ନୂଆଦିଲ୍ଲୀ: ରିଜର୍ଭ ବ୍ୟାଙ୍କ ଅଫ୍ ଇଣ୍ଡିଆର ପୂର୍ବତନ ଗଭର୍ଣ୍ଣର ଉର୍ଜିତ ପଟେଲଙ୍କୁ ଏକ ବଡ଼ ଦାୟିତ୍ୱ ମିଳିଛି । ଉର୍ଜିତ ଆନ୍ତର୍ଜାତୀୟ ମୁଦ୍ରା ପାଣ୍ଠି (ଆଇଏମ୍ଏଫ୍)ର କାର୍ଯ୍ୟନିର୍ବାହୀ ନିର୍ଦ୍ଦେଶକ ଭାବେ ନିଯୁକ୍ତି ପାଇଛନ୍ତି । କେନ୍ଦ୍ର କ୍ୟାବିନେଟ୍ ନିଯୁକ୍ତି କମିଟି ଉଜିତଙ୍କୁ ଏହି ନୂତନ ଦାୟିତ୍ୱ ଦେଇଛନ୍ତି । ଏ ନେଇ ବିଜ୍ଞପ୍ତି ପ୍ରକାଶ ପାଇଛି ।
କ୍ୟାବିନେଟର ନିଯୁକ୍ତି କମିଟି ଅର୍ଥନୀତିଜ୍ଞ ତଥା ପୂର୍ବତନ ଆରବିଆଇ ଗଭର୍ଣ୍ଣର ଫର୍ଜିତ ପଟେଲଙ୍କୁ ଆଇଏମ୍ଏଫ୍ କାର୍ଯ୍ୟନିର୍ବାହୀ ନିର୍ଦ୍ଦେଶକ ପଦବୀରେ ନିଯୁକ୍ତିକୁ ଅନୁମୋଦନ କରିଛି । ଅଗଷ୍ଟ ୨୮ ତାରିଖରେ ଜାରି ହୋଇଥିବା ଆଦେଶରେ କୁହାଯାଇଛି । ଉର୍ଜିତ ନୋଟିସ୍ ଜାରି ହେବା ଦିନଠାରୁ ଆଗାମୀ ୩ ବର୍ଷ ପର୍ଯ୍ୟନ୍ତ ଏହି ପଦବୀରେ ରହିବେ । ସେ ପୂର୍ବରୁ ମଧ୍ୟ ଆଇଏମ୍ଏଫ୍ ଅଧୀନରେ କାମ କରିସାରିଛନ୍ତି ।
ଶ୍ରୀଯୁକ୍ତ ପଟେଲ ସେପ୍ଟେମ୍ବର ୪, ୨୦୧୬ରେ ଆରବିଆଇର ୨୪ତମ ଗଭର୍ଣ୍ଣର୍ ହୋଇଥିଲେ । ସେ ରଘୁରାମ ରାଜନଙ୍କ ପରେ ଏହି ଦାୟିତ୍ୱ ସମ୍ଭାଳି ଥିଲେ । ମାତ୍ର ତାଙ୍କର କାର୍ୟ୍ୟକାଳ ଶେଷ ହେବା ପୂର୍ବରୁ ସେ ବ୍ୟକ୍ତିଗତ କାରଣ ଦର୍ଶାଇ ଇସ୍ତଫା ଦେଇଥିଲେ । ୨୦୧୮, ଡିସେମ୍ବର ୧୦ ତାରିଖରେ ଗଭର୍ଣ୍ଣର ପଦରୁ ଇସ୍ତଫା ଦେଇଥିଲେ । ୧୯୯୦ ପରେ ସେ ପ୍ରଥମ କେନ୍ଦ୍ରୀୟ ବ୍ୟାଙ୍କ ଗଭର୍ଣ୍ଣର ଥିଲେ ଯିଏ କାର୍ଯ୍ୟକାଳ ଶେଷ ହେବା ପୂର୍ବରୁ ଇସ୍ତଫା ଦେଇଥିଲେ ।
ଖାଲି ସେତିକି ନୁହେଁ ପଟେଲ୍ ଆରବିଆଇର ଡେପୁଟି ଗଭର୍ଣ୍ଣର ପଦବୀ ମଧ୍ୟ ସମ୍ଭାଳିଛନ୍ତି । ୧୯୯୬-୧୯୯୭ ମଧ୍ୟରେ ଆଇଏମ୍ଏଫ୍ ର କେନ୍ଦ୍ରୀୟ ଡେପୁଟେସନରେ ଥିଲେ ଏବଂ ଏହି ଦାୟିତ୍ୱରେ ସେ ଋଣ ବଜାରର ବିକାଶ, ବ୍ୟାଙ୍କିଙ୍ଗ କ୍ଷେତ୍ରରେ ସଂସ୍କାର, ପେନସନ ପାଣ୍ଠି ସଂସ୍କାର ଏବଂ ବିଦେଶୀ ମୁଦ୍ରା ବଜାରର ବିକାଶ ଉପରେ ପରାମର୍ଶ ପ୍ରଦାନ କରିଥିଲେ । ସେ ୧୯୯୮ ରୁ ୨୦୦୧ ପର୍ୟ୍ୟନ୍ତ ଅର୍ଥ ମନ୍ତ୍ରଣାଳୟ (ଅର୍ଥନୈତିକ ବ୍ୟାପାର ବିଭାଗ) ର ପରାମର୍ଶଦାତା ଥିଲେ। ସେ ସରକାରୀ ଏବଂ ବେସରକାରୀ କ୍ଷେତ୍ରରେ ଅନ୍ୟାନ୍ୟ କାର୍ଯ୍ୟ ମଧ୍ୟ କରିଛନ୍ତି।