ନୂଆଦିଲ୍ଲୀ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ବର୍ତ୍ତମାନ ଜାପାନ ଗସ୍ତରେ ରହିଛନ୍ତି । ଏହି ଗସ୍ତରେ ଦୁଇ ଦେଶ ମଧ୍ୟରେ ବହୁ ଗୁରୁତ୍ୱପୂର୍ଣ୍ଣ ପ୍ରସଙ୍ଗରେ ଉପରେ ଗଭୀର ଆଲୋଚନା ହୋଇଛି । ତେବେ ଚନ୍ଦ୍ରଯାନ-୫କୁ ନେଇ ଏକ ବଡ଼ ଖବର ଆସିଛି । ଚନ୍ଦ୍ରଯାନ-୩ର ସଫଳତା ପରେ ଏବେ ଭାରତ ସହିତ କାମ କରିବାକୁ ଜାପାନ ସହମତି ପ୍ରକାଶ କରିଛି । ଚନ୍ଦ୍ରଯାନ-୫କୁ ଚନ୍ଦ୍ରମାର ଦକ୍ଷିଣକୁ ପଠାଇବାକୁ ଦୁଇ ଦେଶ ମଧ୍ୟରେ ଚୁକ୍ତି ସ୍ୱାକ୍ଷରିତ ହୋଇଛି । 

ଭାରତୀୟ ମହାକାଶ ଗବେଷଣା କେନ୍ଦ୍ର (ଇସ୍ରୋ) ଏବଂ ଜାପାନ ଏରୋସ୍ପେସ୍ ଏକ୍ସପ୍ଲେରେସନ୍ ଏଜେନ୍ସି (ଜାକ୍ସା) ମଧ୍ୟରେ ଚୁକ୍ତି ହୋଇଛି । ଏହି ସମୟରେ ଭାରତ ପକ୍ଷରୁ ରାଷ୍ଟ୍ରଦୂତ ସିବି ଜର୍ଜ ଏବଂ ଜାକ୍ସାର ଉପାଧକ୍ଷ ମାତୁସରା ମାୟୁମୀ ସାମିଲ ଥିଲେ । ଚନ୍ଦ୍ରଯାନ-୫ର ଲକ୍ଷ୍ୟ ହେଉଛି, ଚନ୍ଦ୍ରପୃଷ୍ଠର ଦକ୍ଷିଣ ମେରୁରେ ସ୍ଥାୟୀ ଭାବରେ ଛାୟାଙ୍କିତ କ୍ଷେତ୍ର (ପିଏସ୍ଆର୍)ର ଆଖପାଖ ଅଞ୍ଚଳରେ ପାଣି ଏବଂ ଅନ୍ୟାନ୍ୟ ପଦାର୍ଥର ସନ୍ଧାନ ଏବଂ ଅଧ୍ୟୟନ କରିବା । ଚନ୍ଦ୍ରଯାନ-୫କୁ ଜାକ୍ସାର ଏଚ୍୩-୨୪ ଯାନରୁ ଉତକ୍ଷେପଣ କରାଯିବ । ଯେଉଁଥିରେ ଇସ୍ରୋ ଦ୍ୱାରା ନିର୍ମିତ ଚନ୍ଦ୍ରର ଲ୍ୟାଣ୍ଡର୍ ଏବଂ ଜାକ୍ସା ଦ୍ୱାରା ନିର୍ମିତ ରୋବର୍ ରହିବ । 

ପ୍ରଧାନମନ୍ତ୍ରୀ ମୋଦୀ କହିଛନ୍ତି, "ମୁଁ ଖୁସି ଯେ ଭାରତ ଏବଂ ଜାପାନ ଚନ୍ଦ୍ରଯାନ ସିରିଜ୍ କିମ୍ବା LUPEX (ଲୁନାର ପୋଲାର ଏକ୍ସପ୍ଲୋରେସନ୍) ମିଶନର ପରବର୍ତ୍ତୀ ସଂସ୍କରଣ ପାଇଁ ହାତ ମିଳାଉଛନ୍ତି। ଏହା ଚନ୍ଦ୍ରର ଦକ୍ଷିଣ ମେରୁରେ ସ୍ଥାୟୀ ଭାବରେ ଛାୟାଗ୍ରସ୍ତ ଅଞ୍ଚଳଗୁଡ଼ିକ ବିଷୟରେ ଆମର ବୁଝାମଣାକୁ ଆହୁରି ଗଭୀର କରିବ।

ଭାରତ ଏବଂ ଜାପାନର ବୈଜ୍ଞାନିକ ଦଳ ମହାକାଶ ବିଜ୍ଞାନର ସୀମାକୁ ଆଗକୁ ବଢ଼ାଇବା ପାଇଁ ଏକାଠି କାମ କରିବେ ବୋଲି ପ୍ରଧାନମନ୍ତ୍ରୀ ଆଶାବ୍ୟକ୍ତ କରିଛନ୍ତି । ମହାକାଶରେ ଦୁଇ ଦେଶର ସହଭାଗିତା କେବଳ ଆମର ଦିଗନ୍ତକୁ ବିସ୍ତାର କରିବ ନାହିଁ ବରଂ ଆମ ଚାରିପାଖରେ ଜୀବନକୁ ମଧ୍ୟ ଉନ୍ନତ କରିବ । ଭାରତର ମହାକାଶ ଯାତ୍ରା ଦେଶର ବୈଜ୍ଞାନିକମାନଙ୍କ ଦୃଢ଼ ନିଷ୍ଠା, କଠିନ ପରିଶ୍ରମ ଏବଂ ନବସୃଜନର କାହାଣୀ। ଚନ୍ଦ୍ରର ଦକ୍ଷିଣ ମେରୁରେ ଚନ୍ଦ୍ରଯାନ-୩ର ଐତିହାସିକ ‘ଅବତରଣ’ ଠାରୁ ଆରମ୍ଭ କରି ଆନ୍ତଃଗ୍ରହ ମିଶନରେ ଆମର ଅଗ୍ରଗତି ପର୍ଯ୍ୟନ୍ତ, ଭାରତ ନିରନ୍ତର ଭାବରେ ପ୍ରଦର୍ଶନ କରିଛି ଯେ ମହାକାଶ ଶେଷ ସୀମା ନୁହେଁ, ଏହା ପରବର୍ତ୍ତୀ ସୀମା।” କୃଷି, ବିପର୍ଯ୍ୟୟ ପରିଚାଳନା ଠାରୁ ଯୋଗାଯୋଗ ଏବଂ ଅନ୍ୟାନ୍ୟ କ୍ଷେତ୍ରରେ ଆମର ଦୈନନ୍ଦିନ ଜୀବନର ଅଗ୍ରଗତି ସହିତ ମହାକାଶ ବିଜ୍ଞାନର ପ୍ରଭାବ ଜଡିତ, କହିଛନ୍ତି ପ୍ରଧାନମନ୍ତ୍ରୀ ।