ନୂଆଦିଲ୍ଲୀ: ରୁଷଠୁ ତେଲ ଆମଦାନୀ କରିବା ନେଇ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଭାରତ ଉପରେ କ୍ଷୁବ୍ଧ । ଏପରିକି ଏହାରି ପ୍ରତିବାଦରେ ଆମେରିକା ଭାରତ ଉପରେ ଅତିରିକ୍ତ ୨୫ ପ୍ରତିଶତ ଟାରିଫ ଅର୍ଥାତ ମୋଟ୍ ୫୦ ପ୍ରତିଶତ ଶୁଳ୍କ ଲଗାଇଛି । ତେବେ ଜାଣନ୍ତି କି ଯେଉଁ ରୁଷ ତେଲକୁ ନେଇ ଟ୍ରମ୍ପ ଏତେ ଛଟପଟ ହେଉଛନ୍ତି, ସେହି ତେଲ ଆମଦାନୀ କରୁଥିବା ଭାରତକୁ କେତେ ଫାଇଦା ମିଳୁଛି । 

ରୁଷଠୁ ରିହାତି ଦରରେ ଅଶୋଧିତ ତୈଳ ଆମଦାନୀ କରିବାରୁ ଭାରତକୁ ବାର୍ଷିକ ସୁଦ୍ଧ ଲାଭ ମାତ୍ର ୨.୫ ବିଲିୟନ ଡଲାର । ଏହା ଅନୁମାନଠୁ ୧୦ରୁ ୨୫ ପ୍ରତିଶତ କମ । ଏକ ଅଧ୍ୟୟନ ରିପୋର୍ଟରୁ ଏହା ପ୍ରକାଶ ପାଇଛି । ବ୍ରୋକରେଜ କମ୍ପାନି ସିଏଲଏସଏ ଗୁରୁବାର ଜାରି କରିଥିବା ରିପୋର୍ଟ ଅନୁଯାୟୀ ରୁଷଠୁ ଅଶୋଧିତ ତୈଳ ଆମଦାନୀରେ ଭାରତ ହେଉଥିବା ଲାଭକୁ ମିଡିଆ ଅତିରଞ୍ଚିତ କରି ଉପସ୍ଥାପନ କରୁଛନ୍ତି । ଭାରତକୁ ଅଧିକ ଲାଭ ମିଳୁଥିବା ଗଣମାଧ୍ୟମ ବଢେଇ ଚଢେଇ କହୁଛନ୍ତି । 

ରିପୋର୍ଟ ଅନୁଯାୟୀ, ଏହି ଲାଭ ଭାରତର ଜିଡିପିର କେବଳ ୦.୦୬ ପ୍ରତିଶତ ଅର୍ଥାତ ୨.୫ ବିଲିୟନ ଡଲାର ହେବ । ୨୦୨୨ ଫେବୃଆରୀରେ ରୁଷ-ୟୁକ୍ରେନ ଯୁଦ୍ଧ ଆରମ୍ଭ ହେବା ପରେ ଭାରତର ରୁଷଠୁ ତେଲ ଆମଦାନୀ ଦ୍ରୁତ ଗତିରେ ବଢିଥିଲା । ଆର୍ଥିକ ବର୍ଷ ୨୦୨୪-୨୫ରେ ଭାରତ ପ୍ରତିଦିନ ୫୪ ଲକ୍ଷ ବ୍ୟାରେଲ ତେଲ ଆମଦାନୀ କରିଥିଲା । ୟୁକ୍ରେନ ଯୁଦ୍ଧ ପୂର୍ବରୁ ଏହି ରେକର୍ଡ ମାତ୍ର ଏକ ପ୍ରତିଶିତ । 

ରୁଷ ପାଶ୍ଚାତ୍ୟ ଦେଶ ଦ୍ୱାରା ତେଲ ବିକ୍ରି ଉପରେ କଟକଣା    ଲଗାଇବା ପରେ ତେଲ ଉପରେ ରିହାତି ଦେବାରେ ଲାଗିଥିଲା ରୁଷ ।  ଯାହା ଫଳରେ ଭାରତକୁ ଶସ୍ତା ଦରରେ ତେଲ ଯୋଗାଣ ସୁନିଶ୍ଚିତ ହୋଇଥିଲା । ହେଲେ ଆମେରିକା ସହିତ କିଛି ଦେଶ ଭାରତର ସମାଲୋଚନା କରିବା ସହ ଏହାକୁ ଲାଭଖୋର ବୋଲି ଦର୍ଶାଇଥିଲେ ।

ସିଏଲଏସଏ କହିଛି ଯେ, ରୁଷ ତେଲ ଉପରେ ବ୍ୟାରେଲ ପିଛା ୬୦ ଡଲାର ମୂଲ୍ୟ ଦେଖିଲେ ଲାଗୁଛି ଏହା ଏକ ବଡ ଡିସକାଉଣ୍ଟ । ମାତ୍ର ବାସ୍ତବରେ ବୀମା, ଜାହାଜ ପରିଚାଳନା ଏବଂ ବୀମା ପରି ଅନେକ କଟକଣା କାରଣରୁ ଭାରତକୁ ଏହାର ଲାଭ ବହୁତ କମ ମିଳୁଛି । 

ରିପୋର୍ଟରେ ଉଲ୍ଲେଖ ରହିଛି ଯେ, ୨୦୨୩-୨୪ରେ ରୁଷ ତେଲ ଉପରେ ହାରାହାରି ରିହାତି ବ୍ୟାରେଲ ପିଛା ୮.୫ ଡଲାର ରହିଥିଲା, ଯାହା ୨୦୨୪-୨୫ରେ ହ୍ରାସ ପାଇ ଡଲାର ପିଛା ରିହାତି ୧.୫ ଡଲାର ରହିଛି । ଏମିତି ସ୍ଥିତିରେ ଭାରତ ଯଦି ରୁଷଠୁ ତେଲ ଆମଦାନୀ ବନ୍ଦ କରିବ ତେବେ ଏଥିରେ ବିଶ୍ୱ ଯୋଗାଣ ବାଧିତ ହେବ ଏବଂ ଅଶୋଧିତ ତୈଳ ଦର ବ୍ୟାରେଲ ପିଛା ୯୦ ରୁ ୧୦୦ ଡଲାର ପର୍ଯ୍ୟନ୍ତ ପହଞ୍ଚିଯିବ । ଏଥିରେ ବିଶ୍ୱରେ ଦରବୃଦ୍ଧି ବଢିବାର ଆଶଙ୍କା ରହିଛି ।