ଶ୍ରୀନଗର: ଜମ୍ମୁ-କାଶ୍ମୀରରେ ପ୍ରକୃତିର ତାଣ୍ଡବ ଜାରି ରହିଛି । କିଛି ଦିନ ହେବ ଲଗାତର ବାଦଲଫଟା ବର୍ଷା ସହ ଭୂସ୍ଖଳନ ଜନଜୀବନକୁ ବିପର‌୍ୟ୍ୟସ୍ତ କରିସାରିଲାଣି । ଶନିବାର ସକାଳରେ ରିଆସୀ ଜିଲ୍ଲାରେ ବାଦଲଫଟା ବର୍ଷା ହୋଇଛି । ମାହୋର ଅଞ୍ଚଳରେ ଭୂସ୍ଖଳନ ହେବାରୁ ଜଣକ ଘର ସମ୍ପୂର୍ଣ୍ଣ ଭୁଶୁଡ଼ି ପଡ଼ିଛି । ଫଳରେ ପୂରା ପରିବାର ଘରେ ଭିତରେ ଚାପି ହୋଇଯାଇଛନ୍ତି । ପ୍ରାୟ ୭ ଜଣଙ୍କର ମୃତ୍ୟୁ ହୋଇଥିବା ଅନୁମାନ କରାଯାଉଛି । 

ମାହୋର ଏସଡିପିଓ ୱାକାର ୟୁନୁସ କହିଛନ୍ତି ଯେ ଘଟଣାଟି ଭୋର ପ୍ରାୟ ୩ଟା ସମୟରେ ଘଟିଥିଲା। ବାଦଲଫଟା ବର୍ଷା ଯୋଗୁଁ ପାହାଡ଼ରୁ ବହୁ ଖୀପ୍ର ଗତିରେ ପାଣି ଆସିଥିଲା । ଫଳରେ ଘରଟି ଭୁଶୁଡ଼ି ପଡ଼ିଥିଲା। "ସମ୍ପୂର୍ଣ୍ଣ ପରିବାର ଭଗ୍ନାବଶେଷ ତଳେ ଚାପି ହୋଇଯାଇଥିଲା। ଉଦ୍ଧାରକାର୍ଯ୍ୟ ପରେ ସକାଳେ ସମସ୍ତ ମୃତଦେହ ଉଦ୍ଧାର କରାଯାଇଥିଲା," ସେ କହିଛନ୍ତି।

ଅନ୍ୟପକ୍ଷରେ ରାମବାନ ଜିଲ୍ଲାର ଏକ ଦୁର୍ଗମ ଗାଁରେ ପ୍ରବଳ ବର୍ଷା ଫଳରେ ୩ ଜଣଙ୍କର ମୃତ୍ୟୁ ହୋଇଛି ଏବଂ ଅନ୍ୟ ଦୁଇଜଣ ନିଖୋଜ ଅଛନ୍ତି । ଜିଲ୍ଲା ମୁଖ୍ୟାଳୟରୁ ପ୍ରାୟ ୨୫ କିଲୋମିଟର ଦୂରରେ ଥିବା ପାହାଡ଼ି ଅଞ୍ଚଳ ରାଜଗଡ଼ରେ ବନ୍ୟା ପରିସ୍ଥିତି ସୃଷ୍ଟି ହୋଇଛି । ଉଦ୍ଧାରକାରୀଦଳ ଦୁଇ ମହିଳାଙ୍କ ସମେତ ତିନି ଜଣଙ୍କ ମୃତଦେହ ଉଦ୍ଧାର କରିଛନ୍ତି ବୋଲି ଅଧିକାରୀମାନେ କହିଛନ୍ତି।

ଶୁକ୍ରବାର ଦିନ ଉତ୍ତର ରେଳବାଇ ପକ୍ଷରୁ ଅଗଷ୍ଟ ୩୦ ତାରିଖରେ ଜମ୍ମୁ, କଟରା ଏବଂ ଉଧମପୁର ରେଳ ଷ୍ଟେସନକୁ ଯାଉଥିବା ଏବଂ ଯିବା ପାଇଁ ୪୬ ଟି ଟ୍ରେନ ବାତିଲ କରାଯାଇଛି । ମଙ୍ଗଳବାରଠାରୁ ରେଳ ଚଳାଚଳ ବନ୍ଦ ରହିଛି । ଜଣେ ଅଧିକାରୀ କହିଛନ୍ତି ଯେ ଜମ୍ମୁର ଅନେକ ସ୍ଥାନରେ ରେଳ ଲାଇନ ଭୁଶୁଡ଼ି ପଡ଼ିବା ଯୋଗୁଁ କାଠୁଆ ଏବଂ ଉଧମପୁର ମଧ୍ୟରେ ରେଳ ଚଳାଚଳ ବନ୍ଦ ରହିଛି ଏବଂ ଟ୍ରେନଗୁଡ଼ିକୁ ବାତିଲ କରାଯାଉଛି।