ନୂଆଦିଲ୍ଲୀ: ବନ୍ୟାରେ ପଞ୍ଜାବରେ ହାହାକାର ସ୍ଥିତି । ହିମାଚଳ ପ୍ରଦେଶ ଓ ଜମ୍ମୁ-କାଶ୍ମୀରର ସଂଲଗ୍ନ ଜିଲ୍ଲାଗୁଡିକରେ ସ୍ଥିତି ଦୟନୀୟ ହୋଇ ପଡିଛି ଏବଂ ଅନେକ ଗାଁ ସଂପୂର୍ଣ୍ଣ ଭାବେ ବନ୍ୟା ପାଣିରେ ବୁଡି ଯାଇଛି । ବନ୍ୟା ପ୍ରଭାବିତ ଲୋକଙ୍କୁ ଅସ୍ଥାୟୀ ଶିବିରକୁ ସ୍ଥାନାନ୍ତରିତ କରାଯାଇଛି । ଅନେକ ନିଜର ଅଟ୍ଟାଳିକା ଛାଡି ବନ୍ୟା ଆଶ୍ରୟସ୍ଥଳକୁ ଆସିବାକୁ ବାଧ୍ୟ ହୋଇଛନ୍ତି । ଅନେକଙ୍କୁ ନିଜର ଗୃହପାଳିତ ପଶୁଙ୍କୁ ଉଦ୍ଧାର କରି ପାରି ନାହାନ୍ତି । ପଞ୍ଜାବ ଲୋକଙ୍କ କହିବା କଥା ୧୯୮୮ ପରେ ପ୍ରଥମ ଥର ଏମିତି ଭୀଷଣ ବନ୍ୟା ରାଜ୍ୟରେ ଆସିଛି । ୩୭ ବର୍ଷର ରେକର୍ଡ ଭାଙ୍ଗିଛି । ହିମାଚଳ ପ୍ରଦେଶ ଓ ଜମ୍ମୁ-କାଶ୍ମୀରରେ ଭୀଷଣ ବର୍ଷା କାରଣରୁ ସତଲେଜ, ବ୍ୟାସ ଓ ରବି ନଦୀରେ ଭୟଙ୍କର ବନ୍ୟା ଆସିଛି ।

ଚାରିଆଡେ କେବଳ ପାଣି ପାଣି ହିଁ ନଜର ଆସୁଛି । ଶତାଧିକ ଗାଁ ପାଣିରେ ବୁଡିଥିବା ଦେଖିବାକୁ ମିଳିଛି । ବିଶେଷ କରି ପଠାନକୋଟ, ଗୁରୁଦାସପୁର, ଫାଜିଲକା, ତରନତାରନ, କପୁରଥଲା, ଫିରୋଜପୁର, ହୋସିଆପୁର ଓ ଅମୃତସରରରେ ସ୍ଥିତି ଖରାପ ରହିଛି । ନିମ୍ନ ଅଞ୍ଚଳରେ ଶତାଧିକ ଗାଁ ଜଳମଗ୍ନ ହୋଇଛି । ଦୂରରୁ ଦେଖିଲେ ଘରଗୁଡିକର କିଛି ଅଂଶ ହିଁ ଦେଖିବାକୁ ମିଳିଛି । ଅଧିକାଂଶ ଅଞ୍ଚଳ ପାଣିରେ  ଡୁବି ଯାଇଛି । ହଜାର ହଜାର ଲୋକଙ୍କୁ ନିଜର ଘର ଛାଡିବାକୁ ପଡିଛି । ଏଠାରେ ବହୁ ମାତ୍ରାରେ ଧନଜୀବନ କ୍ଷୟକ୍ଷତି ଘଟିଛି । ବନ୍ୟା ପାଣି ଛାଡିଲେ ହିଁ କ୍ଷୟକ୍ଷତିର ଆକଳନ କରାଯାଇ ପାରିବ ।

ସଂପ୍ରତି ରିଲିଫ ଏବଂ ଉଦ୍ଧାରକାର୍ଯ୍ୟ ଜାରି ରହିଛି । କିନ୍ତୁ ପାହାଡିଆ ଅଞ୍ଚଳରୁ ନେଇ ସମତଳ ଅଞ୍ଚଳରେ ଲଗାତାର ବର୍ଷା କାରଣରୁ ଉଦ୍ଧାରକାର୍ଯ୍ୟରେ ବାଧା ସୃଷ୍ଟ ହେଉଛି । ଉଦ୍ଧାରକାର୍ଯ୍ୟ ଜୋରଦାର କରିବାକୁ ସବୁ ପ୍ରଭାବିତ ଜିଲ୍ଲାର ପ୍ରଶାସନଙ୍କୁ ମୁଖ୍ୟମନ୍ତ୍ରୀ ଭଗବନ୍ତ ମାନ ଆଦେଶ ଦେଇଛନ୍ତି । ବନ୍ୟା ସ୍ଥିତିକୁ ନେଇ ମୁଖ୍ୟମନ୍ତ୍ରୀ ଆଜି ଉଚ୍ଚସ୍ତରୀୟ ବୈଠକ କରି ପ୍ରସ୍ତୁତିର ସମୀକ୍ଷା କରିଛନ୍ତି । ରାଜପୁରାରେ ବନ୍ୟା ନିୟନ୍ତଣ କକ୍ଷ ସ୍ଥାପନ କରାଯାଇଛି । ଏହା ବ୍ୟତୀତ ଜରୁରୀକାଳୀନ ହେଲ୍ପଲାଇନ ନମ୍ବର ମଧ୍ୟ ଜାରି କରାଯାଇଛି ।