ଭୁବନେଶ୍ୱର: ସରକାରୀ ବାସଭବନରେ କେନ୍ଦ୍ରଶିକ୍ଷାମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ସହ ଚାଲିଥିବା ବୈଠକ ପରେ ରାଜଭବନରେ ପହଞ୍ଚିଛନ୍ତି ମୁଖ୍ୟମନ୍ତ୍ରୀ ମୋହନ ମାଝୀ । ନିଜ ବାସଭବନରେ ପ୍ରାୟ ଦେଢଘଣ୍ଟା ଧରି ଧର୍ମେନ୍ଦ୍ରଙ୍କ ସହ ଚାଲିଥିଲା ଗୁରୁତ୍ୱପୂର୍ଣ୍ଣ ବୈଠକ । ଏହି ବୈଠକ ପରେ ମୁଖ୍ୟମନ୍ତ୍ରୀ ସିଧା ରାଜଭବନକୁ ଯାଇଛନ୍ତି । ଏଥିସହ କେନ୍ଦ୍ରଶିକ୍ଷାମନ୍ତ୍ରୀ ମଧ୍ୟ ରାଜଭବନକୁ ଯାଇଛନ୍ତି । ସବୁ ବିଧାୟକ ମାନଙ୍କୁ ରାଜଭବନକୁ ଆସିବା ପାଇଁ କୁହାଯାଇଛି । ଜଣକ ପରେ ଜଣେ ବିଧାୟକ ଏବେ ରାଜଭବନରେ ପହଞ୍ଚୁଥିବା ଦେଖିବାକୁ ମିଳିଛି ।
ରାଜଭବନକୁ ଯିବା ପୂର୍ବରୁ ମୁଖ୍ୟମନ୍ତ୍ରୀଙ୍କ ବାସଭବନରେ ଗୁରୁତ୍ୱପୂର୍ଣ୍ଣ ବୈଠକ ବସିଥିଲା । ବୈଠକରେ କେନ୍ଦ୍ରମନ୍ତ୍ରୀ ଧମେନ୍ଦ୍ର ପ୍ରଧାନଙ୍କ ଉପସ୍ଥିତି ରାଜନୈତିକି ମହଲରେ ହଲଚଲ ସୃଷ୍ଟି କରିଛି । କେବଳ ମୁଖ୍ୟମନ୍ତ୍ରୀ ଓ କେନ୍ଦ୍ରଶିକ୍ଷାମନ୍ତ୍ରୀଙ୍କର ଏହି ବୈଠକ ବସିନଥିଲା, ବରଂ ଏଥିରେ ରାଜ୍ୟମନ୍ତ୍ରୀ ମାନେ ମଧ୍ୟ ସାମିଲ ହୋଇଥିଲେ । ତେବେ ଆଜିର ବୈଠକରେ କଣ ହେଲା ଆଲୋଚନା ଏବଂ ବୈଠକ ସରିବା ମାତ୍ରେ ମୁଖ୍ୟମନ୍ତ୍ରୀ, କେନ୍ଦ୍ରମନ୍ତ୍ରୀ ରାଜଭବନରେ ପହଞ୍ଚିବା ଘଟଣା, ଏପରିକି ସବୁ ବିଧାୟକଙ୍କୁ ରାଜଭବନରେ ପହଞ୍ଚିବାକୁ ଡାକରା ମିଳିବା ରାଜନୈତିକ ଉଷ୍ମତା ବଢାଇଛି ।