ନୂଆଦିଲ୍ଲୀ: କିଛି ଦିନର ବ୍ୟବଧାନ ପରେ ପୁଣି ଥରେ ଚର୍ଚ୍ଚାକୁ ଆସିଛନ୍ତି ପୂର୍ବତନ ଉପରାଷ୍ଟ୍ରପତି ଜଗଦୀପ ଧନଖଡ଼। ସେ ରାଜସ୍ଥାନ ବିଧାନସଭାରେ ମାସିକ ପେନସନ୍ ପାଇଁ ଆବେଦନ କରିଛନ୍ତି । ଧନଖଡ଼ ୧୯୯୩ ମସିହାରେ କଂଗ୍ରେସରୁ ଟିକେଟ୍ ପାଇ କିଶନଗଡ଼ ଆସନରୁ ଜିତି ବିଧାୟକ ହୋଇଥିଲେ । ସେ ବିଧାୟକ ହୋଇଥିବାରୁ ପେନସନ ପାଇବାକୁ ହକଦାର ଅଟନ୍ତି ।
ଜଗଦୀପ ଧନଖଡ଼ଙ୍କ ବୟସ ବର୍ତ୍ତମାନ ୭୪ ବର୍ଷ ଅଟେ । ତେଣୁ ନିୟମ ମୁତାବକ ସେ ରାଜସ୍ଥାନ ବିଧାନସଭାରୁ ମାସିକ ପ୍ରାୟ ୪୨ ହଜାର ଟଙ୍କା ପେନସନ ମିଳିବ । ରାଜସ୍ଥାନ ବିଧାନସଭାରେ ଭିନ୍ନ ଭିନ୍ନ ପେନସନ୍ ବ୍ୟବସ୍ଥା ମଧ୍ୟ ରହିଛି । ଯଦି ଜଣେ ବ୍ୟକ୍ତି ଉଭୟ ବିଧାୟକ ଏବଂ ସାଂସଦ ରହିଛନ୍ତି, ତେବେ ତାଙ୍କୁ ନିୟମାନୁଯାୟୀ ଦୁଇଟି ପଦବୀ ପାଇଁ ଅଲଗା ଅଲଗା ପେନସନ ମିଳିବ ।
ଧନଖଡ଼ ପ୍ରଥମେ ୧୯୮୯ରୁ ୧୯୯୧ ଯାଏ ଝୁଝୁନ ଲୋକସଭା ଆସନରୁ ସାଂସଦ ରହିଥିଲେ । ୧୯୯୩-୧୯୯୮ରେ ବିଧାୟକ ରହିଥିଲେ । ୨୦୧୯ରୁ ୨୦୨୨ ଯାଏଁ ପଶ୍ଚିମବଙ୍ଗର ରାଜ୍ୟପାଳ ଥିଲେ । ଏହା ପରେ ୨୦୨୨, ଅଗଷ୍ଟ ୧୧ ରୁ ଜୁଲାଇ ୨୧, ୨୦୨୫ ଯାଏଁ ଉପରାଷ୍ଟ୍ରପତି ଦାୟିତ୍ୱ ତୁଲାଇଛନ୍ତି ।
ଏଠାରେ ଉଲ୍ଲେଖ ଯୋଗ୍ୟ, ସ୍ୱାସ୍ଥ୍ୟଗତ କାରଣ ଦର୍ଶାଇ ଜଗଦୀପ ଧନଖଡ଼ କାର୍ଯ୍ୟକାଳ ସରିବା ପୂର୍ବରୁ ଇସ୍ତଫା ଦେଇଥିଲେ । ଏହାକୁ ନେଇ ଅନେକ ତୁମ୍ପି ତୋଫାନ ମଧ୍ୟ ହୋଇଛି । ଇସ୍ତଫା ପରଠାରୁ ତାଙ୍କୁ କୌଣସି ସାର୍ବଜନୀନ କାର୍ଯ୍ୟକ୍ରମରେ ଦେଖିବାକୁ ମିଳୁ ନାହିଁ ।