ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଉପରେ ଆପତ୍ତିଜନକ ମନ୍ତବ୍ୟ ଦେବା ଜଣେ ଯୁବକଙ୍କ ପାଇଁ ମହଙ୍ଗା ସାବ୍ୟସ୍ତ ହୋଇଛି । ବିହାରରେ ଇଣ୍ଡି ମେଣ୍ଟର ଭୋଟର୍ ଅଧିକାର ଯାତ୍ରାବେଳେ ପ୍ରଧାନମନ୍ତ୍ରୀଙ୍କକୁ ନେଇ ଆପତ୍ତିଜନକ ମନ୍ତବ୍ୟ ଦେବା ଅଭିଯୋଗରେ ଜଣେ ଯୁବକୁ ଗିରଫ କରାଯାଇଛି । ଉକ୍ତ ଯୁବକ ଜଣକ ହେଲେ ଦରଭଙ୍ଗା ଜିଲ୍ଲା ସିଂଘବାରାର ଭାପୁରା ଗ୍ରାମର ମହମ୍ମଦ ରିଜବୀ ଓରଫ୍ ରାଜା ।
ଭୋଟର୍ ଅଧିକାର ଯାତ୍ରାବେଳେ ଏକ ବିବାଦୀୟ ଭିଡ଼ିଓ ସାମ୍ନାକୁ ଆସିଥିଲା । ଜଣେ ଯୁବକ ପ୍ରଧାନମନ୍ତ୍ରୀଙ୍କ ଉପରେ ଅପଶବ୍ଦ ବ୍ୟବହାର କରିଥିଲା । ଉକ୍ତ ଭିଡ଼ିଓ ଦରଭଙ୍ଗା ଜିଲ୍ଲା ସିମରୀ ବୈଠୌଲୀର ବୋଲି ଯାଞ୍ଚ ବେଳେ ଜଣାପଡ଼ିଥିଲା । ଯାହା ଉପରେ ଭାରତୀୟ ଜନତା ପାର୍ଟି ଆପତ୍ତି ଜଣାଇଥିଲା । ବିଜେପି ନେତା କୃଷ୍ଣା କୁମାର ସିଂହ ଥାନାରେ ଏତଲା ଦେଇଥିଲେ । ସମ୍ପୂର୍ଣ୍ଣ ମାମଲାର ଯାଞ୍ଚ କରି କଂଗ୍ରେସ ନେତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଦାବି କରିଥିଲେ । ପୋଲିସ ଯାଞ୍ଚ କରି ମହମ୍ମହ ରିଜବୀ ନାମକ ଜଣେ ଯୁବକଙ୍କୁ ଗିରଫ କରିଛି ।