କେନ୍ଦୁଝର: କେନ୍ଦୁଝର ଜିଲ୍ଲା ଓ ଅନୁଗୁଳ ଜିଲ୍ଲା ସୀମାନ୍ତ ନଗୀରା ଗର୍ଜନଖୋଲ ଜଳପ୍ରପାତରେ ଏକ ଅଘଟଣ ଘଟିଯାଇଛି । ଜଳପ୍ରପାତରେ ଗାଧୋଉଥିବା ବେଳେ ଜଣେ ଯୁବକ ବୁଡ଼ିଯାଇଛନ୍ତି l ଯାହାର ଭିଡ଼ିଓ ଏବେ ଭାଇରାଲ୍ ହେବାରେ ଲାଗିଛି ।

ସୂଚନା ଅନୁସାରେ, ଗତକାଲି କେନ୍ଦୁଝର ଜିଲ୍ଲା ବାଂଶପାଳ ବ୍ଲକର ବାଲରାଇ ଗାଁରୁ ୨ଜଣ ଓ ଗୋପପୁର ଗାଁର ଜଣେ ସାଙ୍ଗ, ୩ଜଣ ଏକାଠି ହୋଇ ନଗୀରା ଗର୍ଜନଖୋଲ ଜଳପ୍ରପାତ ବୁଲିବାକୁ ଯାଇ ସେଠାରେ ଗାଧୋଇଥିଲେ । ଏହି ସମୟରେ ବାଲରାଇ ଗାଁର ଅର୍ଜୁନ ବେହେରାଙ୍କ ସାନ ପୁଅ ଲିପୁନ୍ କୁମାର ବେହେରା ସେଠାରେ ବୁଡ଼ି ନିଖୋଜ ହୋଇଯାଇଥିଲେ । ପରେ ଏ ବିଷୟରେ ଖବର ପାଇ ବାଂଶପାଳ ର ଦମକଳ ବାହିନୀ ସେଠାରେ ଖୋଜାଖୋଜି କରିଥିଲେ  । କିନ୍ତୁ ଗତକାଲି ସନ୍ଧ୍ୟା ହୋଇ ଯିବାରୁ ଖୋଜିବା କାର୍ଯ୍ୟ ବନ୍ଦ ରଖାଯାଇଥିଲା । ଆଉ ଆଜି ସକାଳୁ ପୁନର୍ବାର ପାଲହରା ପୋଲିସ ଓ ବାଂଶପାଳ ଦମକଳ ବାହିନୀ ପକ୍ଷରୁ ଉଦ୍ଧାର କାର୍ଯ୍ୟ ଜାରି ରହିଥିବା ସୂଚନା ରହିଛି ।