କୋଲକାତା: ପଶ୍ଚିମବଙ୍ଗରେ ଆଗାମୀ ବିଧାନସଭା ନିର୍ବାଚନକୁ ଦୃଷ୍ଟିରେ ରଖି କ୍ଷମତାସୀନ ଟିଏମସି ଓ ବିଜେପି ଉଭୟ ଦଳ ଜୋରଦାର ପ୍ରସ୍ତୁତି ଆରମ୍ଭ କରି ଦେଇଛନ୍ତି । ପଶ୍ଚିମବଙ୍ଗ ସରକାର ସେପ୍ଟେମ୍ବର ୧ରୁ ୪ ତାରିଖ ପର୍ଯ୍ୟନ୍ତ ବିଧାନସଭାର ସ୍ୱତନ୍ତ୍ର ଅଧିବେଶନ ଡକାଇଛନ୍ତି । ଏଥିରେ ବିଜେପି ଶାସିତ ରାଜ୍ୟରେ ବଙ୍ଗାଲିଙ୍କ ସହିତ ହେଉଥିବା ଅତ୍ୟାଚାରକୁ ନେଇ ସେନସର ମୋଶନ ଅଣାଯାଇପାରେ । ଏହା ବ୍ୟତୀତ ସ୍ପେଶାଲ ଇଣ୍ଟେନସିଭ ରିଭିଜନ(ଏସଆଇଆର) ବିରୋଧରେ ବିଧାନସଭାରେ ପ୍ରସ୍ତାବ ଅଣାଯାଇପାରେ ।
ଉଲ୍ଲେଖନୀୟ ନିର୍ବାଚନ ଆୟୋଗ ବିହାରରେ ଏସଆଇଆର କରାଉଛନ୍ତି, ଯାହାକୁ ନେଇ ବିରୋଧୀ ଦଳ ତୀବ୍ର ବିରୋଧ କରିବା ସହ ଅଭିଯାନ ଚଳାଇଛନ୍ତି । ପଶ୍ଚିମବଙ୍ଗରେ ତିନି ଦିନ ଧରି ବିଧାନସଭାର ସ୍ୱତନ୍ତ୍ର ଅଧିବେଶନ ଚାଲିବ । ମମତା ବାନାର୍ଜୀ ଅନେକ ଥର ରାଜସ୍ଥାନରୁ ନେଇ ଓଡିଶା ପର୍ଯ୍ୟନ୍ତ ବଙ୍ଗାଳିଙ୍କ ଉପରେ ହେଉଥିବା ଅତ୍ୟାଚାର ନେଇ ବିଜେପିକୁ ଟାର୍ଗେଟ୍ କରି ଆସିଛନ୍ତି । ମମତା ବାନାର୍ଜୀ ଅନ୍ୟ ରାଜ୍ୟରୁ ଫେରି ଆସୁଥିବା ବଙ୍ଗାଳିଙ୍କ ପାଇଁ ଶ୍ରମଶ୍ରୀ ଯୋଜନା ମଧ୍ୟ ଆରମ୍ଭ କରିଛନ୍ତି । ଏହାରି ଆଧାରରେ ଶ୍ରମିକଙ୍କୁ ମାସିକ ୫ ହଜାର ଟଙ୍କାର ଆର୍ଥିକ ସହାୟତା ଦିଆଯିବ ।
ସୂଚନା ଅନୁଯାୟୀ, ବିଧାନସଭାରେ ଟିଏମସି ଏସଆଇଆରର ବିରୋଧ କରିବ । ଅନେକ ବିଶେଷଜ୍ଞଙ୍କ ମୁତାବକ ନିର୍ବାଚନ ଆୟୋଗ ପଶ୍ଚିମବଙ୍ଗ ବିଧାନସଭା ନିର୍ବାଚନ ପୂର୍ବରୁ ଏସଆଇଆର କରାଇ ପାରନ୍ତି । ଏହାକୁ ନେଇ ବିଜେପି ଓ ଟିଏମସି ମଧ୍ୟରେ ଜୋରଦାର ହଙ୍ଗାମା ହୋଇପାରେ । ଅନ୍ୟପଟେ ରାହୁଲ ଗାନ୍ଧୀ ବିହାରରେ ଭୋଟର ଅଧିକାର ଯାତ୍ରାରେ ବାହାରିଛନ୍ତି ।
ବିରୋଧୀ ଦଳଗୁଡିକଙ୍କ କହିବା କଥା ସ୍ୱତନ୍ତ୍ର ପୁନଃନିିରୀତକ୍ଷଣ ଅଭିଯାନ ଆଧାରରେ ପ୍ରକାଶିତ ଡ୍ରାଫ୍ଟ ମତଦାତା ତାଲିକାରେ ୬୫ ଲକ୍ଷ ଭୋଟରଙ୍କ ନାଁ ହଟାଇବା ସେମାନଙ୍କର ମତାଧିକାର ଉପରେ ହମଲା । ଏହାରି ପ୍ରତିବାଦରେ ହିଁ ରାହୁଲ ଗାନ୍ଧୀ ବିହାରରେ ଭୋଟର ଅଧିକାର ଅଭିଯାନ ଚଳାଇଛନ୍ତି । ବିଜେପି ଓ ନିର୍ବାଚନ ଆୟୋଗ ମିଶି ଭୋଟ୍ ଚୋରି କରୁଥିବା ରାହୁଲ ଅଭିଯୋଗ କରିଛନ୍ତି । ଏହି ପ୍ରସଙ୍ଗକୁ ନେଇ ଦେଶର ରାଜନୀତି ବେଶ ଉଷ୍ଣ ରହିଛି ।
Also read: ପାର୍ଟି ରିଟାୟରମେଣ୍ଟ ସ୍ଥିର କରି ପାରିବ, ମାତ୍ର..., ରାଜନୀତିରେ ବୟସ ସୀମା ନେଇ ଉମା ଭାରତୀଙ୍କ ବଡ ଟିପ୍ପଣୀ