ସୁପ୍ରିମ୍ କୋର୍ଟ ବୁଧବାର ଦିନ ସ୍ପଷ୍ଟ କରିଛନ୍ତି ଯେ ସାରା ଦେଶରେ ବାଣ ଉପରେ ସମ୍ପୂର୍ଣ୍ଣ ପ୍ରତିବନ୍ଧକ  ଲଗାଇବାର ତାଙ୍କର କୌଣସି ଉଦ୍ଦେଶ୍ୟ ନାହିଁ। କୋର୍ଟ କହିଛନ୍ତି ଯେ ଦୀପାବଳି ପର୍ବ ଲୋକଙ୍କ ଭାବନା ସହ ଯୋଡ଼ିହୋଇ ରହିଛି ଏବଂ ଏହାକୁ ସମ୍ପୂର୍ଣ୍ଣ ଭାବେ ନଜରଅନ୍ଦାଜ କରାଯାଇପାରିବ ନାହିଁ। ଏହା ସହିତ କୋର୍ଟ କହିଛନ୍ତି ଯେ ବାଣ ଫୁଟାଇବା ପାଇଁ ୨୪ ଘଣ୍ଟାର ଅନୁମତି ମଧ୍ୟ ଦିଆଯାଇପାରିବ ନାହିଁ। ଅଦାଲତ କହିଛନ୍ତି ଯେ ଲଗାତାର ବାଣ ଫୁଟିବା ଦ୍ୱାରା ରୋଗୀ, ବୃଦ୍ଧ ଏବଂ ଶିଶୁମାନଙ୍କ ଉପରେ ଏହାର ଖରାପ ପ୍ରଭାବ ପଡ଼ିପାରେ।

ବାଣର ପ୍ରକାର ଏବଂ ସମୟସୀମା ଉପରେ ହେବ ବିଚାର

ସୁପ୍ରିମ୍ କୋର୍ଟ କହିଛନ୍ତି ଯେ ସେ ବାଣର ପ୍ରକାର ଏବଂ ସେଗୁଡ଼ିକୁ ଫୁଟାଇବାର ସମୟସୀମା ଉପରେ ବିଚାର କରିବେ। ଅଦାଲତ  ଏପରି ସନ୍ତୁଳନ ଉପରେ ଜୋର ଦେବାକୁ ଚାହୁଁଛନ୍ତି , ଯାହାଦ୍ୱାରା ପର୍ବ ପାଳନ କରିବାର ଲୋକଙ୍କ ଭାବନା ମଧ୍ୟ ବଜାୟ ରହୁ ଏବଂ ସ୍ୱାସ୍ଥ୍ୟ ସହ ଜଡ଼ିତ ଚିନ୍ତା ପ୍ରତି ମଧ୍ୟ ଧ୍ୟାନ ଦିଆଯାଇପାରୁ। ଏହି ମାମଲାରେ ସୁପ୍ରିମ୍ କୋର୍ଟ ଏବେ ଅକ୍ଟୋବର ୧୫ ରେ ପରବର୍ତ୍ତୀ ଶୁଣାଣି କରିବେ।

ଦିଲ୍ଲୀ-ଏନ୍ସିଆର୍ (Delhi-NCR) ରେ ବାଣ ଯୋଗୁଁ ହେଉଥିବା ପ୍ରଦୂଷଣକୁ ନେଇ ସୁପ୍ରିମ୍ କୋର୍ଟରେ ଶୁଣାଣି ହୋଇଥିଲା। ଏହି ମାମଲା ୨୦୧୫ ମସିହାରୁ ଚାଲିଆସୁଛି, ଯେଉଁଥିରେ ଅଦାଲତ ଦିଲ୍ଲୀ, ଉତ୍ତର ପ୍ରଦେଶ ସମେତ ଉତ୍ତର ଭାରତର ପ୍ରଦୂଷଣ ପ୍ରଭାବିତ ଅଞ୍ଚଳଗୁଡ଼ିକରେ ଅକ୍ଟୋବରରୁ ଜାନୁଆରୀ ମଧ୍ୟରେ ବାଣର ବ୍ୟବହାରକୁ ନେଇ ଅଲଗା ଅଲଗା ନିର୍ଦ୍ଦେଶ ଦେଇଆସୁଛନ୍ତି।