ନୂଆଦିଲ୍ଲୀ: ଦୀର୍ଘ ଚାରି ବର୍ଷରୁ ଉର୍ଦ୍ଧ୍ୱ ସମୟ ହେବ ଦୁଇ ପଡ଼ୋଶୀ ରୁଷ ଏବଂ ୟୁକ୍ରେନ ମଧ୍ୟରେ ଅବିରତ ଯୁଦ୍ଧ ଲାଗି ରହିଛି । ତମାମ ଦେଶର ପ୍ରଚେଷ୍ଟା ସତ୍ୱେ ସବୁ କିଛି ବିଫଳ ହୋଇଛି । ଆଜି ୟୁକ୍ରେନ ଏକ ବଡ଼ ଡ୍ରୋନ୍ ଆକ୍ରମଣ କରିଥିବାବେଳେ ରୁଷ ଏହାକୁ ବିଫଳ କରିଥିବା ଦାବି କରିଛି । 

ୟୁକ୍ରେନର ୨୦ଟି ଡ୍ରୋନକୁ ରୁଷ ପ୍ରତିରକ୍ଷା ପ୍ରଣାଳୀ ଅକାମୀ କରିବାରେ ସଫଳ ହୋଇଛି । ଏହା ପରେ ଦୁଇ ଦେଶ ମଧ୍ୟରେ ଆକ୍ରମଣ ଏବଂ ପ୍ରତିଆକ୍ରମଣ ଆରମ୍ଭ ହୋଇଯାଇଛି । ପାଲଟା ଜବାବରେ ରୁଷ ପକ୍ଷରୁ ୟୁକ୍ରେନର ୧୪ଟି ଅଞ୍ଚଳରେ ୫୦୦ରୁ ଅଧିକ ଡ୍ରୋନ୍ ଏବଂ ୪୫ଟି ମିସାଇଲ୍ ଆକ୍ରମଣ କରାଯାଇଛି । ୟୁକ୍ରେନର ବାୟୁ ପ୍ରତିରକ୍ଷା ପ୍ରଣାଳୀ କେତକକୁ ରୋକିବାରେ ସଫଳ ହୋଇଛି । 

ଏଠାରେ ଉଲ୍ଲେଖ ଯୋଗ୍ୟ, ଚଳିତ ସପ୍ତାହରେ ଗୁରୁବାର ବିଳମ୍ବିତ ରାତିରେ ରୁଷ ୟୁକ୍ରେନର କୀବ ଉପରେ ପ୍ରାୟ ୬୨୯ଟି ମିସାଇଲ୍ ଏବଂ ଡ୍ରୋନ୍ ମାଡ଼ କରିଥିଲା । ଏଥିରେ ୧୪ ଜଣଙ୍କ ମୃତ୍ୟୁ ହୋଇଥିବାବେଳେ ୪୮ ଜଣ ଗୁରୁତର ଆହତ ହୋଇଥିବା କୁହାଯାଉଛି । ଆକ୍ରମଣରେ ୟୁକ୍ରେନସ୍ଥିତ ୟୁରୋପୀୟ ସଂଘର ଏକ କୋଠା କ୍ଷତିଗ୍ରସ୍ତ ହୋଇଥିଲା । ଆକ୍ରମଣକୁ କେବଳ ୟୁରୋପୀୟ ସଂଘ ନୁହେଁ ବରଂ ବିଶ୍ୱବ୍ୟାପୀ ନିନ୍ଦା କରାଯିବା ଉଚିତ ବୋଲି ଜେଲେନସ୍କି ଦାବି  କରିଥିଲେ ।