ନୂଆଦିଲ୍ଲୀ: କେନ୍ଦ୍ର ଗୃହ ମନ୍ତ୍ରୀ ଅମିତ ଶାହଙ୍କ ଉପରେ ଅଭଦ୍ର ଟିପ୍ପଣୀକୁ ନେଇ ତୃଣମୂଳ କଂଗ୍ରେସର ସାଂସଦ ତଥା ବିଜେଡି ନେତା ପିନାକୀ ମିଶ୍ରଙ୍କ ପତ୍ନୀ ମହୁଆ ମୋଇତ୍ରା ବିବାଦରେ ଫସିଛନ୍ତି । ବିଜେପି ଅଭିଯୋଗ କରିଛି ଯେ, ମହୁଆ ଶାହଙ୍କ ମୁଣ୍ଡ କାଟିବା କଥା କହିଛନ୍ତି । ଖାସ୍ କଥା ଏହି ମାମଲା ସେହି ସମୟରେ ଆସିଛି ଯେତେ ବେଳେ ବିହାରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଉପରେ ଅଭଦ୍ର ଟିପ୍ପଣୀକୁ ନେଇ ରାଜନୀତି ସରଗରମ ରହିଛି ।
ପଶ୍ଚିମବଙ୍ଗ ବିଜେପି ନେତା କହିଛନ୍ତି, ଯେବେ ମହୁଆ ମୋଇତ୍ରା ଗୃହମନ୍ତ୍ରୀଙ୍କ ମୁଣ୍ଡ କାଟିବା କହୁଛନ୍ତି, ସେଥିରୁ ଟିଏମସିର ନିରାଶ ଏବଂ ହତାଶାପଣ ଦେଖା ଯାଉଛି । ଏହା ଟିଏମସି ପାର୍ଟି କେତେ ହିଂସକ ଏବଂ ନୃଶଂସ ତାହା ଦର୍ଶାଉଛି । ଏହା ପଶ୍ଚିମବଙ୍ଗର ଛବି ଖରାପ କରିବା ସହ ରାଜ୍ୟକୁ ପଛକୁ ନେଇ ଯାଉଛି । ବିଜେପି ପାର୍ଟି ଏକ ଭିଡିଓ ସେୟାର କରିଛି, ଯେଉଁଥିରେ ମୋଇତ୍ରା ଗଣମାଧ୍ୟମ ପ୍ରତିନିଧିଙ୍କ ସହ କଥା ହେଉଥିବା ଦେଖିବାକୁ ମିଳିଛି ।
ସୂଚନାଯୋଗ୍ୟ, ଏହା ପୂର୍ବରୁ ବିହାରରେ ରାହୁଲ ଗାନ୍ଧୀଙ୍କ ଭୋଟ୍ ଅଧିକାର ଯାତ୍ରା ସମୟରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ଅପଶବ୍ଦ ଭାଷାରେ ଗାଳି କରାଯାଇଥିଲା । ଏହି ଘଟଣାରେ ବିହାର ପୋଲିସ ଶୁକ୍ରବାର ଉକ୍ତ ବ୍ୟକ୍ତିଙ୍କୁ ଗିରଫ କରିଛି । ଅଭିଯୁକ୍ତ ଜଣକ ହେଉଛନ୍ତି ମହମ୍ମଦ ରିଜଭି ଓରଫ ରାଜା(୨୦) । ତାକୁ ଦରଭଙ୍ଗା ସହରର ସିଂହବାଡା ଅଞ୍ଚଳରୁ ପୋଲିସ ଗିରଫ କରିଛି । ବିଜେପି ଦରଭଙ୍ଗା ଜିଲ୍ଲା ସଭାପତି ଆଦିତ୍ୟ ନାରାୟଣ ଚୌଧୁରୀଙ୍କ ଅଭିଯୋଗ ଆଧାରରେ ପୋଲିସ ଅଭିଯୁକ୍ତକୁ ଗିରଫ କରିଛି ।
Also read: ଯେଉଁ ରୁଷ ତେଲକୁ ନେଇ ଟ୍ରମ୍ପ କ୍ଷୁବ୍ଧ, ସେଥିରୁ ଭାରତକୁ ମିଳେ କେତେ ଫାଇଦା; ଦେଖନ୍ତୁ ପୂରା ହିସାବ