ଗଜପତି: ଆଦିବାସୀଙ୍କ ପ୍ରିୟ ଖାଦ୍ୟ ହେଉଛି ବାଉଁଶ ଗଜା ବା କରଡି । ବର୍ଷା ଋତୁରେ ବାଉଁଶ ଗଜା ବାହାରିଥାଏ । ଏହାକୁ ସଂଗ୍ରହ କରି ନିଜେ ଖାଇବା ସହ ବଜାରରେ ବିକ୍ରି କରି ଦିପଇସା ରୋଜଗାର କରିଥାନ୍ତି ଆଦିବାସୀ । ଗଜପତି ଜିଲ୍ଲା ପାରଳାଖେମୁଣ୍ଡି ବଜାରରେ ବିଭିନ୍ନ ବନ୍ୟଜାତ ପରି ପରିବା, ଫଳ ଆସୁଥିବା ବେଳେ ଦେଖିବାକୁ ମିଳିଛି ବାଉଁଶ କରଡ଼ି ପସରା । ଧିରେ ଧିରେ ଏହି ଖାଦ୍ୟ ପ୍ରାୟ ସମସ୍ତଙ୍କ ପସନ୍ଦ ପାଲଟିଲାଣି । ଏହାକୁ ଶୁଖାଇ ଅଧିକ ଦିନ ପର୍ଯ୍ୟନ୍ତ ସାଇତି ରଖି ହୁଏ । କେବଳ ବର୍ଷା ଦିନେ ଏହା ବଜାରରେ ବିକ୍ରି ହେଉଥିବାରୁ ଚାହିଦା ଢ଼େର ରହିଛି । କରଡ଼ିର ପ୍ରସ୍ତୁତ ତରକାରୀ, ଭଜା, ଖଟା ଓ ଆଚାର ଭାରି ସ୍ବାଦିଷ୍ଟ ତେଣୁ ଲୋକଙ୍କର ଏହା ପ୍ରଥମ ପସନ୍ଦ ପାଲଟିଥାଏ ।
ଏହା କାହିଁ କେଉଁ କାଳରୁ ଆଦିବାସୀ ମାନେ ବାଉଁଶ କରଡ଼ିକୁ ନିଜ ଖାଦ୍ୟ ଭାବେ ବ୍ୟବହାର କରିଛନ୍ତି । କରଡ଼ିରେ ପ୍ରଚୁର ପରିମାଣର ଫାଇବର, ଭିଟାମିନ୍, ପ୍ରୋଟିନ୍ ଓ ମିନେରାଲ ଥାଏ । ଏହି ସୁସ୍ବାଦୁ ଖାଦ୍ୟ ଓ ଦୁଇ ପଇସା ରୋଜଗାର ପାଇଁ ଆଦିବାସୀ ବାଉଁଶ କରଡ଼ିକୁ ଛାଡ଼ି ପାରୁନାହାନ୍ତି । ବଜାରରେ ବଢୁଥିବା ଚାହିଦାକୁ ଦୃଷ୍ଟିରେ ରଖି ବାଉଁଶ ଚାଷ କରି କରଡି ବିକ୍ରି କରି ପରିବାର ପୋଷଣ କରୁଥିବା କହିଛନ୍ତି ବୁଦ୍ଧିଜୀବୀ ।
ଯେଉଁଥିପାଇଁ ଆଦିବାସୀମାନେ ଆଦିବାସୀ ମାନେ ଗଜା ବାଉଁଶକୁ ଭାଙ୍ଗି ଆଣିବା ପରେ ଚୋପା ଛଡାଇ ଭଲଭାବେ ଧୋଇ ବଜାରକୁ ନେଇ ବିକ୍ରି କରିଥାନ୍ତି । ବିକ୍ରି ପାଇଁ ଏହାକୁ ସଂଗ୍ରହ କରୁଥିବା ସଂଗ୍ରହକାରୀ କେତୋଟି କରଡ଼ିକୁ ମିଶାଇ ଏକ ନିର୍ଦ୍ଦିଷ୍ଟ ଦରରେ ବିକ୍ରି କରନ୍ତି ତ ଆଉ କିଏ ଛୋଟ ଛୋଟ ଆକାରରେ କାଟି ପତ୍ରରେ ପ୍ରସ୍ତୁତ ଦନାରେ ବିକ୍ରି କରନ୍ତି । ‘‘ଏହି କରଡିରୁ ମୁଖ୍ୟତଃ ବେସର ତରକାରୀ, ଭଜା, ଚିପ୍ସ ସହ ଆଚାର ଓ ଚଟଣୀ ଭଳି ବିଭିନ୍ନ ପ୍ରକାରରେ ଖାଦ୍ୟ ପ୍ରସ୍ତୁତ ହୋଇଥାଏ । ଯାହାର ସ୍ବାଦ ମଧ୍ୟ ବେଶ ନିଆରା । ଶୁଖିଲା ପରେ କରଡ଼ିକୁ ହଣ୍ଡୁଆ ଭାବରେ ବ୍ୟବହାର କରାଯାଏ । କରଡିକୁ ନେଇ ଭଳିକି ଭଳି ସୁଆଦିଆ ବ୍ୟଞ୍ଜନ ପ୍ରସ୍ତୁତ କରି ହେଉଥିବା ଯୋଗୁଁ ଏହାର ଚାହିଦା ବଜାରରେ ଅଧିକ ରହିଥିବା ନେଇ ବୁଦ୍ଧିଜୀବୀମାନେ ପ୍ରକାଶ କରିଛନ୍ତି ।