ପାଟନା: ଆଗାମୀ ବିଧାନସଭା ନିର୍ବାଚନକୁ ନେଇ ବିହାର ରାଜନୀତି ପାଣିପାଗ ସରଗରମ ରହିଥିବାବେଳେ ଏହା ତାପମାତ୍ରାକୁ ଦ୍ୱିଗୁଣିତ କରିଛି ପ୍ରଧାନମନ୍ତ୍ରୀଙ୍କ ମାଙ୍କ ଉପରେ ଦିଆଯାଇଥିବା ଆପତ୍ତିଜନକ ମନ୍ତବ୍ୟ । ଆଜି ବିଜେପି କାର୍ମକର୍ତ୍ତାମାନେ କଂଗ୍ରେସ କାର୍ଯ୍ୟାଳୟ ସମ୍ମୁଖରେ ନାରାବାଜି କରିଛନ୍ତି । କଂଗ୍ରେସ କାର୍ଯ୍ୟାଳୟ ଘେରିବାକୁ ଚେଷ୍ଟା କରୁଥିବାବେଳେ ଉଭୟ ଦଳ କର୍ମକର୍ତ୍ତାମାନେ ପରସ୍ପର ସହିତ ମୁହାଁମୁହିଁ ହୋଇଛନ୍ତି । କଂଗ୍ରେସ ଅଭିଯୋଗ କରିଛି ଯେ, ବିଜେପି କର୍ମୀମାନେ ଗାଡ଼ି ଭଙ୍ଗାରୁଜା କରିଛନ୍ତି । ମନ୍ତ୍ରୀ ଏବଂ ତାଙ୍କ ସିକ୍ୟୁରିଟିମାନେ ମଧ୍ୟ ଏଥିରେ ସାମିଲ ଥିଲେ । 

ବିରୋଧୀ ଦଳଗୁଡ଼ିକର ମହାଗଠବନ୍ଧନର ଭୋଟର ଅଧିକାର ଯାତ୍ରା ସମୟରେ, ବୁଧବାର ଦିନ ଦରଭଙ୍ଗାରେ ରାହୁଲ ଗାନ୍ଧୀ ଏବଂ ତେଜସ୍ୱୀ ଯାଦବଙ୍କୁ ସ୍ୱାଗତ କରିବା ପାଇଁ କଂଗ୍ରେସ ନେତା ନୌସାଦଙ୍କ ମଞ୍ଚରୁ ପ୍ରଧାନମନ୍ତ୍ରୀଙ୍କ ମାଆଙ୍କ ଉପରେ ଆପତ୍ତିଜନକ ମନ୍ତବ୍ୟ ଦିଆଯାଇଥିଲା । ଶୁକ୍ରବାର ଦିନ ଏହି ପ୍ରସଙ୍ଗକୁ ନେଇ ବିଜେପି କର୍ମୀମାନେ ପାଟନାରେ ରାସ୍ତାକୁ ଓହ୍ଲାଇଛନ୍ତି । ବିଜେପି ନେତାଙ୍କ ସହିତ ବହୁ କର୍ମୀମାନେ ପାଟନାର କୁର୍ଜି ହସ୍ପିଟାଲରୁ ସଦାକତ ଆଶ୍ରମ ପର୍ଯ୍ୟନ୍ତ ଏକ ପ୍ରତିବାଦ ଶୋଭାଯାତ୍ରା ବାହାର କରିଥିଲେ । କଂଗ୍ରେସ କାର୍ଯ୍ୟାଳୟରେ ପହଞ୍ଚିବା ପରେ କଂଗ୍ରେସ ଏବଂ ବିଜେପି କର୍ମୀମାନେ ପରସ୍ପର ସହିତ ମୁହାଁମୁହିଁ ହୋଇଥିଲେ । ତା’ପରେ ପଦଯାତ୍ରାରେ ସାମିଲ ଥିବା ବିଜେପି କର୍ମୀମାନେ ସଦାକତ ଆଶ୍ରମରେ ପ୍ରବେଶ କରିଥିଲେ । ଏଥିରେ କଂଗ୍ରେସ କର୍ମୀମାନେ ମଧ୍ୟ ଉତ୍ତେଜିତ ହୋଇ ପଡ଼ିଥିଲେ। ଉଭୟ ପାର୍ଶ୍ୱରୁ ଲାଠି ଏବଂ ରଡ୍ ବ୍ୟବହାର କରାଯାଇଥିଲା । ସଦାକତ ଆଶ୍ରମରେ ପାର୍କିଂ ହୋଇଥିବା ଗାଡ଼ିର କାଚ ଭାଙ୍ଗି ଯାଇଥିଲା । ଦଳୀୟ ପତାକା ବାଡ଼ି ସହିତ ଲଢ଼େଇରେ ଉଭୟ ପାର୍ଶ୍ୱର ଅନେକ ଲୋକ ଆହତ ହୋଇଥିବା ଜଣାପଡ଼ିଛି। 

ପାଟନା ଜିଲ୍ଲାର ପୂର୍ବତନ କଂଗ୍ରେସ ସଭାପତି ପରଭେଜ ଅହମ୍ମଦ ଅଭିଯୋଗ କରିଛନ୍ତି ଯେ ପୋଲିସ ବିଜେପି ସହିତ ମିଶିଥିଲା । ଏମିତିକି ମନ୍ତ୍ରୀଙ୍କ ସୁରକ୍ଷାକର୍ମୀମାନେ ମଧ୍ୟ ଏହି ଲଢ଼େଇରେ ସାମିଲ ଥିଲେ।