ଷ କଂଗ୍ରେସରେ ରହିବା ପରେ ୨୦୧୯ରେ ସେ ଶିବସେନାରେ ଯୋଗ ଦେଇଥିଲେ। ଏହାପରେ ପାର୍ଟି ତାଙ୍କୁ ୨୦୨୦ରେ ରାଜ୍ୟସଭାକୁ ମନୋନୀତ କରିଥିଲା।